Waiwia 16:8-39

⁸Irail lao daulul lar Mijien, ap kodilan Troaj.

⁹A kajanjal eu pwara don Pauluj ni pon: Ol en Majetonien amen me uda, poekipoeki i indada: Kom koti don Majetonien, jauaja kit!

¹⁰A lao udialer kajanjal o, kit madan kolan Majetonien, pwe je ajaer, me Kaun o kotin molipe kit, en kolan padaki on irail ronamau.

¹¹Kit ari majel wei jan Troaj o inen won Jamotrajien, a manda lel on Neapolij,

¹²O jan waja o lel Pilipi, kanim lapalap ni apali en Majetonien, me kijan jap en men Rom. Kit ari mimieta nan kanim o ran akai.

¹³Ni ran en japat je koiei jan kanim o, kolan pon pilap pot, waja re kin kapakap ia. Kit ari mondi o kawewe on li akai, me kin pokopokon waja o.

¹⁴A li amen ad a Lidia, men jaunet en likau waitata, men Tiatira amen, me kin kaudok on Kot. Nan i me roneron kit. A Kaun o kotin ritinada monion i, pwen apapwali meakan, me Pauluj majanier.

¹⁵I o a penainai lao paptaijelar, ap poeki re at indada: Ma komail kajau ia da, me i pojonlar Kaun o, komail pan pedelon on nan im ai o kotikot ia; i ari nidinide kin kit.

¹⁶Kadekadeo ni at kolan kapakap lidu amen, me kin wun ani, ap tu on kit, me kin kare on moni toto ren a jaumaj kan ki a wun ani.

¹⁷I me idauen Pauluj o kit weriwer indada: Aramaj pukat me japwilim en Kot lapalap ladu ko, me kin padaki on komail duen al en maur.

¹⁸A mepukat a wiadar ran toto. A Pauluj kupurola kaualap ap kotin jaupeila majani on nen o: Ni mar en Iejuj Krijtuj me i indai on uk, keredi jan i! I ap keredi jan ni auer ota.

¹⁹A jaumaj akan lao diarada, me jolar kaporopor en ar men wiaki moni, ap jaikidi Pauluj o Jilaj, wai ira lon don wajan net ren jaumaj akan.

²⁰O kalua ira wei ren jaunkapun kan katitiki: Aramaj pukat kijan men Juj kin kaokaoe atail kanim,

²¹O padapadaki tiak me jota pun je en ale de wiada, pwe kitail men Rom.

²²Aramaj karoj ap uda por on ira, o jaunkapun ko dere jan ara likau kan o kapi, ren woki ira.

²³Irail wokiwoki ira pan pak toto, rap kaje ira di nan imaten o kapiedi jilepa o, en kateneten ira di.

²⁴A lao aleer kujoned wet ap kaje ira di on nan waron, en imaten o jaliedi aluwilu ’ra nin tuka kai.

²⁵A lao ni ailep en pon Pauluj o Jilaj kapakap o melkaka on Kot, o me jalidi ko roneron ira,

²⁶A jap o madan rerereda, kajukajuk en imaten mokidedar, wanim ko ap madan ritida o ar jal akan karoj lapwadar.

²⁷A jilepan imaten lao pirida jan a mair o kilan wanim ko ar ritidar, ap napekida a kodlaj o, a pan kamela pein i, pwe a kiki on, me jalidi ko me pitila.

²⁸A Pauluj kapitie laudeda majani: Kom der kame uk ala, pwe kit karoj mia.

²⁹A ap idok lamp eu o tan rerer o dairukedi jan Pauluj o Jilaj.

³⁰O wa ira wei jan indada: Main ko, da me i en wiada, pwen kamaurela?

³¹Ira ap majani: Pojon Kaun Iejuj, a koe o toun im om pan maurela.

³²Ira ari kawewe on i o toun im a karoj majan en Kaun o.

³³I ari uk ira ni auer ota ni pon o, widen ara pwal oko. I o na kan karoj ap madan paptaijelar.

³⁴I ap kalua won ira nan im a, ap kida mo ’ra kijin mana, o peren kidar a pojonla Kot, i o ian a kan.

³⁵A lao ran pajan, jaupeidi ko poronela papa ko indada: Lapwada aramaj pukat!

³⁶Jilepan imaten o ap kaireki Pauluj majan pukat indada: Jaupeidi ko me ilakido, koma en lapwada. Koma ari kotila popol

³⁷A Pauluj kotin majani on irail: Irail janjal kadeike kit adar o woki kit men Rom, ap kaje kit ale nan imaten, a met re men kadar kit ala jo janjal. A jo, irail en pein kodo, wa kit wei.

³⁸A papa ko kaireki jaupeidi kan majan pukat. Irail ap majakadar ni ar ronadar, me ira men Rom.

³⁹Irail ari kodo, poeki re ’ra o wa ira la jan, o nidinideki ira, en japal wei jan nan kanim o.