Womusu 38:4-21

⁴Wunɛn mɔrun sɑɑbu, nɛn wɑsin ɡɑm sɑri mi n bwɑ̃ɑ do. Nɛn durum sɑɑbu nɑ ǹ mɑɑ dɑm ɡɑm mɔ.

⁵Domi nɛn torɑnu kpɛ̃ɑ sere nu mɑn ɡunum kerɑ. Nu sɑ̃ɑ nɡe sɔmu bɑkɑnu ni nu mɑn bunum kere.

⁶Nɛn booboosu kɔ̃sɑ sere su numiɑ nɛn ɡɑri bɑkɑrun sɔ̃.

⁷Nɑ dɛbɑrɑ, nɑ wɑsirɑ sere nɑ ǹ mɑɑ dɑm mɔ. Bɑɑdommɑ, nɑ rɑ n sĩimɔwɑ kɑ nuku sɑnkirɑnu.

⁸Domi bɑrɑrɑ nɛn wɑsi kpuro mwɑ. Yin ɡɑm mɑɑ sɑri mi n bwɑ̃ɑ do.

⁹Nɑ kɔsikirɑwɑ muku muku, nɑ ǹ mɑɑ dɑm ɡɑm mɔ. Nɛn ɡɔ̃ru ɡɑ burisinɛ sere nɑ weeweenu mɔ̀.

¹⁰Yinni, ye nɑ kĩ kpuro, wunɑ ɑ yɛ̃. Nɛn weeweenu kun mɑɑ nun berue.

¹¹Nɛn ɡɔ̃ru ɡɑ ǹ sɔ̃ sɛ̃ɛ, nɛn dɑm mɑn doonɑrimɔ. Wee nɛn nɔni kun mɑɑ wɑ̃ɑru tere.

¹²Nɛn kpɑɑsibu kɑ be bɑ mɑn yɛ̃ kpuro bɑ mɑn duki suurimɔ nɛn bɑrɑrun sɔ̃. Mɑ be bɑ mɑɑ wɑ̃ɑ nɛn turuku, bɑ tii mɛnɑ nɛnɛm.

¹³Be bɑ kɑsu bu mɑn ɡo, bɑ mɑn yɛ̃ri bɛriɑmmɛ bɑɑdommɑ. Be bɑ nɛn kɔ̃sɑ kɑsu, bɑ mɑn kɔ̃sɑ siemɔ, bɑ kɑsu bu mɑn nɔni wɔ̃ke.

¹⁴Adɑmɑ nɛ, nɑ mɑɑriwɑ piti nɡe soso wi u kun ɡɑ̃ɑnu nɔɔmɔ, u ǹ mɑɑ ɡɑ̃ɑnu ɡerumɔ.

¹⁵Mɛyɑ nɑ sɑ̃ɑ nɡe soso. Nɑ ǹ bu ɡɑ̃ɑnu wisɑ.

¹⁶Yinni Gusunɔ, wunɛ sɔɔrɑ nɛn yĩiyɔbu wɑ̃ɑ. Gusunɔ nɛn Yinni, ɑ de ɑ mɑn wisi.

¹⁷A ku de bu nuku dobu ko nɛn sɔ̃, kpɑ bu mɑn seesi sɑnɑm mɛ nɑ sokurɑmɔ.

¹⁸Wee nɑ wɔrumɑɑ dɔɔ, mɑ nɛn wɑhɑlɑ yɑ mɑn wɑ̃ɑsi.

¹⁹Nɑ nɛn torɑnu tuubɑ mɔ̀. Torɑ ni, nu mɑn bɛrum mɔ̀.

²⁰Wee nɛn yibɛrɛbɑ bɑ bwɑ̃ɑ do, bɑ mɑɑ dɑm mɔ. Be bɑ mɑn tusɑ kɑm sɔɔ, bɑ dɑbi.

²¹Kɔ̃sɑ bɑ mɑn kɔsiemɔ, ye nɑ bu ɡeɑ kuɑ. Bɑ nɛn kɔ̃sɑ kɑsu yèn sɔ̃ nɑ rɑ n ɡeɑ mɔ̀.