Uva Maara Koqera 30:11-24

¹¹Vokiaka nái qokavarara tiha, Kotiva ni qoraiqama kaarire, tivakeha kia nái nokavarara koqeve tiva nimite variara.

¹²Vokiaka tiha, Tenavu koqe okaraqai auti vauraukave, ti variavarovata, qora okaravano anomakero vika avu aato qoraiqama kaimanta variara.

¹³Vokiaka nariara tiha, Tenavu koqe vaiinti nahentive, tivakeha vokiaka taveha vikara qumina vaiinti nahentive tiha nunurama nimite variara.

¹⁴Vokiaka aarai vaireva, paipeve ehaive voqaara vaimanta vika maa vataraqaa vehi vaiinti nahenti qoraiqama nimiteha vika taiqa kareka auti variara.

¹⁵Tuvoqavano taara no vataava vaimanta vitanta tiha, Voqavata voqavata timiane, ti variara. (Hiparu uva: tuvoqa raavuratanta tiha, voqavata voqavata timiane, ti variara.) Ho vo haika 4navuvano vaiha, ekaa vinavuka tiha, Kia te hoqamake varauro, ti variara:

¹⁶Qutu vuaka varia vatukavave. Naahiara/Qururaiqama vi nahentivave. Aahara vatavanove. Iha ite vaivave.

¹⁷Hauri are nena qorara qora uva tihara naaraihama amitera, nena nora uvavata kia irirora. Are mintirera, naantiara mati ne vai uvirika ai vaata naivaro kotikotivano ai avu vaurukero naanaro.

¹⁸Uva okara 4navu vaimanta kia te vira okara kankomake irunara:

¹⁹Memoravano virikanta ata vare vi ani vai okararave, memaruvano nora orivau vi ani vai okararave, sipivano nora namarivaura vi ani vai okararave, vaiinti muntukavano nahentiara vai okararave.

²⁰Vira naatavano vo qoraintintiro ni okarava maantimama vairo: Viva vikantiro nuvakero viraqaahairo namari tuntukero tiharo, Te kia qora okara auturo, ti vaira. (Hiparu uva: Te kara namake tenta no nunkake kia qora okara auturo, ti vaira)

²¹Qora okara 4navu vaimanta vira kaara vataini variaka aiqu kauqu ntiri ntiri i vaimanta variara:

²²Qumina kaiqa vaiintivano avuhainaa vaiintiqama viro ˻vaiinti nahentiqaa raqiki vai okararave˼, Kia avu aato vataava airi kara ne vai okararave,

²³Vaiinti kia antuqa arua nahentiva qorainti varai okararave, Kaiqa nahentivano nai nora nahenti vatuka varai okararave.

²⁴Inaara haika 4navu variavaro vi haikara avu aatovano uri aatarakero vaira: