Text copied!
CopyCompare
Anutu Sua Kini Potomaxana - Uraata Kizin Ŋgoŋana - Uraata Kizin Ŋgoŋana 2

Uraata Kizin Ŋgoŋana 2:14-29

Help us?
Click on verse(s) to share them!
14Petrus ziŋan zin ŋgoŋana laamuru mi ta timbotmbot, mi imaŋga na iso ma kalŋaana biibi. Iso: “Niom Yuda mi niom wal boozomen ta kombotmbot Yerusalem i, kuŋgun talŋoyom pio, mi nio ko aŋso yom pa mbulu tiŋgi ka uunu.
15Niom koso zin wal tiŋgi tiwin. Mi iŋgi zoŋ ise zen. Lak, winŋana sa, tiwinin pa mazwaana ta kembei? Som.
16Keleŋ. Mbulu ti ka sua, ta Anutu kwoono Yoel iso ta muŋgu kek. Mi iŋgi buri iur ŋonoono i. Sua ta kembei:
17Anutu iso: Indeeŋe mazwaana kaimer kana ma uraata tio iso ipet kat mat, na nio kola aŋkam Bubuŋoŋ ma isalakaala tomtom ta munŋaana men. To lutuyom bizin ma lutuyom moori bizin ko tiwe nio kwoŋ mi tiso kalŋoŋ pizin tomtom. Mi zin naŋgaŋ kaibiim ko tikeenetondo. Mi Anutu ko iswe koroŋ pakan pizin kolman ila miuŋana.
18Mi zin mbesooŋo mi mbesooŋo moori tio ta kembena. Indeeŋe mazwaana tana na, nio ko aŋkam Bubuŋoŋ ma isalakaala zin.
19Mi nio ko aŋkam uraata bibip ma ipet sala maŋaanaŋana, mi aŋkam mos mburanŋan isu toono tomini. Ko kembei ta siŋ, you, mi you kakoi ta buk ma ise i.
20Pa zoŋ kola iyaara mini som, mi lele zugut. Mi puulu mataana ko isiŋsiŋ. Uraata tana kola ipet muŋgu, mana nol biibi ki Merere be iswe mburaana ma ipet kat mat.
21Mi wal boozomen ta so titaŋroro Merere be iuulu zin, na ni ko ikamke zin ma timbot ambai.
22“Tana niom tomtom ki Israel, keleŋ sua tiŋgi. Uraata mburanŋan mi mos bibip ta Yesu ki Nasaret ikam la mazwoyom na, niom kuute lup kek. Uraata ta Anutu ipomboli ma ikam, ina iswe i kembei: Ni Anutu iŋgo i.
23Anutu, ni itunu ŋgar kini mi iur Yesu pataaŋa kek be ima nomoyom. Tanata niomŋan zin Rom kan tau titoto tutu som na, kupuni ma imeete sala ke pambaaraŋana.
24Tamen meeteŋana irao ikisi na som. Pa Anutu itatke i pa meeteŋana mburaana, mi iwiti ma burup ma imaŋga pa naala.
25Ka sua, Dabit iso ta muŋgu kek. Pa iso: Nio aŋre Merere imbotmbot kereŋ uunu totomen. Ni imbotmbot raama yo mi ikiskis yo. Tana kosa sa ko irao ikam yo ma aŋtop na som.
26Iŋgi tabe ikam yo ma leleŋ ambai kat, mi aŋso sua raama menmeen yo. Ŋonoono, nio ko aŋmeete. Pa nio tomtom toono koŋ. Tamen kopoŋ rru som. Iŋgi aŋmbotmbot mi aŋurur motoŋ pu men tau.
27Pa nu irao zem yo ma aŋmeete mi aŋsula Andewa be aŋbot na som. Nu irao zem mbesooŋo ku potomŋana ma ibuuzu na som.
28Nu patooŋo yo pa zaala ki mbotŋana mata yaryaaraŋana. Mi nu ko kam yo ma aŋbot su kerem uunu, mi kam ma leleŋ ndabok men.
29“O atoŋan mi tiziŋan. Nio leleŋ be aŋso kat yom pa tumbundu Dabit. Ni imeete ma titwi i ta muŋgu kek. Ma naala kini ta imbotmbot men kar ti.

Read Uraata Kizin Ŋgoŋana 2Uraata Kizin Ŋgoŋana 2
Compare Uraata Kizin Ŋgoŋana 2:14-29Uraata Kizin Ŋgoŋana 2:14-29