Woo Bɛ Ŋɑ 6:2-11

²Ŋɔi woo bɛ mɑɑteeji ŋɑu ɑ̀ tɔtɔɔ inɛ ŋɑ iyi ɑ̀ wɑɑ too kpɑ̃ɑi Jesu ŋɑu fei ɑ̀ ni, kù sĩɑ kɑ jɔ̀ idei Ilɑɑɔ̃ ku wɑɑzo kɑ mɑɑ ce idei ijɛ ŋɑ.

³Nɑ nŋu, iŋɛ kpɑɑsi nwɑ ŋɑ, i cicɑ ɑmɑnɛ mɛɛje si inɔ nŋɛ, inɛ ŋɑ iyi ɑ̀ wɑɑ jɛ nŋɑ sɛɛdɑ jiidɑ, iyi ɑ̀ kɔ̃ò Hundei Ilɑɑɔ̃ do bisi, nɔ kɑ kɑ̃ɑ nŋɑ icɛu.

⁴Ammɑ ɑwɑ tɑkɑ nwɑ ɑɑ kɑ mɑɑ ce kutɔɔ nɔ kɑ mɑɑ wɑɑzo idei Ilɑɑɔ̃ wɑɑti kɑ̃mɑ fei.

⁵Inɛ ŋɑu fei ɑ̀ jɛsi ideu. Ŋɔi ɑ̀ cicɑ Etiɛni iyi í kɔ̃ò Hundei Ilɑɑɔ̃ nɔ nɑɑnɛɛ í lɑ. Si ɑnyii nŋu nɔ ɑ̀ cicɑ Filipu, do Pokɔɔ, do Nikɑnɔɔ, do Timɔɔ, do Pɑmenɑsi, do Nikolɑ inɛi Antiɔsi iyi í too kucei Zuifu ŋɑ wo í bɛi í nɑ í dɑsi Jesu nɑɑnɛu.

⁶Ŋɔi ɑ̀ bɔò ŋɑ bi woo bɛ ŋɑu. Nɔ woo bɛ ŋɑu ɑ̀ ce kutɔɔ ɑ̀ le nŋɑ ɑwɔ si iri ku bɑ ɑ sintiò icɛ.

⁷Bɛɛbɛ mɔi idei Ilɑɑɔ̃ í fɑnɡɑɑ wɑ koo nɔ kukpɔi inɛ ŋɑ iyi ɑ̀ wɑɑ too kpɑ̃ɑi Jesuu í kɔ̃ɔsi wɑ koo si ilui Zeruzɑlɛmu, nɔ woo weei Ilɑɑɔ̃ nkpɔ í dɑsi nɑɑnɛ.

⁸Wee Etiɛni í nɛ ɡbuɡbɑ̃ ntɔ ntɔ nɔ Ilɑɑɔ̃ í ceɑɑ didɔ̃ nɔ í ce mɑɑmɑɑke do nyindɑ nlɑ ɡɔ ŋɑ si ɑninii inɛ ŋɑ.

⁹Ammɑ inɛ ɡɔ ŋɑ ɑ̀ bɑ Etiɛni kɑkɔɔ ku ce. Inɛ ŋɑu ɡɔɡɔ ŋɑ hɑi ilɛi Silisii ɑ̀ nɑɑ do hɑi ilɛi Azii, ɡɔɡɔ ŋɑ mɔ inɛi Sirɛni ŋɑi do Alesɑndiri, ɑŋɑi ɑ̀ jɛ inɛi iɡbɛi Zuifu ɡɔ ŋɑ iyi ɑ̀ yɑ kpe ɑru ŋɑ iyi ɑ̀ jɔ̀.

¹⁰Ammɑ ɑ kù nɔɔ domi wɑ fɔ idei do bisi do ɡbuɡbɑ̃i Hundei Ilɑɑɔ̃.

¹¹Ŋɔi ɑ̀ muɑ mɔkɔ ɡɔ ŋɑ fiɑ si ɑsii ku bɑ ɑ mɑ́ɑ ide. Nɔ inɛ ŋɑ iyi ɑ̀ muɑɑ fiɑ ŋɑu ɑ̀ sɔ̃ inɛ ŋɑ ɑ̀ ni ɑ̀ ɡbɔ inɛɛu ihɛ̃ wɑ fɔ lɑɑlɔi Moizi do Ilɑɑɔ̃.