Womusu 68:8-32

⁸Gusunɔ, sɑnɑm mɛ ɑ wunɛn tɔmbu swɑɑ ɡbiiye ɡbɑburɔ,

⁹tem mu yĩirɑ, mɑ wɔllɑ wukiɑrɑ kɑ dɑm wunɛn wuswɑɑɔ. Mɑ Sinɑin ɡuurɑ diirɑ wunɛ Isirelibɑn Yinnin wuswɑɑɔ.

¹⁰A derɑ ɡuri bɑrukɑɡiɑ yɑ nɑ, mɑ wunɛn tem sɔɔ wɑ̃ɑrɑ wurɑmɑ.

¹¹Mɛ sɔɔrɑ wunɛn tɔmbɑ ben wɑ̃ɑ yeru kuɑ, mɛ, mɛ ɑ sɔɔru kuɑ kɑ kĩru wɔnwɔndobun sɔ̃.

¹²Yinni Gusunɔ, ɑ woodɑ wɛ̃, mɑ tɔn kurɔ sɔmɔ dɑbiru bɑ ye kpɑrɑ.

¹³Yibɛrɛbɑn tɑbu sinɑmbɑ yɑkikirɑmɔ, mɑ ben kurɔbu bɑ ben yɑ̃nu bɔnu mɔ̀ ni bɑ deri.

¹⁴N sɑ̃ɑre kpɑrukonun kɑsi yi sii ɡeesu sɔɔwɑ mɑ nin sɑnsu wurɑ mɔnsi, mɑ i sere dɑ i kpĩ yɑ̃ɑ ɡɔ̃sɔ?

¹⁵Sɑnɑm mɛ Dɑm kpuroɡii wi, u sinɑm be yɑrinɑsiɑ, tem mu bururɑ ɡuu te bɑ mɔ̀ Sɑlumɔniɔ.

¹⁶Bɑsɑnin ɡuunu nu sɑ̃ɑwɑ ɡuu bɑkɑnu. Nin ɡunɡunu mɑɑ dɑbi.

¹⁷Bɛɛ ɡuu ni i ɡunɡuu dɑbinu mɔ, mbɑn sɔ̃nɑ i kɑ Gusunɔn ɡuu te u ɡɔsɑ nisinu mɔ̀. I n yɛ̃ mɑ miyɑ u koo win wɑ̃ɑ yeru ko sere kɑ bɑɑdommɑɔ.

¹⁸Yinni Gusunɔ, ɑ tɑbu kɛkɛ dɑbinu mɔ, mɑ ɑ sĩimɔ yen nɔrɔm nɔrɔm kɑ yen nɔrɔm nɔrɔm subɑ yɛndun suunu sɔɔ. Wunɛn yiiko ye yɑ sɔ̃ɔsirɑ Sinɑiɔ yɑ wurɑ wunɛn sɑ̃ɑ yerɔ.

¹⁹Yinni Gusunɔ, ɑ yɔɔwɑ ɡuurun wɔllɔ, mɑ ɑ tɔmbu yoru mwɛɛrɑ. Mɑ bɑ nun kɛ̃nu kɑ̃, kɑ mɑm be bɑ nun seesimɔn tii.

²⁰Gusunɔ u rɑ sun nɔɔri. Wiyɑ u sɑ̃ɑ bɛsɛn fɑɑbɑ kowo. Yen sɔ̃, sɑ ko nùn siɑrɑ tɔ̃ɔ bɑɑtere.

²¹Wiyɑ u rɑ tɔnu fɑɑbɑ ko. Wi turowɑ u koo kpĩ u nùn yɑkiɑ sɑɑ ɡɔɔn di.

²²Wiyɑ u koo win yibɛrɛbɑn wiru kɔrɑ. Kpɑ u be bɑ wɑ̃ɑ durum sɔɔn wii suunu yɑbe.

²³Wiyɑ u nɛɛ, u koo kɑ bu nɑ sɑɑ Bɑsɑnin di, kpɑ u bu yɑrɑmɑ sɑɑ nim wɔ̃ku sɔɔn di,

²⁴kpɑ su bɛsɛn nɑɑsu kpɛ̃ɛ ben yɛm sɔɔ, kpɑ bɛsɛn bɔ̃nu nu ben ɡonu tem.

²⁵Gusunɔ nɛn Yinni, nɛn sinɑ boko, bɑ wunɛn sɑnum wɑɑmɔ wunɛn sɑ̃ɑ yee dɛɛrɑrɔ.

²⁶Wom kowobɑ bɑ swɑɑ ɡbiɑ, mɑ be bɑ bɑrɑnu kɑ mɔrɔkunu soomɔ bɑ bu swĩi, bɑ wɑ̃ɑ wɔndiɑ be bɑ bɑrɑnu soomɔn suunu sɔɔ.

²⁷I Yinni Gusunɔ siɑro mi tɔmbɑ mɛnnɑ. Bɛɛ Isirelibɑn bweseru, i nùn wɔlle suo.

²⁸Bɛnyɑmɛɛ wi u piiburu bo, win bweserɑ tɑ bu swɑɑ ɡbiiye, mɑ Yudɑn bwese kɛrɑn wiruɡibu kɑ ben tɔmbu bɑ bu swĩi. Yen biru, Sɑbulonin bwese kɛrɑ kɑ Nɛfitɑliɡiɑn wiruɡibu bɑ bu swĩi.

²⁹Gusunɔ u woodɑ wɛ̃ bu nùn ko dɑmɡii. Gusunɔ, ɑ ye ɑ sun kuɑ dɑm sireo.

³⁰Sinɑmbɑ koo kɑ nun kɛ̃nu nɑɑwɑ wunɛn sɑ̃ɑ yerɔ te tɑ Yerusɑlɛmun diɑ kpuro ɡunum kere.

³¹Yinni Gusunɔ, ɑ Eɡibiti yɑm swĩɛyɔ, ye yɑ nun sɑ̃ɑmɔ kɑ sii ɡeesu, ye, ye yɑ sɑ̃ɑ nɡe kɑrɑku ɡe ɡɑ wɑ̃ɑ dɑɑrun bɔkuɔ, ǹ kun mɛ nɡe nɑɑ kinɛ ni nu wɑ̃ɑ ɡɔ̃sɔ, ye, ye yɑ bwesenu dɑm dɔremɔ. A be bɑ rɑ n tɑbu kĩ yɑrinɑsio.

³²Dɑmɡibɑ wee sɑɑ Eɡibitin di. Mɑ Etiopiɡibɑ duki mɔ̀ bɑ nɔmɑ sue Gusunɔn mi ɡiɑ.