Xoão 19:8-37

⁸Xoteoakori sãkire ikenakotakasaaki, apia pĩkareta Pirato.

⁹Ininiã iuaĩkana ĩroã kãkiti misiritiko imarotiko pakita ãki. Ipimaãri Xesosi: —Nanipa pina? Txamari !kasãkireri Xesosi.

¹⁰Ininiã Pirato: —Kona pinirekatari pimisãkiretinino? Pixinikariko ia nisãkire. Nota posotari nisikakinii. Apaka nota posotari nokinii aamina ĩpiriãmitakari nopini —itxa Pirato sãkire.

¹¹Xesosi apakapapiretari: —Kona pite auari posotiiretxi pokinino ĩkapani. Ikara inakari piposotiire auiniã, Teosonanira sikai ikara posotiiretxi. Nota sikanapakani pitemoni kamari apiata maerekati.

¹²Pirato ikara atoko inakari ene ikenakotakasaaki, iua ãkixinireẽ ixinikari: —Kiatokopa atxiĩti nisikakari Xesosi? Inirekari Xesosi isikakini. Txamari Xoteoakori akiripoakata: —Pisikakiniãri ikira kiki, kona Sesa moianari !pitxaikauako. Iua sãkire: “Auĩtetxi apiananiri nitxaua.” Sesanoka auĩtetxi apiananiri —itxana Xoteoakori.

¹³Pirato ikara atoko inakariene ikenakotakasaaki, iminari Xesosi iporikitimoni. Ininiã Pirato topãka. Iuaã kãkiti misiritiko isãpiretiniãtaã. Kãkiti takauãkatari iuaã “Kimapori kai kamakori” inaãka. Xoteo sãkireẽ “Kapataa.” Iuaã auĩtetxi iokanatari maerekati kamakari imisiritikomoni.

¹⁴Iuasaaki apaniãxiti takote. Iua õti Páskoa kiiniriti potorikini õti apisa. Iuasaaki Pirato txari Xoteoakorimoni: —Hãtamata, hĩauĩte.

¹⁵Ininiã iuaĩkana ninoa akiripoakata: —Piokanatariko ere. Piokanatariko ere. Hõkariko aamina ĩpiriãmitakari nopini —itxana sasetotxi auĩteakori. Ininiã Pirato: —Hinirekatari nokiniri hĩauĩte aamina ĩpiriãmitakari nopini? Ininiã ninoa: —Ãtikara ate auĩte. Sesanokara ate auĩte —itxana ninoa.

¹⁶Ininiã Pirato sikari Xesosi sotatoakorimoni aamina ĩpiriãmitakari nopini okiko tĩkane. Ininiã anikarina Xesosi.

¹⁷Xesosi anikari aamina ĩpiriãmitakari iuaka okiko ĩkapani. Isana ixirata “Kiitãtatxi” inakorimoni. Xoteo sãkireẽ, “Kóokota,” inakori.

¹⁸Iuaã aamina ĩpiriãmitakari nopini itokakitaãka Xesosi. Apaka ipi kiki tokakitaãka iua takote. Ãti Xesosi kikomoni. Ãti isanaremoni.

¹⁹Pirato paniãtari iõkatsopari aamina ĩpiriãmitakari nopini tokakitiko. Ia atoko itxa iõkatakiti: “Xesosi Nasareekiri, Xoteoakori Auĩte.”

²⁰Itomaneri Xoteoakori atatsopatari iua, kotxi Xesosi okikoãtaã sitatxi takote. Sitatxi sikani napaãpotakasaaki, atamatarina iua iõkatsopari. Ia iõkataãka Xoteo sãkireẽ, Kreko sãkireẽ, Homano sãkireẽ pakini ikinimane imarotiniri ĩkapani.

²¹Ininiã sasetotxi auĩteakori txari Pirato: —Kona piõkatsopatapiri, “Xoteoakori auĩte.” Piõkatsopatariko iuanoka uãkatari Xoteoakori auĩte ininiua —itxana.

