Wiawia 20:15-38

¹⁵Kit tangatang kodo sang wasa o, a manda se lel ong likin Kios, o manda se lele dong Samos, o se mondi Trokilion, a manda se pwara dong Miletus.

¹⁶Pwe Paulus kileledier en dauli Episus, pwe a der pwapwand nan Asien, pwe a kotin karawaru, ma a pan kak, a pan lel ong Ierusalem ni ran en Pentikos.

¹⁷A sang Miletus a kotin ilakilang Episus molipe saunkoa en momodisou kan.

¹⁸Irail lao pwara dong i, a kotin masani ong irail: Komail asa duen ai wiawia re omail ansau karos sang ni tapin ran o, me i lel Asien,

¹⁹Duen i papa Kaun o ni aktikitik, o sangesang, o kamekam nan pung en Sus oko, ni ar rukiruki ia di.

²⁰O duen i sota oki sanger meakot me katepan, pwe i kaireki komail karos, o padapadaki komail sansal o nan im akan.

²¹O i kadede ong men Sus o pil men Krik kalula ong Kot o poson atail Kaun Iesus Kristus.

²²A kilang, i ap kokodalang Ierusalem, ngen i salidi o i sasa, da me pan pid ia wasa o.

²³A Ngen saraui kin kotin kadede ong ia nan kanim karos, me sal akan o kamekam kin auiaui ia.

²⁴Ari so, i sota kin insenoki mepukat, i pil sota kasampwaleki maur i, pwe i en kaimwisokela ai koa dodok, me i aleer sang ren Kaun Iesus, en kadede rongamau en mak en Kot.

²⁵A kilang, i ap asaer, me komail karos, me i padapadaki onger wein Kot, pan solar udial mas ai.

²⁶I me i kadede ong komail ran wet, me i makelekel sang ntan komail karos.

²⁷Pwe i padaki ong komail duen kupur en Kot, o sota man meakot me i okisang komail.

²⁸Komail ari kalaka komail o momodisou karos wasa, me Ngen saraui kotin kasapwil komail dang silepa ko, pwen apapwali momodisou en Kot me a kotin pwainiki pein nta.

²⁹Pwe i asaer, me murin ai samalar kidi komad akai pan pwara dong komail, me sota pan kasampwaleki pwin o.

³⁰A ol akai pan uda sang nan pein komail, me pan padak sapung, pwen wiaki tounpadak kan pein ar warok kan.

³¹Komail ari masamasan o tamanda, me i sota dukedi, panaui amen amen, sangesang ni ran ni pong saunpar silu.

³²Ari, i pan mueid ong komail Kot o masan en kupur a, me manaman ong kapwai komail ada, o kotiki ong komail soso eu ren me saraui kan.

³³I sota noroke en amen a silper, de kold, de likau.

³⁴Pein komail asa, me pa i kat kin papa ia o ai warok kan.

³⁵I kasale ong komail er meakan duen komail en dodok, pwen sauasa me luet akan o tamatamanda masan en Kaun Iesus akan, duen a pein kotin masani: Kiki wei me kaperen sang ale.

³⁶A lao kotin masanier mepukat, a kelepuki iang irail karos kapakap.

³⁷Irail ari sangesang kaualap o polodi tapin wor en Paulus o metik i.

³⁸Re insensuedekier kaualap a masan, me dene re solar pan udial silang i. Irail ari likid i koti ong pon sop o.