Uraat To Yes Mbaŋooŋa 13:34-46

³⁴“Tauvene Yesu, Maaron ipaburigini pa mateegh wa. Ve i irau imuul izila naal gha imbuuz ne mako. Saveeŋa igheen tauvene: ‘Yau nambu saveeŋ ariaaŋ tomani gham naghe yau aat nagham lemim gabua popoia ve patabuyaaŋa imin muuŋ nagham pa David na.’

³⁵Ve saveeŋ ziiri ite isaav ighe: ‘Yo irau upul besooŋa tsio patabuyaaŋ imbuuz ila naal loolo ne mako.’

³⁶“Iit tawatagh: Saawe tau kinik David ileep izi taan, i ibesbees pa Maaron itaghon Maaron ŋgar tooni. Ve saawe tau imaat, titavia tomania timŋa, ve paata imbuuz ila naal loolo.

³⁷Eemon ŋeer tau Maaron ipaburigini pa mateegh na, paata imbuuz mako.

³⁸“Tauvene yam toŋvetaz, alooŋ! Yei nivotia saveeŋ payam leso awatagh kat tauvene: Tutuuŋ to Mose, ene irau ipas ghiit kat pa pataŋani to sosor toit ne mako. Eemon ila Yesu uraat tooni, Maaron ireu sosor toit kat. Tamtamon tisov tau tighur ila to Yesu na, i aat ipas zi pa saghati tapiri, ve ireu sosor toozi isov ilale, leso tiduduuŋ ila Maaron maata.

⁴⁰“Tauvene yam ayamaan gham. Uleeŋa tau Maaron imbaaŋo pait ne, azori sov. Pa ighe agham tauvene, ene aat gabua tau yes propet tisavia na ivot payam. Saveeŋa igheen tauvene:

⁴¹‘Yam tamtamon to veleghiiŋ Maaron, alooŋ! Pataŋani tau naghe naghuru izaa tsiam pa saawe tane, ene aat maata ite. Yam pale aghita, ve arur pani le ŋgar tsiam imbool, ve alalemim. Ighe gabua tauvene ivot pa tamtamon siriv ve alooŋ vaaru mon, ene irau aghur ila mako.’”

⁴²Paulus isavsaav le isov, ra yesuru Banabas tipul rumei tana, ve tivot tila muuri. Tamtamon to lupuuŋ tana tiburig, ve tighason zi ariaaŋ tighe umbom patabuyaaŋ ite ighe ivot, mako yesuru timuul tilam, ve tila saveeŋ tana loolo muul.

⁴³Lupuuŋ toozi isov gha tamtamon tighawaar, ve eval tiina titaghon Banabas yesuru Paulus gha yesŋa tila. Siriv, yes Yuda duduuŋ. Ve siriv, ene yes tau titoor zi timin Yuda ve titaghon eez to Maaron. Yesuru tisavsaav tomani zi, ve tipalot zi tighe lolozi isaghav Maaron ve tiyooz tuŋia ila poia tooni.

⁴⁴Tilepleep le umbom patabuyaaŋ ivot muul, ra tamtamon tisov to nugh tana tila tilup zi pa loŋaaŋ saveeŋ to Tiina toit.

⁴⁵Yes Yuda tighita eval tiina kat timeke tila tighe tilooŋ Paulus yesuru Banabas saveeŋ toozi. Tauta ŋuŋuaaŋ tiina ivot pazi, ve tiburig gha yesŋa Paulus tivazorai zi, ve tisik saveeŋ veleghiiŋ naol pani.

⁴⁶Eemon Paulus yesuru Banabas tiroi mako. Tiyooz ariaaŋ, ve tisaav ghazooŋa pazi tighe: “Maaron ighe ipamuuŋ gham pa saveeŋ tooni. Eemon yam azori. Ŋgar tau aghamu na, ene imin agabiiz taumim aghe yam aat irau to agham lepoogh to mataan yaryaare ne mako. Tauvene aazne ve ila, yei aat nipul gham aleplemim, ve nila pa yes tau Yuda mako na.