Wogaabaa 8:10-35

¹⁰Yaatoogaappe guyyiyan Muusee tiyiyo zaitiyaa ekkidi, Dunkkaaniyaanne Dunkkaaniyaa giddon de7iya miishsha ubbaa tiyiis; tiyidi eta dummayiis.

¹¹Qassi he zaitiyaappe ekkidi, yarshshiyoosaa bolli laapputoo caccafiis; yarshshiyoosaa, a miishshata, meechcha keriyaanne a wottiyoogaa, dummayanau he zaitiyan tiyiis.

¹²Qassi he tiyiyo zaitiyaappe amaraa Aaroona huuphiyan tigidi, a dummayiis.

¹³GODAI Muusa azazidoogaadan, Muusee Aaroona attuma naata sinttau aattidi, qoliyaa maizziis; maizzidi danccuwan danccissiis. Eta huuphiyankka shaashiyaa enccurssaa wottiis.

¹⁴Hegaappe guyyiyan, nagaraa yarshshuwaassi korimaa Muusee aattiis; aattin Aarooninne a attuma naati he korimaa huuphiyan bantta kushiyaa wottidosona.

¹⁵Muusee he korimaa shukkiis; shukkidi a suuttaappe ba biradhdhiyan ekkidi, yarshshiyoosaa kaceta tiyidi, yarshshiyoosaa geeshshiis; qassi yarshshiyoosaa nagaraa atto giissanau attida suuttaa appe garssaara gussidi, Xoossaassi dummayiis.

¹⁶Qantta ashuwaa kammida handdaa ubbaa, tiriyaa maayida handdaa, naa77u kilahotanne eta kammida handdaa ekkidi, Muusee yarshshiyoosaa bollan wottidi xuuggiis.

¹⁷SHin GODAI Muusa azazidoogaadan, galbbaa, korimaappe attidaagaanne tociyaa dunkkaanidosaappe gaxi kessidi, taman xuuggiis.

¹⁸Yaatidi simmidi Muusee xuuggiyo yarshshuwaassi haniya dorssa orggiyaa ehiis; ehin Aarooninne a attuma naati he dorssaa orggiyaa huuphiyan bantta kushiyaa wottidosona.

¹⁹Muusee he dorssa orggiyaa shukkiis; shukkidi a suuttaa yarshshiyoosaa miyyetu ubban caccafiis.

²⁰Qassi dorssa orggiyaa ashuwaakka a qommuwan qommuwan pariis; paridi parettaa, huuphiyaanne handdaa yarshshiyoosaa bolli wottidi xuuggiis.

²¹Qantta ashuwaanne guyye gedata haattan meeccoogaappe guyyiyan, dorssaa muleera GODAASSI taman xuuggiyo, sawuwaa tonggu giya yarshsho oottidi, GODAI Muusa azazidoogaadan yarshshiyoosaa bollan wottidi xuuggiis.

²²Hegaappe guyyiyan, qeesetettaassi tiyettiyo wode shiishshiyo naa77antto dorssaa Muusee ehiis; ehin Aarooninne a attuma naati he dorssaa huuphiyan bantta kushiyaa wottidosona.

²³Muusee he dorssaa shukkiis; shukkidi a suuttaappe ekkidi, Aaroonassi ushachcha haittaa xeeraa, ushachcha kushiyaa wogga biradhdhiyaanne, ushachcha tohuwaa wogga biradhdhiyaa tiyiis.

²⁴Qassi Muusee Aaroona attuma naatakka sinttau ehiidi, he suuttaappe ekkidi, eta ushachcha haittaa xeeraa, eta ushachcha kushiyaa wogga biradhdhiyaanne eta ushachcha tohuwaa wogga biradhdhiyaa tiyiis. Hegaappe guyyiyan, Muusee attida suuttaa yarshshiyoosaa miyyetu ubban caccafiis.

²⁵Yaatidi modhdhuwaa, nasiyaa, qantta ashuwaa maayida handdaa, tiriyaa maayida handdaa, naa77u kilahotanne eta maayida handdaanne ushachcha gedaa ekkiis.

²⁶Qassi irshshuwaa yeggennan uukkido oittaa wottiyo GODAA sinttan de7iya masoofiyaappe issi komppuwaa, zaitiyaara uukkido issi oittaanne issi lee7e lichchakkuwaa ekkidi, hageeta modhdhuwaa bollaaninne ushachcha gedaa bollan wottiis.

²⁷I ha qumaa ubbaa Aaroona kushiyaaninne a attuma naatu kushiyan wottiis; wottin eti GODAA sinttan wuxaawuxiyo yarshsho oottidi wuxaawuxidosona.

²⁸Hegaappe guyyiyan, Muusee he qumaa eta kushiyaappe ekki, xuuggiyo yarshshuwaara gattidi, qeesetettaassi tiyettiyo wode GODAASSI taman xuuggidi shiishshiyo, sawuwaa tonggu giya yarshshuwaadan, yarshshiyoosaa bollan wottidi xuuggiis.

²⁹Qassi Muusee anggaasuwaa ekkidi, wuxaawuxiyo yarshsho oottidi GODAA sinttan wuxaawuxiis; GODAI Muusa azazidoogaadan, qeesetettaassi tiyettiyo wode yarshshiyo dorssa orggiyaa ashuwaappe hegee Muusa gakkiya a qommuwaa.

³⁰Muusee tiyiyo zaitiyaappenne yarshshiyoosaa bollan de7iya suuttaappe ekkidi, Aaroona bollinne a maayuwaa bolli, qassi a attuma naatu bollinne, eta maayuwaa bollikka caccafiis; yaatidi Aaroonanne a maayuwaa qassi a naatanne a naatu maayuwaakka dummayiis.

³¹Muusee Aaroonanne a attuma naata hagaadan yaagiis; “Ashuwaa Dunkkaaniyaa karen doissite; doissidi, ‘Aarooninne a naati hegaa moona’ yaagada taani azazidoogaadan, qeesetettaassi tiyettiyo wode shiishshiyo yarshshuwaa wottiyo masoofiyaa giddon de7iya yarshsho oittaara hegan miite.

³²He ashuwaappenne oittaappe palahidaagee de7ikko taman xuuggite.

³³Qeesetettaassi tiyiyo wogai laappun gallassaa ekkiyo gishshau, he intte qeesetettaassi tiyettiyo laappun gallassai wuranaashin, Dunkkaaniyaa penggeppe kare kiyoppite.

³⁴Ha hachchi oosettidaagee GODAI azazin, intte nagaraa atto giissanau oosettiis.

³⁵Dunkkaaniyaa penggen laappun gallassa kumettaa gallassinne qamminne takkite; GODAA wogaakka naagite; ixxikko intte haiqqana. Tana GODAI azazidoogee hagaa” yaagiis.