Text copied!
CopyCompare
Maaron Saveeŋ Toni Patabuaŋ - Uraat To Yes Mbaŋooŋa - Uraat To Yes Mbaŋooŋa 2

Uraat To Yes Mbaŋooŋa 2:25-37

Help us?
Click on verse(s) to share them!
25Muuŋ, kinik David isavia saveeŋ pida to iza to Yesu. Ighaze: ‘Sawa isob, you naghita Maaron inepneep naghog ne. Ye inepneep ila digeg waan ve ipapalot ghou. Tovenen mbeb eta irau igham ghou ruŋag iza ne maau.
26Tauto lolog poia kat, ve napaiti ila avog toman tinig iza. Lolog ru maau. Naneep ve naghur matag pa ulaaŋ tiom moghon.
27Pasa, yom irau upul murim payou, ve upul ghou namaat nazila ndug to mateeŋa ne maau. You tamtoghon tiom patabuaŋ. Tovenen yom irau upul ghou namaat, ve patug imbuuz ila naal lolo maau.
28Yom upatooŋ ghou pa ataam to nepooŋ poia. Ighaze naneep toman ghom, yom pale ugham ghou lolog poia le poia kat.’
29“Yo, yam toŋvetaz, you nasaav ghazooŋa payam: Timbuud David, ye imaat ve titavia alok wa. Indeeŋ sawa tonowen ve inim imuul aazne, naal toni inepneep toman ghiit izi ndug tonene.
30Eemoghon David, ye propet to Maaron. Ve ye iwatag ighaze Maaron imbua saveeŋ tomani, ve ipariaaŋa le iyaryaaŋ kat ighaze ye pale ighur paghu toni eta inim kinik. Leso ana igham pooz inimale ye tau.
31Maaron ipaghazoŋan David pa mbeb pida to muri pale tivot. Tauto ye isavia mundigiiŋ to Mesia, ve ighaze Maaron irau ipul muri pani, ve ipuli imaat ve izila ndug to mateeŋa maau. Ve irau paatu imbuuz ila naal lolo ne maau.
32“Yesu to aazne nasasavia ne, Maaron ipamundigini pa mateeŋ wa. Ve yei nisob tonene nighita pa matamai. Tauto nipariaaŋ saveeŋ toni.
33Ve Tama Maaron ighami iza ila pa sambam, ve ighuri ineep ila pa nima waan, ve igham Avuvu Patabuaŋ pani. Tauto aazne, Yesu ana isakia Avuvu tonowen inim irau ghei itaghon saveeŋ mbuaaŋ to Maaron. Avuvu tonenen, tauto inim pughu pa mbeb to aazne aghita ve alooŋa.
34Timbuud David, ye iza ila sambam inimale Yesu maau. Eemoghon ye isavia mbeb to muri ivot pa Yesu ighaze: ‘Maaron isaav pa Tiina tiou ighaze: “Unum mbolem izi ila pa nimag waan,
35le irau natatan koiamŋa ve tapiridi isob kat, ve uvazag di ila aghem paroŋania.” ’
36Ghoro Petrus isaav ariaŋa padi ighaze: “Tovenen yam Israela asob irau awatag kat tovene: Yesu to yam arabi izala ai pambarooŋ ve imaat, tauto Maaron ighuri inim Tiina ve Mesia.”
37Ival tiina tilooŋ saveeŋ tonene le iŋgal di. Tovenen tighason Petrus toman mbaŋooŋa pida tighaze: “Wai, nditoghamai, ighaze venen, pale nigham vena?”

Read Uraat To Yes Mbaŋooŋa 2Uraat To Yes Mbaŋooŋa 2
Compare Uraat To Yes Mbaŋooŋa 2:25-37Uraat To Yes Mbaŋooŋa 2:25-37