Text copied!
CopyCompare
Bibeli Gusunɔn Gari - Womusu - Womusu 18

Womusu 18:11-30

Help us?
Click on verse(s) to share them!
11U wɔllun kɔ̃so ɡoo sɔni nɡe dumɑ. Mɑ u bɛllimɔ woo sɔɔ.
12U kukuɑ yɑm wɔ̃kuru sɔɔ, mɑ ɡuru wii sinumɡinu nùn wukiri.
13Win wuswɑɑɔ yɑm bururɑm mu wɑ̃ɑ. Min diyɑ ɡurɑ nɛmɔ kɑ ɡuru kpenu kɑ dɔ̃ɔ buri.
14Win nɔɔ ɡɑ nɔɔrɑ wɔllun di nɡe ɡuru ɡbɑ̃sukubu. Mɑ ɡuru kpenu nɛɛrɑmɔ kɑ dɔ̃ɔ buri.
15U nɛn yibɛrɛbɑ yɑrinɑsiɑ kɑ ɡuru kpenu ni nu sɑ̃ɑ nɡe sɛ̃ɛnu. U bu ɡirɑ bɑɑmɑ kɑ ɡuru mɑɑkinu.
16U wɛ̃ru wurɑ, yibɛrɛbɑ bɑ nɑndɑ. Mɑ ɡuru woo bɔkɔ ɡɑ dɑɑnu ɡberɑsiɑ. Mɑ duniɑn kpɛɛkpɛɛku ɡɑ sɔ̃ɔsirɑ.
17Mɑ u win nɔmu dɛmiɑmɑ wɔllun di u mɑn nɛnuɑ u yɑrɑ nim bwee bɑkɑrun di.
18U mɑn wɔrɑ yibɛrɛbɑn nɔmɑn di. Yibɛrɛ be, bɑ mɑn dɑm kere, mɑ bɑ mɑn tusɑ.
19Yibɛrɛ be, bɑ mɑn wɔriwɑ nɔni swɑ̃ɑrun sɑɑ sɔɔ. Adɑmɑ Yinni Gusunɔ u kuɑ nɛn tɑ̃si yeru.
20U mɑn wɔrɑ ben nɔmɑn di, nɑ n kɑ tii mɔ, domi u mɑn kĩ.
21U mɑn domɑru kuɑ yèn sɔ̃ nɑ dɛɛre. U mɑn domɑru kuɑ yèn sɔ̃ nɑ ɡem swĩi.
22Nɑ win woodɑ mɛm nɔɔwɑ. Nɑ ǹ nùn seesi.
23Nɑ win woodɑ kpuro swĩi. Nɑ ǹ win ɡere yinɛ.
24Nɑ nɛn tii nɛnuɑ kpɑ n ku rɑ kɑ durum ko. Nɑ sɑ̃ɑwɑ dee dee win wuswɑɑɔ.
25Yen sɔ̃nɑ u mɑn kɔsiɑ nɡe mɛ nɛn dɑɑ ɡeɑ nɛ. U mɑn kɔsiɑ nɡe mɛ nɛn ɡɔ̃ru ɡɑ dɛɛrɑm nɛ.
26Sɑ̀ n sɑ̃ɑ nɑɑnɛɡibu, kɑɑ n sun sɑ̃ɑwɛwɑ nɑɑnɛɡii. Sɑ̀ n sɑ̃ɑ ɡemɡibu, kɑɑ n sun sɑ̃ɑwɛwɑ ɡemɡii.
27Sɑ̀ n sɑ̃ɑ dɛɛrobu, kɑɑ n sun sɑ̃ɑwɛwɑ dɛɛro. Sɑ̀ n mɑɑ sɑ̃ɑ keetɑɡibu, kɑɑ n sun sɑ̃ɑwɛwɑ keetɑɡii.
28Yinni Gusunɔ, wunɛn tiiwɑ ɑ rɑ tɔn be bɑ tii kɑwe fɑɑbɑ ko. Wunɛn tiiwɑ ɑ rɑ be bɑ tii sue kɑwe.
29Yinni Gusunɔ, ɑ sɑ̃ɑwɑ nɛn fitilɑ. A rɑ mɑn yɑm bururɑsie.
30A rɑ mɑn dɑm kɛ̃ n kɑ kpĩ n yibɛrɛ be bɑ tɑbu yɑ̃nu mɔ wɔri, kpɑ n yɔ̃ n ben ɡbɑ̃rɑru sure.

Read Womusu 18Womusu 18
Compare Womusu 18:11-30Womusu 18:11-30