Waiwia 21:15-35

¹⁵Murin ran pukat je ki pena at kapwa kan o daululan Ierujalem.

¹⁶A tounpadak en Jäjarea kai pil ian kit, o re ukado Mnajon men Jipern, tounpadak ma amen, me je pan kairu re a.

¹⁷Kit lao lel Ierujalem, jaulan kan kajamo kit popol.

¹⁸A mandan ran o Pauluj ian kit kotila ren Iakopuj o jaunkoa karoj pokon pena waja o.

¹⁹A lao ranmaui irail, ap kotin kajokajoia meakan, me Kot kotin wiai on men liki kan ki a dodok.

²⁰Irail lao ronadar mepukat, re ap kapinaki Kot indai on i: Ri at, kilan men Juj me totoia me ian pojonlar, o irail karoj kin kajampwaleki kapun o.

²¹Nan a loki on irail duen komui, me dene komui kin kaukawewe men Juj, me dondole men liki kan, ren kajela Mojej o padapadaki, re ender jirkomjaij jeri kan, o pil der dadaur tiak kan.

²²A iaduen, pokon pan wiaui, o re pan ronada, me komui jamador.

²³Ari, komui pan wiada met, me je pan indai on komui: Ol pamen mi re at, me ar inau mia.

²⁴Uk irail ada o kamakelekel komui da ianaki irail, o pwain irail pwe mon arail en jeijei, o karoj pan kilan, me likam pot, me re roner duen komui, o me komui pil kin kapwaiada kapun o.

²⁵A duen me pojonlar jan ren men liki kan, je intiniedier o kujoned edar, me ren der kapwaiada mepukat. A iet eta: Ren liki jan uduk me mairon on kot likam, o nta, o man mopelar, o nenek.

²⁶Pauluj ap kotin ukada ol oko, a manda a kamakelekelada pein i ap ian irail kotilon on nan im en kaudok o kotin kajaledar ran en arail kamakelekel, lel mairon en amen amen wiauier.

²⁷A ran iju lao koren ion nikier, men Juj en Ajien ap kilaner i nan im en kaudok o, rap kamoromoroda aramaj karoj o jaikidi i,

²⁸Weriwerada indada: Ol en Ijrael, komail jauaja, iet aramaj o me kin kaukawewe on karoj waja karoj, ren palian Juj akan, o kapun, o waja kij et, o a pil kalua don nan im en kaudok men Krik kai, o kajaminela waja jaraui wet.

²⁹Pwe maj o re kilanadar, me Tropimuj men Epijuj ian i nan kanim o, re ap kiki on, me Pauluj kalualon on i nan im en kaudok.

³⁰A kanim o moromoronada kaualap o aramaj akan tan pena. Re ap jaikidi Pauluj o waike jan i nan im en kaudok o, a wanim ko ap madan ritidi.

³¹Irail pan kamela i, a ron ap lel on jaumaj en jaunpei kan, me Ierujalem moromoronda.

³²I ari madan ukada jaunpei o jaumaj akai ap tanadi won irail. Ir lao kilan jaumaj o jaunpei ko, re ap jolar woki Pauluj.

³³Jaumaj o ap kai on, koledi i majani, i en jalikidi jal mata riapot, o idok: Ij i, o da me a wiadar?

³⁴A akai jan nan pokon o weriwer wiada eu jon en lokaia a akai eu. A ni a jota kak weweki, me re moromoronki, ap majani, a en wijikelan nan im en jaunpei.

³⁵A lao lel on kandake o, jaunpei ap wewa i, pweki pokon o koiden pena i.