Waiwia 10:25-46

²⁵A Petruj lao pedelon on, Korneliuj ap tu on i o pupedi on ni aluwilu a o kaudok on i.

²⁶A Petruj kauada i indada: Uda, pwe nai pil aramaj amen.

²⁷A ni ara majan pena, ap pedelon on, diaradar me toto momod pena.

²⁸I ari majani on irail: Komail aja, me a jota inen, ol en Juj amen en pat on men liki amen de kola re a. A Kot kotin kajale on ia, i ender mamaleki de jauteki amen aramaj.

²⁹I me i koki do o jo peikajal ni ar idok ia. Ari, i men kalelapok, da karep en omail eker ia do?

³⁰Korneliuj ap majaniada: Mon pon pa pon nai kaijejol lel auer wet. A ni klok duau i kapakap nan im ai. A kilan, ol amen me kot mo i, mi nan likau linalin,

³¹O majani: Korneliuj, om kapakap me pwaida, o om koleir leler kupur en Kot.

³²Ari, ilakilan Iope, pwe Jimon me pil ad a Petruj, en kodo. A kakairu nan im en Jimon jaun wia kil en man, me jal on jed. A lao pwarado, a pan padapadaki uk.

³³Nai ari pitipit ilakilan komui, a meid mau omui pwarador. Ari iet kit karoj janjal mon Kot, pwe jen ron meakan, me Kot majani on komui.

³⁴Petruj ap kotiki pajan jilan i indada: Melel, i ajaer, me Kot jota kin kotin lipilipiliki aramaj,

³⁵A nan jap karoj meamen majak i o wiawia me pun, nan i me konekon re a.

³⁶Majan o me a kotin kadara don men Ijrael, en kaire kin irail popol ren Iejuj Krijtuj. (Nan i me Kaun pan meakaroj).

³⁷Komail aja majan me kalok jili me tapidar nan Kaliläa lel Iudäa pon murin paptaij, me Ioanej wiada padak due.

³⁸Duen en Kot a kotin keiekier Iejuj en Najaret Nen jaraui o manaman, me kotin kakan jili wiawia mau o kakeladar me tanwar en tewil, pwe Kot kotin ieian i.

³⁹A kit karoj me jaunkadede en meakaroj, me a kotin wiadar nan jap en Juj akan o pil Ierujalem, me re pajuredi on nin tuka o kamatalar.

⁴⁰Nan i me Kot kotin kaiajadar ni ran kajilu o kajaleda i.

⁴¹Kaidin on aramaj karoj, pwe on jaunkadede kai, me pilipildar ren Kot, kit me ian i jak o urak murin a iajadar jan ren me melar akan.

⁴²I ari majani on kit, jen padapadak on aramaj o kadede melel, me i, me Kot kotin piladar, pwen Jaunkapun pan me maur o me melar akan.

⁴³A jaukop karoj kin kadede duen i, me dip en ir karoj, me pojon i, pan lapwada pweki mar a.

⁴⁴A ni Petruj kotikida majan pukat Nen jaraui ap moredi pon karoj, me roneron padak o.

⁴⁵A me pojon akan, kijan jirkomjaij, karoj me ian Petruj pwarador, puriamuiki, me Nen jaraui pil moredi pon men liki kan.

⁴⁶Pwe re ronadar ar lokaia kida nil toror kapina Kot. Petruj ap majanier: