XIVAN 2:2-11

²Chai vachu' alact'at'asanicalh ju Jesús ju ix'amamaka'ui junta tamak'axtokcalhch.

³Acsni c'acxtaya ju vino pus ju ixnati ju Jesús chanich juni ju ists'alh: ―Matich ju vino.

⁴Chai ju Jesús chani lhik'alhtailh. Junich: ―Ap'acxaca' ji quinati. Icc'atsaich tuchi acnaviya'. Tuca' chin ju pants'iquis ni lai tu'u' acnavi.

⁵Pus ju ixnati chanich ajuni ju ixtamakch'alhcatnan anch: ―Anaviniya'it'itch tachi chun ju catajunanch ju yuchi.

⁶Chai ixlacvi lakachaxan lack'ai akchoko lhinavicanta chiux. Anchach ju ixtamujuich ju xcan ju ixtalhilacch'ak'ai ixlacc'a'ulh'an chai ju ixtalhimacch'ak'aich ju israelitanin ni chunch ixtalhilanitach. Va ixtanajun ni salaka catajunlh ju chunch. Chai ju lakatamin akchoko ixmujui tam cientos litros.

⁷Ju Jesús chanich alacjuni: ―Alakts'amat'itch ju xcan ju ani lacvi akchoko. Chai ju xalapanacni tanavilh ju alhijunicalh.

⁸Pus lana ajunchokolh ju Jesús: ―Amac'ut'uch'ok'ot'itch ju xcan. Alhip'inichit'itch ju t'ajun xtakna' ju vaiti. Chai taquixtaknilh.

⁹Pus ju anuch ixt'ajun xtakna' ju vaiti acsni quilhc'atsalh ju anu' xcan ju tapala vino canch lhiula. Para jantu isc'atsai ta'anchach ju lhimincancha. Va yu'unch ju ixtac'atsai ju ixtamakch'alhcatnanch anch ni yu'unchach ju ixtamacutui ju xcan. Pus ju anu' ixt'ajun xtakna' ju vaiti lhinaulh ist'asanica ju anu' ts'alh ju tamak'axtoklh.

¹⁰Chanich juni: ―Tachi chun ju jok'atni p'ulhnan cataxt'ak'a' ju k'ox vino. Chai acsni lhilacanch cataxt'ak'ach ju palai jantuch can. Para ju uxint'i mak'at'a ju k'ox vino tus chavai.

¹¹Ju ani lhamak'an navilh ju Jesús ju lak'achak'an Caná ju laxa'estado Galilea. Yuchach ju p'ulhnan lhamak'an ju navilh ju Jesús. Chunchach ju apumalacasunilh ju lapanacni ju ixtachaput. Pus acsnich ju palai talhilaca'alh ju Jesús ju anuch ix'amamaka'ui.