WALOMA 12:7-17

⁷kamba kusang'hanika, basi yasang'hanike, kamba kufundiza, basi yafundize,

⁸kamba kuwagangamiza wanhu, basi yawagangamize, kamba kuwasangila vinhu wanhu wayagwe, basi yawasangile na moyo unogile, kamba kuwalongoza wanhu, basi yawalongoze mkuiyoha, na kamba kuwonela bazi wanhu, basi yawonele bazi na moyo usamhuke.

⁹Noge sambidiwe da uzenzeleganye. Mkihile kija kihile, ila mkigoge kija kinogile.

¹⁰Muinogele wenyego kwa wenyego kubitila noge da udugu. Na mkiihishimile wenyego kwa wenyego.

¹¹Sambimdonhe kuinanahila nhamanila yenu, ila muiyohe muloho mkumsang'hanila Mndewa.

¹²Deng'heni mditamanilo, mwazaganye mmigayo, na mtambike mazua gose.

¹³Muwasangile vinhu wanhu wa Mulungu wali wakumbulu, na mazua gose sulukileni kuwatendela wahenza ganogile.

¹⁴Wamotezeni awo wowagaza mweye. Wamotezeni, na sambimuwadukumize.

¹⁵Deng'heni na awo wodeng'ha, na lileni na awo wolila.

¹⁶Muilumbe mwemwe kwa mwemwe. Sambimuitope, ila igogeni na wanhu wali hasi yenu, sambimgelegeze kamba muna nzewele ng'hani kubanza vija vumuli.

¹⁷Sambimmulihe munhu yoyose dihile kwa dihile, ila gezeni kutenda ganogile hameso ga wanhu wose.