WALOMA 15:7-31

⁷Avo mwibokele wenyego kwa wenyego, kamba Kilisto viyawabokele mweye, sama ya yenzi ya Mulungu.

⁸Kwavija nowalongela kamba Kilisto keza kamba mtumigwa wa Wayahudi kulagusa kamba Mulungu kabule uzenzeleganye m'vilagano viyavitendile ha wahenga zao,

⁹giladi Wamhazi wamuyenzi Mulungu sama ya bazi jake. Kamba viyandikigwe Mzinyandiko Zing'alile, “Avo nokutogola mdidale da Wamhazi, na kwimba nyila za kudiyenzi twaga jako.”

¹⁰Vivija zolonga, “Deng'heni, Wamhazi, hamoja na wanhu zake!”

¹¹Na vivija, “Wamhazi wose, mmuyenzi Mndewa. Na wanhu wose, mmuyenzi heyo!”

¹²Vivija Isaya kolonga, “Kolawila munhu kulawa mulukolo lwa Yese, ayo yondayenuke yawatawale Wamhazi, na hewo womtamanila heyo.”

¹³Mulungu wa tamanilo yawamemeze ndeng'ha yose na tindiwalo kamba vija vimumtamanila, giladi mmemezwe na tamanilo kubitila mhiko za Loho wa Mulungu.

¹⁴Ndugu zangu, nie mwenyego notogola kamba mweye wenyego mmema unovu, na mmemezwa ilimu yose, na modaha kuifundiza wenyego kwa wenyego.

¹⁵Niwandikila mweye kuno nikiidandaya mmbuli ziyagwe kamba kuwakumbusa kabili, sama ya bazi diyangwelele Mulungu

¹⁶da kuwa msang'hana wa Yesu Kilisto ha Wamhazi msang'hano ya ukulu wa nhambiko ya kuupeta Usenga Unogile wa Mulungu, giladi Wamhazi wawe nhosa itogolwe na Mulungu, ing'alizwe na Loho wake.

¹⁷Avo, kubitila Yesu Kilisto, nna kilamso cha kuitopela sang'hano yangu ha Mulungu.

¹⁸Sigeza kulonga kinhu chochose ila kija kiyatendile Kilisto kubitila nie mkuwalongoza Wamhazi wamtogole Mulungu kubitila gaja ganilongile na kugatenda,

¹⁹kubitila mhiko za vilaguso na mikanganyo, kubitila mhiko za Loho wa Mulungu. Avo kulawa Yelusalemu mbaka viwambo vose vizunguluka Ililiko, niupeta ng'hani Usenga Unogile wa Kilisto.

²⁰Sulukila yangu mazua gose ikala kuupeta Usenga Unogile hanhu Kilisto hanatangigwa, giladi sambinizenge hayasongile kuzenga munhu iyagwe.

²¹Kamba viyandikigwe Mzinyandiko Zing'alile, “Awo wakalile hawanalongeligwa mbuli zake, womtanga, na awo wakalile hawanahulika mbuli zake, wovitanga.”

²²Kino kicho kilamso cha nie kugomesigwa mianza bwando kwiza kumwenu.

²³Ila sambi haduhu hanhu hayagwe muisi ino ha nie kusang'hanika, na avija vinikalile nisulukila mmilao bwando kwiza kumwenu,

²⁴nogelegeza kutenda avo kipigiti vondanichole muisi ya Sipania. Notamanila kuwatembelela mweye vondanibitile aho. Tuhesha kukala hamoja mkipigiti kidodo, munisangile sama ya mwanza wangu.

²⁵Ila, sambi nochola Yelusalemu kuwasang'hanila wanhu wa Mulungu.

²⁶Kwavija wanhu wamtogole Kilisto wali muisi za Makedonia na Akaya wanogelwa kuwasangila wakumbulu wamtogole Kilisto wali Yelusalemu.

²⁷Wanogelwa kutenda vino, kweli walondigwa kuwatendela vino. Kwavija Wayahudi wawagwelela Wamhazi vinhu vao va muloho, na Wamhazi wolondigwa kuwagwelela Wayahudi motelo zao zowopata muulumwengu.

²⁸Avo nihaimambukiza sang'hano ino, na kuwavikizila kija kisangigwe, nosonga mwanza wa kuchola Sipania nibitila kumwenu.

²⁹Novitanga kamba niheza kumwenu, nokwiza na motelo bwando za Kilisto.

³⁰Ndugu zangu, nowayalalila mditwaga da Mndewa wetu Yesu Kilisto na mdinoge da Loho wa Mulungu, mwilumbe na nie mumgayo wangu mkunitambikila ha Mulungu.

³¹Tambikeni kamba nikomboligwe kulawa ha wanhu hawamtogole Kilisto ako Yudea, na kamba sang'hano yangu ako Yelusalemu itogoligwe na wanhu wa Mulungu wali hiko,