Uyuhana 5:22-46

²²Acco mada hungo un titoi hem anime ba madi ceki imum atari ti vana tini vat.

²³Barki kodevi manonziko vaname, kasi acco me sadi nonziko vana me ba mazo me uni nonziko acco me ini.

²⁴Ine ini mabuka shi, vat desa madi kunna tizetum manya kadura nan desa matumam, mazin nu venke uzatu binani. Ada hunguko me tittoi ba barki mamu hangirka iwono, ma hana nan nu venke.

²⁵Mabuka shi uhaniya u'eze wamu aye sa andesa wawijo wadi kunna gmirang nivana asere anu kunna me a wa kem uvenke.

²⁶Kasi acco me sa me mani nitin nu venke animani ma wuna vaname macukuno nitin nu venke.

²⁷Makuri manya me nikara nu inko utize barki me vana unuboo mani.

²⁸Kati ikunna sas tiye ti eze tige sa andesa warani amucau wadi kunna tize tumeme.

²⁹Wakuri wasuri desa wuza katuma karere wadi hiri andesa wawuza katuma kazenzen, wadi hiri u hira u weki utize.

³⁰Indake in wuzi ire imum ni iri sisii um, kasi rep imum be sa in kunna animani in wesi tize uwesi utize tume tire-retini barki azo imum iriba in iniinzini euza imum ide be sa tumam.

³¹Inzin nubezi nicce num ubezi unicce num wacukuno irimum ini ba.

³²Un tize ani nicce num marani sas mi in rusa tize me sa mazin anicce nume tire-retini.

³³Yatumi ahira a yahaya meme mabuki kadura.

³⁴Vatin anemi tize me sa ma tonnon azo ti nuboo tini tizi ba. Mi mabuka anime bati i kem ubura uni.

³⁵Yahaya upitila uni sa uzin inu raa nan ma saa ya hem unu guna iwu aburu arom gbardang anyimo aku ganiya cingilin.

³⁶Abanna me tize me sa in boo shi ti keki ti yahaya in nikara barki katuma sa acco manyam immari, kane karu ka sa in zin nu wuzame, kane karu ka di susom ama saa unu guna acco am mani matumam.

³⁷Acco me sa matumam me cangi mabuka tize anicce num, ite shi ni gmirang ni meme nyani irusi uzina umeme.

³⁸Tize timeme tacukono amuriba mushi me ba, barki ya nyare shi in kadura ka desa ma tumam.

³⁹Izi nu gungizino utize ta sere, shi ibassa anyimo ati ne tini idi kem uvenke uzatu umarsa, ani me tine tini ta sabi ta susom am saa.

⁴⁰Vat anime ya nyare shi u aye ahira am ikem uvenke.

⁴¹In da uyaram tinanu ahira anabu ba.

⁴²Ayimo ani me in rusa shi izo shi unu hem Asere a mu riba mushi me.

⁴³Mi ma aye in niza nacoo om iyenne, shi be ya nyare mi a gusi uyye mani madi eh in niza ni cicce nume, me mani idi kabin me.

⁴⁴Idi wuzi aneni ihem kadura shi sa i uyinza acce ashi tina nu ugomo asere mani una tinanu cas ya gaa shi a nyara ume?

⁴⁵Kati ibassa indi han in tize tishi me ahira acco unu hana in tize tishi me marani, me mani Musa. Unu me sa shi ibassan me.

⁴⁶A gusi ya hem in musa ida hem in mi barki abanga am ma nyentike ani.