Wannis 11:12-31

¹²Kisa paanan yivayna eena “Ta keeda Imbo, yi raatidianna, paasha ki paashe” kina ke hamade.

¹³Yesusaar Alaazarsa dembhin goynsa ki giyade; kediar raat kinin raatonsa kinin giyea kena ko maatade.

¹⁴Ogo wodanka Yesus kena may “Alaazar diydine.

¹⁵Yedi idar woylamin yenin qajoadettsi konin hayenna raqin ogote inin dahaamonna, yenante ida wozadhe. Ta keeda kikal wo yive” kena ki hamade.

¹⁶Ogonante Didimos hambhea Toomaase Yesussa paanan yivayna yettsinakal “Kimbesana diyota wodiar wo yive” kena ki hamade.

¹⁷Yesusin nivenka, Alaazar duukadhaysaka rooro oydi konin maatonam ki qansade.

¹⁸Bitaania Yerusaalemkala kilometir makkamaddha koda pegadhe.

¹⁹Ayiwd eensaar thoothina eena Martabee Mayriyambesa indanaasasa dembhin goynsa keam wocchinsana kekal nivayse ke dahade.

²⁰Martaar Yesusin nivonam yinin qansenka, kiam chocchana ko utade; Mayriyamaar ooninte dooqayse ko dahade.

²¹Martaar Yesusna “Imbo, ha ini kote daana, indanaasa diyehe.

²²Ta Barjoam hanin misken wulam Barjo hana kinin imenam dhesayda dhese” kina ko hamade.

²³Yesusaar “Hambanaasa dembhira kida dhaabhe” kona ki hamade.

²⁴Martaar “Dembhira dhaabhadhen macchin rooroaka kinin dhaabhenam dhesayda dhese” kina ko hamade.

²⁵Yesusaar kona “Eenaam dembhira dhaaseabee kena dehen sadan imeabe intane; idar woylamin qajea yi diyaakaar, sadaka daa ki dee.

²⁶Sadaka dahayse idar woylamin qajayna wul rooro wul dembhi diyehe. Ogoam gonne hamayse tiyaa tiyo?” ki hamade.

²⁷Kodiar “Ee, Imbo, ya ‘Peen kodar niva ki nive’ hambhaa Kiristoos, Barjo Naasa hanin dohonam gonne hamayse tiyayda tiye” kina ko hamade.

²⁸Ogoam kikal konin dhalqonsa budonte, yivayse yinnon indanaan Mayriyamam aachika eelayse, “Dhettsea nivayse haam kida eele” kona ko hamade.

²⁹Kodiar ogoam yinin qansenka, saanawa dhaabhayse Yesuskal ko yivade.

³⁰Yesusaar Martayn kikal keeron raqinte ki dahade; akar gurdandar ardadehe.

³¹Koam wocchinsada kombesana kinka ooninte dahaana Ayiwd eenaar Mayriyam kekalanka saanawa utaate konin yivonam haapayse Alaazarsa duukin raqindar eepana konin yivea kena ko maataysaka, kedi kosa paananka ke yivade.