Waiwia 17:3-17

³A kotin padaki o kajaleda, me Krijtuj udan kalokolok o iajada jan ren me melar akan, o me Iejuj men et, me i kawewe on komail, me Krijtuj.

⁴O akai irail me pojonla ap waroki on Pauluj i Jilaj, o pil men Krik lelapok me toto, o li jaupeidi me kaidin me malaulau.

⁵A Juj oko pepeirindar, ap ukada ol jued kai, o kapokon irail pena o kapeida kanim o, o kapil pena im en Iajon, pwen wa ira don pokon o.

⁶Irail lao jo diar ira da re ap waikelon don jaumaj akan en kanim o Iajon o jaulan kai indada: Mepukat kamokimokidadar jappa, nan ira pil pwara dor met.

⁷A Iajon kajamo ira er, o irail karoj kin tiakedi majan en Jija ni ar katitiki, me dene amen Nanmarki Iejuj.

⁸Irail ari kamakaradar aramaj o jaumaj akan nan kanim o ni ar ronadar mepukat.

⁹Irail lao aleer jan ren Iajon o me tei kan ar kapwa, re ap kadar ira la.

¹⁰A jaulan kan madan kadarala Pauluj i Jilaj ni pon Peröa. Irail lao pwarado, ap kotilon on nan jinakoke en Juj oko.

¹¹Mepukat me mau jan irail nan Tejalonik, pwe re pitipit aleer majan o pereperen kalelapokki kijin likau ni ran karoj, ma melel mepukat.

¹²Ari, me toto irail pojonlar, li o ol en Krik kan kijan jaupeidi me toto ian.

¹³A men Juj en Tejalonik ko lao roner, me Pauluj pil padapadak nan Peröa majan en Kot, irail ap kodo o kamakaradar aramaj akan.

¹⁴A jaulan kan madan kadarala Pauluj, dene a pan kotidila ni oror. A Jilaj i Timoteuj mimieta waja o.

¹⁵O me pelikid Pauluj akan kalua i lel Aten. Irail lao aleer kujoned on Jilaj o Timoteuj, me ira en pitipit ko don i, re ap jamalar.

¹⁶A ni en Pauluj a kotin auiaui ira nan Aten kupura ap ola ni a majani nan kanim o dikedik en ani rok ia.

¹⁷I ari kotin padaki on Juj oko o me toun kaudok kan nan jinakoke pil wajan net, me a kotin padaki on, me kin pokon pena waja o ni ran akan karoj.