Wogaabaa 7:7-27

⁷“‘Naaquwaa yarshshoi nagaraa yarshshuwaakka mala; eta naa77aa wogai issuwaa. Hegeenne yarshshettida mehiyaa ashoi nagaraa atto giissanau yarshshuwaa yarshshida qeesiyaassi imettees.

⁸Ooninne xuuggiyo yarshshuwaa ehin ekkidi yarshshiya qeesee he mehiyaa galbbaa baayyo ekko.

⁹Coociyan komppettida kattaa yarshsho ubbainne oton doisettida woikko bashen uukettida ubbaikka he yarshshuwaa yarshshida qeesiyaassi imettees.

¹⁰Qassi zaitiyan munaqettida woikko munaqettibeenna kattaa yarshsho ubbai Aaroona naatu ubbaassi imettees; eti hegaa hircciyan shaakki ekkona.

¹¹“‘Asi issippetettaa yarshshuwaa GODAASSI yarshshiyo wode ayyo de7iya wogai hagaa:

¹²I shiishshiyo issippetettaa yarshshoi galata yarshsho gidikko, he yarshshuwaara issippe zaitiyan munaqqido, irshsho yeggennan uukkido oittaa, zaitiyan tiyido, irshshoi gelibeenna lee7e lichchakkuwaanne zaitiyan loitti munaqqido, liiqo xiilliyaappe uukettida komppuwaa shiishsho.

¹³He galataayyo shiishshiyo issippetettaa yarshshuwaara issippe irshshuwaa yeggido munaqaappe uukettida oittaakka imota oottidi shiishsho.

¹⁴Qassi he ubba qommo oittatuppekka i issuwaa issuwaa denttidi, GODAASSI yarshsho oottidi eho. Hegee issippetettaa yarshshuwaa suuttaa caccafida qeesiyaassi imetto.

¹⁵He mehiyaa ashoi he yarshshettido gallassi meetetto; maalladossi aibinne attoppo.

¹⁶“‘SHin a yarshshoi shiiquwaa gattiyoogaa woikko ba dosan coo immiyo issippetettaa yarshsho gidikko, he yarshshuwaa ashoi he yarshshido gallassi meetetto; appe attiyaagee qassi wonttetta gallassikka meetetto.

¹⁷He yarshshuwaa ashuwaappe palahidi heezzantto gallassa gakkanaashin gam77iyaagee de7ikko, hegee taman xuugetto.

¹⁸Issi asi shiishshido issippetettaa yarshshuwaa ashuwaappe augeenne heezzantto gallassi meetettikko, a yarshshoi ekettenna; i yarshshidobaadankka qoodettenna. He yarshshoi tuna; appe miida ooninne ba nagaran oishettees.

¹⁹“‘Tunabaa aibanne bochchida ashoi meetettoppo; i taman xuugettanau koshshees. Hara ashuwaa gidikko, wogan geeshsha gidiya asi ooninne maana giikko mo.

²⁰SHin issi asi tuna gidi uttidi, GODAAYYO shiishshido issippetettaa yarshshuwaa ashuwaappe miyaabaa gidikko, he asi ba asaa giddoppe bohetto.

²¹Qassi issi asi tunabaa aibanne bochchikko asaa tunatettaa gidin woikko tuna mehe gidin, woikko hara sheneyiya tunabaa bochchikkonne simmidi GODAAYYO yarshshido issippetettaa yarshshuwaa ashuwaappe miikko, he urai ba asaa giddoppe bohetto’ yaaga” yaagiis.

²²GODAI Muusessi hagaadan yaagidi yootiis;

²³“Israa7eela asaassi hagaadan yaaga; ‘Korima woikko dorssa woikko deeshsha ashuwan modhdho zawaa mulekka mooppite.

²⁴Haiqqida mehiyaa woikko do7i worido mehiyaa modhdhuwaakka harabau go7ettiteppe attin, appe aibanne mooppite.

²⁵Aissi giikko, GODAAYYO taman xuuggiyo yarshshuwaassi shiishshiyo mehiyaa modhdhuwaa miya ooninne ba asaa giddoppe bohetto.

²⁶Intte de7iyo sohuwan awan gidikkokka, kafo suuttaa, mehe suuttaa woikko harabaa aiba suuttaanne mooppite.

²⁷Suutta miya ai asinne, ba asaa giddoppe bohetto’ yaaga” yaagiis.