²²Ininiã Pirato: —Auape niõkatsopatakiti. Kona iuaĩkana niõkatsopatari —itxa Pirato.

²³Xesosi itokakitakana atoko, sotatoakori kosekari Xesosi mãka. Imatsorakitarina. Imãka mata imatsorakitana ninoa ipi ipi pakini apakapini ĩkapani. Ãti sotato apakapari ipixini, ãti sotato apakapari ipixini, itxaãpota. Xesosi mãka, ãti imãka patapi auakari, !imatsorakitana, kotxi iotsare !auari. Peerekari.

²⁴Sotatoakori itxakakana: —Kona amatsorakitari ia. Sarauatxi atoko makama, imãka anikakari aimarotini ĩkapani. Ininiã iuasaaki Teoso sãkire iõkatsopatakori kitxakapirĩka iaõka apoka. Iua txari: Ninoa xanakari nimãka. Isarauatana nimãka anikakari imarotinina ĩkapani. Teoso sãkire iaõka sotatoakori kama.

²⁵Iuasaaki aamina ĩpiriãmitakari takote oãua Maria, Xesosi inoro oĩtarokata. Iuaã apaka oãua Maria Matarena inakoro. Iuaã apaka oãua ãto Maria, Krópasi inakori ĩtanoro.

²⁶Xesosi atamatakasaakiro inoro iua takote, atamatakasaakiri imoianari itiretakiti apaka, itxaro inoro: —Nitiretakito, ere Xoão, pamarite itxaua.

²⁷Imoianaripekana itxa: —Aroa pinoro otxaua. Ininiã eereka iua anikaro oa aapokomoni iuakata oãuini tĩkane.

²⁸Eereka Xesosi imarotari iparĩka xipope. Ikinika Teoso sãkire iõkatsopatakori iaõka apokini ĩkapani, itxari: —Niposonata.

²⁹Iuaãtaã aua tiitxi. Iua tiitxi ãki aua iãriã katxioãri. Ininiã iuasaaki iokomokarina mapoa atoko inakari iãriãmoni. Aãkeẽ itakarina, Xesosi namaã taka itxarina. Iua aãke isopo inakorike.

³⁰Iãtaka atoko itxari: —Ikinika niparĩka uatxapeka ixipopeka. Inaãka atoko iokirikiita, iokanata itxari ixinire irimoni. Iuasaakipeka ipina itxa.

³¹Iua õti sesta veira, kãkiti tomatiko õti apisa. Xoteo auĩteakori paniãtari Pirato aamina ĩpiriãmitakariã auakani tapike kapatakiko, katima ipĩka ininina ĩkapani, iĩtona makatxakiko ĩkapani apaka. Tomatiko õtisaaki kona ninoa nirekari ipĩkari ĩto kaikotini iuaã.

³²Ininiã sotatoakori sari iuaã. Ikapatakarina Xesosi takote auakani tapike.

³³Txamari sotato atamatakasaakiri Xesosi, !auaika. Ipĩpeka. Ininiãkara kona ikapatakari itapike.

³⁴Sotato iorotari Xesosi itanapitaã iomĩtiã. Iuasaaki iarẽka, ãparaã pakini xiketa.

³⁵Notara itikari Xesosi ipinini, ininiã atãopitikara nisãpiretakiti. Nisãpiretari ikinika nitikakiti. Nimarotari nisãkire atão inini, ininiã nisãpiretai ia atatsopatakanii, hĩte apaka auikiniri ĩkapani.

³⁶Teoso sãkire iõkatsopatakori kitxakapirĩka txari: Kona ãtika iua api !kapatakaãka. Ininiãkara kona Xesosi api kapatakaãka, Teoso sãkire iõkatsopatakori iaõka apokini ĩkapani.

³⁷Ãti Teoso sãkire iõkatsopatakori txari: Ninoa atamatariko iorotakitina.