Yɛbəc 12:6-17

⁶Ntɛ dɔsɔk ndɛ Herodu ɛnacɛm-cɛmnɛ kəbocər Piyɛr kiti dɛmbəp mɔ, pibi papɔkɔ, pakotɛ Piyɛr gbekce mɛrəŋ, pəfəntərɛ pəc-dirɛ asɔdar mɛrəŋ dacɔ. Nde dəkumba, asɔdar ŋanacəmɛ sɔ dəndo ŋac-bum bili.

⁷Gbəŋcana babakɔ, kɔ wəsom wəka dareŋc, mɛlɛkɛ ma Wəbɛ, mender, kɔ pəmot pɔsɔŋ pəwaŋkəra bili disrɛ. Kɔ mɛlɛkɛ mmɛ mentimi Piyɛr k’oc-sut-sut kɔ kəsək, kɔ moloku kɔ: «Məyɛfɛ katəna!» Kɔ gbekce yoŋkoŋɛ kɔ dəwaca.

⁸Kɔ mɛlɛkɛ moloku kɔ: «Məlɛk yamos yam, məbɛrnɛ cɔfta cam!» Kɔ Piyɛr ɔyɔ mamɔkɔ fəp. Kɔ mɛlɛkɛ moloku kɔ sɔ: «Məbɛrnɛ yi, məcəm’ em darəŋ!»

⁹Kɔ Piyɛr ɛŋcəmɛ mɛlɛkɛ mmɛ darəŋ. Ɛnacərɛ fɛ a kəmar ka mɛlɛkɛ kaŋkɔ a kaŋce kɔ: kənəŋk ka dareŋc kɔ nkɔn ɛnacɛm-cɛmnɛ.

¹⁰Ntɛ ŋaŋcepər abum acɔkɔ-cɔkɔ kɔ aka mɛrəŋ mɔ, kɔ ŋambəp kumba ka fɛc nkɛ kənatɛfərnɛ dare mɔ. Kɔ kumba kəŋgbitɛ ki sərka fɔr yaŋan kiriŋ, kɔ ŋawur, kɔ ŋasumpər dɔpɔ dɔlɔma. Gbəŋcana babɔkɔ, kɔ mɛlɛkɛ mɛsak Piyɛr.

¹¹Ntɛ pəndecɛrŋɛ Piyɛr mɔ, k’oloku: «Iŋcərɛ oŋ a Wəbɛ osomna mɛlɛkɛ mɔn, mede mɛbaŋ’ im waca wa Herodu disrɛ, kɔ pəlɛc pɔkɔ aSuyif ŋanafaŋ em mɔ fəp.»

¹²Ntɛ ɛŋcərɛ ti oŋ mɔ, k’ɔŋkɔ nde kəlɔ ka Mari, iya wəka Saŋ, nwɛ aŋc-deŋər tewe ta «Mark» mɔ, nde afum alarəm ŋanaloŋkanɛ ŋac-tola Kanu mɔ.

¹³Ntɛ Piyɛr osut-sut kumba ka dəkəbɛrɛ mɔ, kɔ wəyecəra wəlɔma pac-we kɔ Rodu, ɔŋcɔŋnɛ kəkɔ-cəŋkəl.

¹⁴Kɔ Rodu ɛnɛpəl dim da Piyɛr, mba pəbotu disrɛ ɛŋgbiti fɛ kumba. K’ɛyɛksɛ kəkɔ-loku afum aŋɛ ŋanayi dəkəlɔ mɔ a Piyɛr ender, k’ɛŋcəmɛ dəkumba.

¹⁵Kɔ afum ŋaloku Rodu: «Məna məntamnɛ fɛ!» Mba k’ɛŋgbəc a tɔkɔ oloku mɔ itɔ teyi. Kɔ ŋaloku: «Mɛlɛkɛ mɔn mɔ!»

¹⁶Piyɛr nkɔn pəc-sut-sut kəsut-sut dəm kumba. Ntɛ ŋaŋgbiti kumba kɔ ŋanəŋk Piyɛr mɔ, kɔ cusu cəwos ŋa.

¹⁷K’olok-lokərɛ ŋa kəca a ŋacaŋk, k’ɔlɔmər ŋa ntɛ Wəbɛ owurɛ kɔ dəbili mɔ. K’oloku: «Nəloku ti Sak kɔ awɛŋc asu.» K’owur k’ɔŋkɔ kəfo kəlɔma.