Waiwia 13:20-42

²⁰O murin met a kotiki on irail jaunkapun kan irerokedo par papuki limeijok lel on jaukop Jamuel.

²¹A jan ni anjau o re inon ion nanmarki amen. Kot ap kotiki on ir Jaul nain Kij, ol en kadaudok en Peniamin amen, jaunpar paeijok.

²²A lao kajapokelar, ap kotiki on irail Dawid, pwen nanmarki, me a pil kotin kileledier majani: I diaradar Dawid nain Ieje, ol amen duen inon en monion i, me pan wiada injen ai karoj.

²³Jan nan kadaudok a Kot kotikido Iejuj, pwen Jaunkamaur pan men Ijrael, duen japwilim a inau.

²⁴Murin Ioanej a kotin padaki on men Ijrael karoj duen paptaij en kalula mon a kotido.

²⁵A Ioanej lao kapwaiada japwilim a dodok, ap kotin majani: Ij me komail lamelame me nai? Kaidin nai i. A kilan amen kotido, kijin jal en japwilim a jut i jowar en lapwada.

²⁶Komail ol o ri ai kan, komail kadaudok en Apraam, o meamen me majak Kot re omail, padak en kamaur pot et pakadara don komail.

²⁷Pwe me kaukaujon Ierujalem o ar jaumaj akan kapwaiada kokop en jaukop akan, me kin wadawad ni japat akan karoj ni ar kadeikada i, pweki re jaja i.

²⁸A jota me re diaradar, me a kak kamata kila. Ari jo, re poeki ren Pilatuj, me a en kamatala i.

²⁹Irail lao kapwaiada karoj, me intinkidi i, re ap kidi jan i nin tuka o kidi i nan joujou o.

³⁰A Kot me kotin kaiajada i jan ren me melar akan.

³¹O ran toto me a kotin pwara don me ian i kotilan Ierujalem jan Kaliläa, me japwilim a jaunkadede on aramaj akan.

³²A kit padaki on komail ronamau duen inau on jam atail akan,

³³Me Kot kotin kapwai on kitail nairail jeri kan, ni a kotin kaiajadar Iejuj duen a intinidier nan pjalm kariau: Koe nai Ol, I kanaitik uk adar ran wet.

³⁴A duen a kotin kaiajada i jan ren me melar akan, pwen der mor pajan, i me a kotin majanieki met: I pan ki on komail pai melel en Dawid akan.

³⁵I me a pil majanieki ekij waja: Re jota pan kotin mueid on, japwilim ar Jaraui o pan mor pajan.

³⁶Pwe Dawid lao kapwaiada a papa on kupur en Kot ni a anjau, ap jaimokelar, a jaredier impan jam a ko, ap mor pajan.

³⁷A i me Kot kotin kaiajadar, nan a jota kotin mor pajan.

³⁸Ari ri ai kan, komail aja, me lapwa pan dip akan ren men et kin kaloki on komail.

³⁹A me pan pojon i, nan i me punalar jan meakaroj, me komail jota kak pun kila kapun en Mojej.

⁴⁰Ari, komail kalaka, pwe a depa pwai on komail, me jaukop akan majanier:

⁴¹Kilan, komail me kin lalaue, puriamuiki o joredi, pwe I pan wia dodok eu ni omail anjau, me komail jota pan kamelele, ma amen pan kajokajoi on komail due.

⁴²Irail lao pedoi jan ap poekipoeki, kajoi pukat en kalok on irail ni ran en japat kokodo.