Waiwia 2:16-38

¹⁶Pwe iei mepukat, me lolok ren jaukop Ioel:

¹⁷Kot kotin majanier: Ieteten me pan wiaui ni imwilan ran akan: I pan kamoredi Nen i pon uduk karoj. Noumail ol o li akan ap pan deideikop, o noumail manakap akan pan kilekilan kaudial akan, o noumail di ma kan pan auramenda;

¹⁸A ni ran oko I pil pan kamoredi Nen i pon ai ladu o lidu kan, rap pan deideikop.

¹⁹O I pan kapwareda manaman akai nanlan pali poa, o kilel akai nin jappa pali pa: Nta, o kijiniai, o adiniai;

²⁰A katipin pan wukila rotorotala, a jaunipon pan wiala nta mon ran lapalap o linan en Kaun o pan pwarado.

²¹O a pan wiaui ma meamen likwir on mar en Kaun o, a pan dorela.

²²Ari ol en Ijrael, komail ron kajoi pot et: Iejuj men Najaret Ol amen, me Kot kotin kilele kidar nan pun omail dodok kelail akan o manaman akan, o kilel akan, me Kot kotin wiaki i nan pun omail, duen me komail pein aja;

²³I lao panalar duen kupur en Kot erpit, komail ap jaikikidi pa en me japun kan, ap pajuredi on ni lopu o kamatalar.

²⁴I me Kot kotin kaiajadar, ni a kotin lapwada jal en a matala, pwe a jota kak on, en kolekol i.

²⁵Pwe Dawid majanier duen i: I ninar Kaun o potopot mo i; pwe a kotikot ni pali maun i, pwe i ender mokid.

²⁶I me monion i peren kida, o lo i popoleki; pil uduk ai pan kamoledi ni kaporopor.

²⁷Pwe re jota pan kotin likidmaliela nen i nan wajan mela pil jota kotin mueid on, me japwilim ar Jaraui o pan mor pajan.

²⁸Re kotin kajanjale on ia er al en maur akan; re pan kotin kadir kin ia la popol mon jilan ar.

²⁹Ri ai kan mueid on ia, en aima padaki on komail duen jam atail Dawid, me pil matalar o jaredier, o japwilim a joujou mi re atail lao lel ran wet.

³⁰A jaukop amen, ap mani, me Kot kotin kaula inauki on i, me kijan wa men pan kaipokedi pon mol a.

³¹Ari, ni a mamani duen en Iejuj a iajada, ap kotin majani, me a jota likidmalielar nan wajan mela, o pil uduk a jota mor pajan.

³²I Iejuj, me Kot kotin kaiajadar, kit karoj jaunkadede en mepukat.

³³A lao japwilekidar pali maun en Kot, a kotin aleer jan ren Jam, en kapwaiada inau duen Nen jaraui, ap kotin kamoredi, me komail kin udial o roneron.

³⁴Pwe kaidin Dawid, me kotidala nanlan kan, a pein i kotin majani: Kaun o kotin majani on ai Kaun: Mondi ni pali maun i!

³⁵I lao wiaki om imwintiti utipan nä om akan.

³⁶Ari, men Ijrael karoj en aja melel, me Kot kotin kajapwilada i, en Kaun o Krijtuj i Iejuj me komail kalopuelar.

³⁷Irail lao ronadar met, ap lel on nan monion arail, re ap indai on Petruj o wanporon tei kan: Ri at oko, da me jen wiada?

³⁸Petruj ap majani on irail: Komail kalula, o amen amen en paptaij on ni mar en Iejuj Krijtuj, pwe dip omail akan en lapwada. A komail pan tunole Nen jaraui.