Uraata Kizin Ŋgoŋana 15:15-27

¹⁵Mi Anutu kwoono bizin tiso sua tamen tau. Pa tibeede sua ta kembei:

¹⁶Kaimer to aŋmiili mini. Toinabe aŋurpe ruumu ki Dabit ta borok su lene na, mi aŋpamender mini.

¹⁷Naso ipei ŋgar kizin tomtom pakan. To wal boozomen tau Yuda somŋan ta aŋroogo zin kek be tiwe leŋ, nako tikam kinkiini be tiute yo.

¹⁸Sua tiŋgi na, Merere kalŋaana. Itunu iswe ta muŋgu kek.”

¹⁹To Yems iso seeŋge. Iso: “Tana nio aŋre ta kembei: Zin wal tau Yuda somŋan mi iŋgi titooro lelen ma tiurla ki Merere i, iti irao tuur pataŋana biibi ise kizin sorok pepe.

²⁰Miso kembena, na iti bela tebeede ro tasa ila, mi tosotaara zin pa tutu iŋgoi tabe tito i. Tutu ta kembei: Kini ta tipakur zin merere pakaamŋan pa i, na zin irao tikan pepe. Mi siŋ mi buzur siŋŋana ta kembena, irao tikan pepe. Mi tiyaraama zitun: Kokena timolo ula ka tutu.

²¹Pa ta muŋgu mi imar na, tutu ki Mose ka tomtom bizin tirao karkari lup. Mi aigule potomŋana ta boozomen na, tiwatwaata tutu tana ilela lupŋana murin kizin Yuda.”

²²To zin ŋgoŋana ziŋan zin mboroŋan mi waen bizin ta boozomen ta timbot lupŋana tana, tilup lelen mi ŋgar kizin, mi tiur tomtom kizin pakan be tiwe kwon, mibe tigaaba Paulus mi Panabas ma ziŋan tisula pa Antiok. Tana tiur Yudas ta zaana toro Barsabas na, mi Silas. Pa ni ziru ta zin toŋmatiziŋ ki Krisi matan ise kizin.

²³Mi tiur ro ila kizin be tikam ma tila. Ro tana, tibeede sua ta kembei ise: “Niam ŋgoŋana niamŋan zin mboroŋan amkam aigule tiam ima piom toŋmatiziŋ tiam ta kombot Antiok, mi Siria, mi Silisia na. Niom ta Yuda som mi kuurla i.

²⁴“Niam taiŋgi amleŋ kembei tomtom tiam pakan tima, mi tiso sua pakan ta ikam yom ma leleyom ipata mi kakam ŋgar boozo. Tamen wal tana, niam amgo zin som.

²⁵Tanata amlup yam, mi niam ta boozomen amyok raraate men be amur tomtom tiam pakan ma tiwe kwoyam, mi amgo zin ma tima i. Mi Panabas ziru Paulus, tomtom kiti ru ta leleyam pizin kat na, ko ziŋan tima.

²⁶Ziru tana tizem kat zitun pa uraata ki Merere kiti Yesu Krisi, mi tiurur zitun ila zaaba kwoono pa ni zaana.

²⁷Tana niam iŋgi amgo Yudas ma Silas be tikam ro ti ma tima. Mi ziru ko tiso pa kwon tomini.