Yɛbəc 10:23-41

²³Awa kɔ Piyɛr ɛmbɛrsɛ ŋa dɛkɛr, k’ɔsɔŋ ŋa dəkəyi. Dɔckɔsɔk kɔ Piyɛr ɛyɛfɛ, k’ɔŋkɔ kɔ ŋa. K’awɛŋc alaŋ a dare da Yope alɔma ŋaŋcəmbər kɔ.

²⁴Kɔ ŋambɛrɛ Sesari dɔckɔsɔk, Kɔrneli pəc-kar ŋa, k’ewe akomɛnɛ ɔn alɔma nde ndɔrɔn kɔ anapa ɔn atɔt.

²⁵Kəbɛrɛ ka Piyɛr, kɔ Kɔrneli ɔŋkɔ pəfaynɛ kɔ, k’ɛntɛmpɛnɛ kɔ wɛcək dəntɔf. K’ɛŋcəpɛ kɔ suwu.

²⁶Mba kɔ Piyɛr eyekti kɔ, k’oloku: «Məyɛfɛ, ina sɔ fum iyɔnɛ.»

²⁷Ŋayi kəlok-loku kɔ Kɔrneli, k’ɛmbɛrɛ k’ɛmbəp afum alarəm ŋaloŋkanɛ.

²⁸Kɔ Piyɛr oloku ŋa: «Nəŋcərɛ a amɔnɛ aSuyif kəbɔt kɔ acikəra, kɔ pəyɔnɛ fɛ ti-ɛ, pəbɛrɛ ndɔrɔn. Mba Kanu kəmentər im a pəmar fɛ a pakulɛ fum o fum a eyik-yik, kɔ pəyɔnɛ fɛ ti-ɛ, pəmar fɛ sɔ a pakulɛ fum o fum a ɔsɔk fɛ fɔr ya Kanu kiriŋ.

²⁹It’ ɔsɔŋɛ ntɛ məsom a pakɔ-w’ em mɔ, k’inder ali ta iŋcɛm-cɛmnɛ-ɛ. Ndɛkəl iyif əm, T’ ake tɔ məwen’ em-ɛ?»

³⁰Kɔ Kɔrneli oloku: «Tɔsɔtɔ mata maŋkəlɛ ic-tola nnɔ nderem, dɔfɔy dendebəp. K’inəŋk fɔr yem kiriŋ wərkun wəlɔma pəbɛrnɛ yamos yomotər-motər.

³¹Kɔ fum wəkakɔ oloku: ‹Kɔrneli, Kanu kəmbaŋ kətola kam, k’ɛŋcɛm-cɛmnɛ sɔ kəyɔnɛ kam afum nɔnɔfɔr.

³²Məsom fum dare da Yope pakɔ-wen’ am Simɔŋ nwɛ andeŋər tewe ta «Piyɛr» mɔ, nde kəlɔ ka Simɔŋ, wəbəc kata, nwɛ kəlɔ kɔn kəyi kəba kəsək mɔ.›

³³K’isom katina fum, kɔ məna məsɔtɔ abəkəc ŋɔtɔt kəder. Ndɛkəl oŋ səyi fəp fosu Kanu fɔr kiriŋ, sədecəŋkəl moloku mɔkɔ Wəbɛ osom əm kəloku mɔ.»

³⁴Awa kɔ Piyɛr ɛlɛk moloku, k’oloku: «Kaŋce: Iŋcərɛ oŋ a Kanu kəyi fɛ kəsək kin.

³⁵Mba afum fəp dacɔ məna nwɛ məŋnesɛ Kanu, məcəmɛ pəlompu darəŋ mɔ, Kanu kəmbaŋ əm.

³⁶Kanu kənakenɛ aka Yisrayel toloku, pəc-loku ŋa moloku mɔtɔt ma pəforu mpɛ Yesu Krist ɛŋkɛrɛ afum fəp mɔ: Nkɔn ɔyɔnɛ Wəbɛ ka afum fəp.

³⁷Nəna nəŋcərɛ tɔkɔ teyi Yude fəp mɔ, Kalile tɛnacop, ntɛ Saŋ ɛnacam kəgbət dəromun mɔ.

³⁸Kanu kənabɔy Yesu wəka Nasarɛt Amera Ŋecempi ŋɔn kɔ fənɔntər. Nnɔ o nnɔ eŋc-cepər mɔ, ɔŋc-yɔ pətɔt, pəc-taməs afum fəp aŋɛ amera ŋɛlɛc ŋɔŋc-tɔrəs mɔ, bawo Kanu kənayi kɔ nkɔn Yesu.

³⁹Səyɔnɛ atəŋnɛ a mes fəp mmɛ Yesu ɛnayɔ nde atɔf ŋa aSuyif kɔ Yerusalɛm mɔ. Nkɔn nwɛ ŋananim, ŋacaŋ kɔ dəkətɔk mɔ,

⁴⁰mba Kanu kənatimi kɔ tataka tɔn ta maas. Kɔ kəsɔŋ kɔ kəmentərnɛ,

⁴¹bafɔ nnɔ afum fəp ŋayi mɔ, mba nnɔ atəŋnɛ mes aŋɛ Kanu kənanuŋkɛnɛ kəyɛk-yɛk, kɔ səna aŋɛ sənadi yeri, səmun kɔ nkɔn ntɛ ɛnayɛfɛ afi dacɔ mɔ.