Vitendo 13:31-49

³¹Suku nyingi zawenye, kawalawirira ware wampereke kulawa Galileya kuja Yerusalemu. Na nowo sambi‑pa ndi mashahidi wake mbere ya wanu wa Iziraeli.

³²Nofwe tankukwerezani Habari Ngema kuwa tamaa yawâpewe wababu zetu,

³³noyo tamaa‑yo Mwenyezimungu katimiza kwetu ofwe, ujukulu wawo, kwa kunfufula Insa. Kamba vyavyandikiwe nZaburi yapiri: ‘Uwe kuwa mwanangu, mwanzo wa rero omi niwa wawayo.’

³⁴Ndi ntamana kuhusu habari ya kufufuka ka Insa, Mwenyezimungu kakikisha kuwa mwiri wake aushubutu kuvunda. Iye kasema javi: ‘Nukutenderani mambo takatifu kwa tamaa kamili zanîmpere Daudi.’

³⁵Ndimana mahala pengine iye kaamba javi: ‘Uwe Ntakatifu wako aumwasa kuvunda nkaburi.’ ”

³⁶Paulu kasema tena: “Kusema kweli, Daudi kafwa bandi ya kutumika vyanuwiye Mwenyezimungu kati ya kizazi cake. Nakisa iye kazikiwa pawazikiwe wababuze, na kavunda.

³⁷Fala mwiri wa ire afufuriwe na Mwenyezimungu, aavundire.

³⁸Kwa javyo, jamaa zangu, ijiwani kuwa julu ya noyu‑yu, mwankwereziwa habari ya kuswamiiwa madambi enu. Julu yake iye, piya wenye kumwamini wavushiwa.

³⁹Kusema kweli, ewo awavushiwa julu ya shariya ya Musa.

⁴⁰Basi, more-moreni visukukuneni kamba vyawandike minabii, wakamba:

⁴¹‘Onani umwe, wenye kukejeli! Mususuka, na mupoteya, konta suku ndi suku nukutenderani kinu, umwe amushubutu kukubali, anta pawepo munu wakukwerezani.’ ”

⁴²Pawalawire Paulu na Barinaba, wanu ware wakiwatafadali, wakamba: “Sabadu ija‑yo, musikose kutereza tena nowu usowezi‑wu.”

⁴³Pawesire kutawanyikana pasinagoga pare, Mayahudi wengi pamoja na wanu wengine waminire dini ya kiyahudi, wanfulata Paulu na Barinaba. Ewo wakisowera nawo, wakiwataya niya iwazidise kuwa nkati ya rehema ya Mwenyezimungu.

⁴⁴Paifikire sabadu nyengine ire, aâbakire munu, wanu wengi nkaya mure wajumana kusikira habari za Mwenyezimungu.

⁴⁵Mayahudi, pawawawonire wanu kuwa wengi, wanza kuwatendera wiyana, wakinkaidi Paulu kuno wakikufuru.

⁴⁶Fala Paulu na Barinaba, kwanguvu wakiwambira: “Iwa lazima usemi wa Mwenyezimungu kwanza mwambiriwe umwe. Falakini kwa kuwa mukatala na mukolota kuwa amujuzi kuwa na mainsha a milele, basi, tilawa tuka kuwereza wanu Sawari-Mayahudi.

⁴⁷Kamana Mola ndi vyaatamurire javyo: ‘Omi nukutula kuwa nlangaza wa Sawari-Mayahudi, ipate wanu ulumwengu nzima‑wu wavushiwe.’ ”

⁴⁸Sawari-Mayahudi, pawasikire habari zire, watenda radi na watukuza usemi wa Mwenyezimungu. Basi wakubalire ndi ware watondoriwe wawe na mainsha a milele.

⁴⁹Na usemi wa Mola ukereziwa inti ire piya.