Yɛbəc 11:11-27

¹¹Gbəŋcana babɔkɔ, kɔ arkun maas aŋɛ anasom nde nderem kəyɛfɛ dare da Sesari mɔ, ŋander ŋacəmɛ dəkusuŋka ka kəlɔ kəŋkɔ sənayi mɔ.

¹²Kɔ Amera Ŋecempi ŋolok’ im a səsol səkɔ kɔ ŋa, ali inesɛ fɛ. Kɔ awɛŋc asu aŋa alaŋ camətətin aŋɛ ŋacəm’ em darəŋ, kɔ səŋkɔ səbɛrɛ ndena Kɔrneli.

¹³Kɔ Kɔrneli oloku su ntɛ ɛnanəŋk mɛlɛkɛ nde ndɔrɔn, kɔ moloku kɔ: ‹Məsom fum dare da Yope pakɔ wen’ am Simɔŋ, wəkɔ andeŋər tewe ta «Piyɛr» mɔ.

¹⁴Nwɛ endelok’ əm moloku mmɛ mendeyac’ əm, kəbəp aka kəlɔ kam disrɛ fəp mɔ.›

¹⁵Iyi kəlok-loku, kɔ Amera Ŋecempi ŋa Kanu ŋontorər ŋa pəmɔ ntɛ ŋɛnatorər səna sɔ dəkəcop mɔ.

¹⁶Awa k’iŋcɛm-cɛmnɛ toloku ta Wəbɛ ntɛ ɛnaloku: ‹Saŋ ɛnagbətɛ afum domun, mba nəna Amera Ŋecempi ŋa Kanu ŋɔ nəndesɔtɔnɛ kəgbət teta Kanu.›

¹⁷Kɔ pəyɔnɛ fɔ kəpocɛ kin kayi kɔ ŋanasɔtər Kanu pəmɔ səna aŋɛ səlaŋ Yesu Krist mɔ-ɛ, anɔ inatam kəyɔnɛ-ɛ ntɛ iŋkɔyamsər Kanu mɔ?»

¹⁸Ntɛ ŋane moloku mamɔkɔ mɔ, kɔ bəkəc yontor ŋa, kɔ ŋaŋkor-koru Kanu, ŋac-loku: «Kanu kəsɔŋ sɔ acikəra aŋɛ ŋantɔyɔnɛ Suyif mɔ kətam kəsəkpər bəkəc, ntɛ tɔŋsɔŋɛ ŋasɔtɔ tecepərɛnɛ doru ntɛ Kanu kəfaŋ mɔ!»

¹⁹Ntɛ andif Etiyɛn mɔ, k’ aŋcop kətɔrəs afum alaŋ kɔ tɔsɔŋɛ ŋa kəsaməsər. Alɔma ŋanakɔ atɔf ŋa Fenisi, alɔma ŋakɔ Sipər, alɔma ŋakɔ haŋ Antiyɔk, ŋaŋc-luksɛ fɛ nwɛ o nwɛ sɔ toloku ta Kanu mɛnɛ aSuyif gbəcərəm.

²⁰Afum akakɔ dacɔ, alɔma ŋanayi, aŋɛ ŋanader dare da Antiyɔk kəyɛfɛ ka sədare sa Sipər kɔ Sirɛn mɔ, ŋaŋc-lok-lokər aka kusu ka Kresi, ŋac-loku ŋa toloku tɔtɔt ta Wəbɛ Yesu.

²¹Kəca ka Wəbɛ Yesu kənayi alaŋ akakɔ kəroŋ. Kɔ afum alarəm ŋayɔnɛ alaŋ, kɔ ŋaŋkafəli bəkəc yaŋan nnɔ Wəbɛ Yesu eyi mɔ.

²²Kɔ moloku mamɔkɔ mɛmbɛrɛ kəloŋkanɛ ka alaŋ Yesu ka Yerusalɛm dələŋəs, k’asom Barnabas Antiyɔk.

²³Kəbɛrɛ kɔn di, ntɛ ɛnadenəŋk pətɔt kɔ pəbotu mpɛ Kanu kənayɔnɛ alaŋ a Antiyɔk mɔ, kɔ pəmbɔt kɔ. K’eŋgbiŋər ŋa kəgbɛkər ka Wəbɛ Yesu mera yaŋan fəp kəlaŋ disrɛ.

²⁴Barnabas fum wətɔt ɛnayi. Kəlaŋ kənayi kɔ dɛbəkəc kɔ Amera Ŋecempi ŋa Kanu ŋeyi kɔ sɔ darəŋ. Kɔ afum alarəm ŋaŋcəmɛ dɔpɔ da Wəbɛ Yesu darəŋ.

²⁵Kɔ Barnabas ɔŋkɔ dare da Tarəs kəlɛk Sol.

²⁶Ntɛ Barnabas ɛnəŋk Sol mɔ, k’eŋkekərɛ kɔ Antiyɔk. Teren tin camcam, ŋac-təŋnɛ kəloŋkanɛ ka alaŋ, kɔ ŋaŋtəksɛ kənay ka afum. Dəndo Antiyɔk, difɔ anacop tɔcɔkɔ-cɔkɔ kəwe acɛpsɛ a Wəbɛ Yesu darəŋ «aka Krist.»

²⁷Mata mamɔkɔ, kɔ adəŋk a Kanu alɔma ŋantor dare da Antiyɔk kəyɛfɛ Yerusalɛm.