Walawi 24:2-19

²“Walajize wanhu wa Isilaeli wakigalile mafuta ganojile ga mzeituni kwa chiwalo cha chenje leka chenje acho chilutilile kwaka chila mhela.

³Aluni kowika chenje acho mgati mwa alyo ihema lya Nguluwi, kunze kwa ipaziya lya isanduku lya ilagano leka chiwe chikwaka kwaluchila matinazo mbaka mitondo hali Mkulu Nguluwi chila mhela. Ali ndo ilajizo lya kuliwinza mazuwa gose kuli lulelo lwa hemwe.

⁴Kowika avyo vyenje kuli chinhu cha kuwichila vyenje cha zahabu inojile, viwe vikwaka chila mhela hali Mkulu Nguluwi.

⁵“Uhole utimbo unojile kilo makumi meli na gane na kuteleka mibumunda kumi na mili.

⁶Mibumunda ajo jowichigwa hali msitali wa keli mchanya mwa chisaga cha zahabu inojile hali Mkulu Nguluwi, chila msitali mibumunda sita.

⁷Chila msitali kowika ubani, leka kuwe kukumbuchila kwa mibumunda ajo, nhambiko ya kumlavila Mkulu Nguluwi kwa chiluli.

⁸Chila Zuwa lya Kwesela Aluni koiwika goya kuli honhu hali Mkulu Nguluwi kwa chiwalo cha wanhu wa Isilaeli kota ilagano lya mazuwa gose.

⁹Aluni na walelwa wa heye weng'ha waliyeng'ha ndo wangukundigwa kulya mibumunda ajo. Wolya kuli honhu hanji helile kwa vila ajo ndo jelile ng'hatu kuli nhambiko zilingulavigwa kwa Mkulu Nguluwi kwa chiluli. Ayi ndo hachi kwa hewo mazuwa gose.”

¹⁰Zuwa limwe nakulawila kilewa ako kuli kambi hali Muisilaeli yumwe na msongolo yumwe wa mamo Muisilaeli yalinguchemigwa Shelemoti, ila mhaza nayali Mmisili.

¹¹Hamba yula msongolo Muisilaeli yawele mayake nakachemigwa Shelemoti, mhinza wa Dibuli wa nhanzi ya Dani, nakalibeza na kulipanjila itagwa lya Nguluwi. Lelo wanhu nawamhilika msongolo kwa Musa,

¹²nawamibata mbaka aho hoyogubulilwa vyoyalingugana Mkulu Nguluwi.

¹³Hamba, Mkulu Nguluwi nakamlonjela Musa,

¹⁴“Mumlavye kunze mwa kambi ayo msongolo yapanjile, na wala weng'ha wamhuliche yopanjila wawiche moko ga hewo mchanya mwa mutwi wa heye, na Waisilaeli weng'ha wamkopole kwa kumtowa kwa maganga.

¹⁵Nagwe uwalonjele Waisilaeli kota munhu yoneche yompanjila Nguluwi wa heye yanguganigwa yagazigwe kwa chiwalo cha gehile ga heye.

¹⁶Munhu yoneche yawe mwenyeng'haye ama mjenzi yawele ngulibeza itagwa lya Mkulu Nguluwi, Waisilaeli weng'ha womkopola kwa kumtowa kwa maganga.

¹⁷Munhu yoneche yalingumkopola munhu yunji, yangumlapa na heye yakopoligwe.

¹⁸Munhu yoneche yalingulikopola igongolo yangumlapa yahilule chinhu kwa chiwalo cha kukopola ako, ukomu kwa ukomu.

¹⁹Munhu yoneche yomlumiza munhu wa habehi na heye, yangumlapa na heye yalumizwe kota vyoyamlumize munhu wa habehi na heye,