Vitendo 2:1-23

¹Paifikire suku ya sherehe ya Pentekoshiti, piya wakijumulana.

²Kwa mpunde noure, ikisikirikana shauti kulawa binguni, kamba vyaivuma mepo nyingi kanguvu. We! Mepo ijala nnyumba mwawekare mure fo!

³Na vikilawirira vinu vyakulanda malulimi a moto akawanyika, akiwesukira kila mmoja.

⁴Piya ikiwejala Roho Takatifu, wakanza kusowera luga nyengine, kwa uwezo wa Roho Takatifu.

⁵Yerusalemu wákiwapo Mayahudi, wakuwajibu mambo a Mwenyezimungu, wakilawirira kila inti za ulumwengu.

⁶Paasikirikane namalove wa shauti za wanu, wanu wajire ware wakijumulana nopare. Wakifazaika kwa kuwa kila mmoja akisikira kwa luga yake yaapongoreriwe.

⁷Ewo washanga na watajabu, wakamba: “Paa, namunani? Wanu‑wa piya waGalileya, sinovyo?

⁸Sambi, iwa mwaja? Ofwe kwa kila mmoja asikiraja kwa luga yake yaapongoreriwe?

⁹Ofwe tiwa wanu wa inti za Pariti, Medi, Elamu, Mezopotamiya, Yudeya, Kapadokiya, Pontu, Aziya,

¹⁰Furujiya, Panfiliya, Miswiri, upande wa Libiya karibu ya kaya ya Kireni, pamoja na wayeni wakulawa Roma.

¹¹Mayahudi na wengine wakubali dini ya kiyahudi, wengine walawa Kereta, na wengine walawa Arabiya. Piya-fwe tisikira kwa kila moja luga yake, ewo wakisowera vinu vikulu vyaajabu vyaakunishe Mwenyezimungu. Mwaja?”

¹²Piya washanga na watajabu, wakidairiyana watupu: “Noci kinu‑ci, mana ake kinani?”

¹³Fala wengine wakiwakejeli, wakamba: “Ware warewa!”

¹⁴Peduru akilamuka pamoja na mawalii kumi na moja ware, na kwa shauti ulu akamba: “Umwe Mayahudi na piya muri kwikala Yerusalemu, vijiwikane kwenu. Tengani masikiro‑yo musikire canisowera.

¹⁵Ewa wanu‑wa awarewire, kamba umwe vyamuri kudanizira kamana eyi novi ora, ingari namapema!

¹⁶Kwasa javyo, evi ndi vire visemiwe julu ya nabii Yoweli:

¹⁷‘Mwenyezimungu kasema javi: Vikuja kukuna suku za mwinsho, Roho yangu niwatawanyira wanu piya nroho zawo. Wanenu, waka na walume, wakuja kubushuru, wanemba wakuja kuwa na ruhuya ya mawoni, na wakulungwa wakuja kulota.

¹⁸Kweli-kwelini, watwana wangu, waka na walume, nozo suku‑zo Roho yangu niwatawanyira, newo wakuja kubushuru.

¹⁹Nikolota mambo a matajabisa julu binguni, na pansi muardhi nikolota alama: ya damu, ya moto, na ya mawingu a rosi ra kwinukala pi!

²⁰Juwa rikwinukala pi na mwezi ukuwa mweundu pyũ kamba damu, kábula sainafika suku ulu yakutukuziwa Mwenye.

²¹Na itakuwa kila mwenyé kutaja zina ra Mwenye Insa, avushiwa.’ ”

²²Peduru akizidi kusowera, akamba: “Umwe waIziraeli, sikirizani ewu usowezi‑wu: Insa nNazareti ákiwa mwananlume akikishiwe na Mwenyezimungu mbere yenu, kwa maajuza, matajabisa, na alama zaakunishe Mwenyezimungu julu yake kati yenu umwe, kamba vyamwijiwe.

²³Eyu munu‑yu, kwa sababu ya mpango kamili wakusudiye Mwenyezimungu na wijiwifu wake tangu mida, kaperekiwa mmakono mwa wanu sawana shariya wangomezera pansalaba. Iye mumulaya.