Womusu 56:3-12

³Nɛn yibɛrɛ be, bɑ dɑbi, bɑ mɑn buku buku mɔ̀wɑ sɑɑ kpuro, be, be bɑ kɑ mɑn tɑbu mɔ̀ mi, bɑ mɑn wɔri bɑ tɑɑre.

⁴Bɛrum mù n mɑn mwɑ. Wunɑ nɑ rɑ n nɑɑnɛ sɑ̃ɑ.

⁵Yinni, nɑ nun siɑrɑ ɡɑri yi ɑ ɡeruɑn sɔ̃. Nɑ ǹ ɡɑ̃ɑnu ɡɑnun bɛrum mɔ, domi nɑ nun nɑɑnɛ sɑ̃ɑ. Mbɑ tɔnu u koo kpĩ u mɑn kuɑ.

⁶Tɔ̃ɔ bɑɑtere bɑ rɑ mɑn ɡɑri kɔsiwɑ, kpɑ bɑ n mɑn ɡɑ̃ɑ kɔ̃sunu bwisikusimɔ.

⁷Bɑ nɔɔ tiɑ kuɑ, bɑ mɑn sɑkiriɑmmɛ. Bɑ nɛn yirɑ kɑsu bu kɑ mɑn hunde wunɑ.

⁸Domi bɑ tɑmɑɑ kɔ̃sɑ yɑ koo bu yɑrɑ. Yinni, ɑ bu suro kɑ mɔru.

⁹A nɛn yirɑ kpuro swĩi mi nɑ kpikiru dɑ. A nɛn nɔni yĩresu ɡɑ̃rio wunɛn bwɑ̃ɑru sɔɔ. A sin ɡeeru yoruɑ wunɛn tireru sɔɔ.

¹⁰Gusunɔ, nɑ̀ n nun nɔɔɡiru sue, nɛn yibɛrɛbɑ bɑ koo biru wurɑ. Domi nɑ yɛ̃ kɑm kɑm mɑ ɑ sɑ̃ɑwɑ nɛɡii.

¹¹Yinni Gusunɔ, nɑ nun siɑrɑ ɡɑri yi ɑ ɡeruɑn sɔ̃. Mɛyɑ kon mɑɑ nun tɔmɑ wunɛn ɡɑri yin sɔ̃.

¹²Nɑ ǹ ɡɑ̃ɑnu ɡɑnun bɛrum mɔ, domi nɑ nun nɑɑnɛ sɑ̃ɑ Yinni. Ǹ n mɛn nɑ, mbɑ tɔnu u koo kpĩ u mɑn kuɑ.