Wiawia 20:2-30

²A lao kakan sili sap oko, o panapanaui irail kaualap, ap kotilang wein Krik.

³A lao kotikot wasa o saunipong silu, ap men kotilang Sirien, ari so, a kotin pure dong Masetonien, pwe Sus oko masamasan i.

⁴A iet akan, me likid i lel Asien: Sopater nain Pirus men Peröa, a Aristarkus o Sekundus men Tesalonik, a Kaius men Derpe, o Timoteus, o Tikikus, o Tropimus men Asien.

⁵Mepukat tiong mas ap aui kit nan Troas.

⁶Murin kamadip en prot somut se serok wei sang Pilipi, tangatangki ran limau kokola re ’rail Troas, wasa se mimi ia ran isu.

⁷A ni ran kaieu en wik, ni at pokon pena, pwen pilitiki pena prot, Paulus ap kotin padaki ong irail. A mandan ran o a pan samala. A kotin kawarailar a padak lao lel ailep en pong.

⁸A lamp toto mi nan kokon poa, wasa se pokon pena ia.

⁹A manakap amen, me ad a Eutikus, me momod nan wanimtuk, me mair kalikala. A ni en Paulus a padak warai, i ari mair kalikala melel, ap pupedi sang ni kasilu en kokon poa, o re pokada, a melar.

¹⁰A Paulus me kotidi kipedi ong poa o polodi i masani: Komail der mauk, pwe a memaur!

¹¹I lao kotidala o pilitiki pena prot, o konoter, o padapadak warai lao lel wasa ran, ap kotilar.

¹²A irail wado manakap memaur ap pereperen kaualap.

¹³A kit me madang iang sop o, tangatang kolang Asos, wasa se pan uk ia Paulus, pwe i me a kakalik ong kit. A pein i pan sapal.

¹⁴A lao tu ong kit nan Asos, se ap uk i, tangalang Mitelene.

¹⁵Kit tangatang kodo sang wasa o, a manda se lel ong likin Kios, o manda se lele dong Samos, o se mondi Trokilion, a manda se pwara dong Miletus.

¹⁶Pwe Paulus kileledier en dauli Episus, pwe a der pwapwand nan Asien, pwe a kotin karawaru, ma a pan kak, a pan lel ong Ierusalem ni ran en Pentikos.

¹⁷A sang Miletus a kotin ilakilang Episus molipe saunkoa en momodisou kan.

¹⁸Irail lao pwara dong i, a kotin masani ong irail: Komail asa duen ai wiawia re omail ansau karos sang ni tapin ran o, me i lel Asien,

¹⁹Duen i papa Kaun o ni aktikitik, o sangesang, o kamekam nan pung en Sus oko, ni ar rukiruki ia di.

²⁰O duen i sota oki sanger meakot me katepan, pwe i kaireki komail karos, o padapadaki komail sansal o nan im akan.

²¹O i kadede ong men Sus o pil men Krik kalula ong Kot o poson atail Kaun Iesus Kristus.

²²A kilang, i ap kokodalang Ierusalem, ngen i salidi o i sasa, da me pan pid ia wasa o.

²³A Ngen saraui kin kotin kadede ong ia nan kanim karos, me sal akan o kamekam kin auiaui ia.

²⁴Ari so, i sota kin insenoki mepukat, i pil sota kasampwaleki maur i, pwe i en kaimwisokela ai koa dodok, me i aleer sang ren Kaun Iesus, en kadede rongamau en mak en Kot.

²⁵A kilang, i ap asaer, me komail karos, me i padapadaki onger wein Kot, pan solar udial mas ai.

²⁶I me i kadede ong komail ran wet, me i makelekel sang ntan komail karos.

²⁷Pwe i padaki ong komail duen kupur en Kot, o sota man meakot me i okisang komail.

²⁸Komail ari kalaka komail o momodisou karos wasa, me Ngen saraui kotin kasapwil komail dang silepa ko, pwen apapwali momodisou en Kot me a kotin pwainiki pein nta.

²⁹Pwe i asaer, me murin ai samalar kidi komad akai pan pwara dong komail, me sota pan kasampwaleki pwin o.

³⁰A ol akai pan uda sang nan pein komail, me pan padak sapung, pwen wiaki tounpadak kan pein ar warok kan.