Xoão 6:6-28

⁶Xesosi ikara atoko txari Piripi, kotxi inirekari imarotiniri: “Atauako atxiĩti Piripi auikari niposotiire?” Xesosi imarotapekari iuaka ikamakiti tĩkane.

⁷Ininiã Piripi apakapapireta: —Txineiropokoni, tosẽtosi txineiro ota, kona apakata komiri aamotini, nakira kãkiti asikakienatini ĩkapani. !Apakata —itxari.

⁸Iuasaaki ãti Xesosi moianari Simão Petro itari, Ãtree inakori, txari Xesosi:

⁹—Uai aua amarini. Auari ikiena. Sĩko komiri sevata inakori kamakori auari iua. Ipi ximaki axapitiri apaka auari iuamoni. Txamari kãkiti itomaneri sikakienatiko !apakata. Ia nipokori poiãoka —itxari.

¹⁰Xesosi paniãtari imoianariakori: —Nakira hĩpaniãta iitopãkinina —itxana. Sotonaiakiperi auari iuaãtaã. Iua nopini iitopãkana. Sĩko mio apikomoni kikiakori aua.

¹¹Xesosi kosekari komiri amarini nakiti. Iuasaakipeka imisãkiretari Teoso: —Erekapitikari ia komiri auiniua ate. Iua sikari imoianariakori. Eereka ninoa xanakari kãkiti topãkakanimoni. Iua atokokanera itxarina ximaki. Ikinikana inirekaka iaõka auana ninoa.

¹²Ikinimane kamitopeka inakasaaki, ipaniãtari imoianariakori: —Itetakori komiri, ximaki pakini hãpotiita. Kona hiomatapiriko —itxa.

¹³Ininiã apotiitarina komiri itetakori. Tosi kotarina ixãpokakana komiri itetakori.

¹⁴Xesosi posotiire ninoa kãkiti itikasaaki, ninoakakarika isãkirauatana: —Atãopitikara Xesosi aiãtapanãtakitikara, Teoso sãkire sãpiretakari inakorikara ere Xesosi —itxana.

¹⁵Xesosi imarotapekari ninoa nirekiniri iauĩtetinirina iua. Iua kona nirekari ninoa auĩtetiniri iua. Ninoa mamaĩkakaniri apisapanika, Xesosi sipeka iuanoka. Apikoxiti oxiratarimoni ikanĩka.

¹⁶Kikatapeka imoianariakori iokiriĩta ipoa tiniã.

¹⁷Iereẽtauana kanaua ãki. Ĩpiriaãpotarina ipoa Kapanaoõ sitatxiti manapi. Ĩkanõkapeka inakasaaki kona Xesosi apokapanika ninoamoni.

¹⁸Kataparari ĩtimati apoka, ininiã tsakatipokoni.

¹⁹Iuasaaki imekoãpotana. Ipixiniãpeka apokasaakina, ataparina Xesosi ipoa nopini itĩpokotini. Kanauamoni isaãpota. Ninoa pĩkarauata, kotxi ninoa uãkatari kamiri.

²⁰Xesosi akiritana: —Notakara. Kona hĩpĩkarauatape —itxana.

²¹Ininiã apakaparina Xesosi ipoxokoniritikana. Iua morõkokaua kanauaã. Iereẽtakasaakiua, iuasaakipeka kanaua apoka imiriĩpe Kapanaoõ manapi.

²²Katimatinĩkata ipiniãmoni kaikotakani nitamari Xesosi. Ninoa imarotari ãtoka kanaua mitxi iuaã auini. Oa kanaua Xesosi moianariakori anikapeka. Ninoa imarotari Xesosi kona sari imoianariakorikata. Imarotarina ninoanani sini.

²³Iuasaaki kanauaniri Txiperíatxi sitatxitikini apokita Xesosi merepani Teoso misãkiretiniãtaã takote merepani komiri nikikoãtaã.

²⁴Iuasaaki kona ninoa apokari Xesosi, imoianariakori apaka. Ininiã ninoa iereẽtaua kanaua ãki. Iuaĩkana ikanapiriãna. Ipoa ĩpiriãtana Kapanaoõ sitatxitimoni, Xesosi initinina ĩkapani.

²⁵Ninoa apokari Xesosi ipoa ipiniã. —Koerekareri, namonikitapa papoka uai? —itxarina.

²⁶Ininiã Xesosi: —Atão nisãpiretai hĩte. Hĩte nikari komiri nisikakiti. Kamitopeka hĩtxa, ininiã nipokori ĩkapaninokara hinitanãtano nota. Kona hãuikari Teoso posotiireẽ nikaminiri iua posotiiretxi.

²⁷Xesosi pinitana: —Nipokorinoka !hĩxinikape, kotxi nipokori okanani mauakati itxaua. Hĩxinikariko ãtião nipokori, nota hĩtari iaxitikiri siãkiti, kotxi nota sikari kãkiti, kãkiti auapininiika inini tĩkane. Teoso sikari ikinika iposotiire notamoni ninirekaãkiti nikamini ĩkapani —Xesosi txana ninoa.

²⁸—Kiãtokopa atxatari Teoso nireẽkiti akamini? —itxana ninoa.