Text copied!
CopyCompare
Maaron Saveeŋ Toni Patabuaŋ - Uraat To Yes Mbaŋooŋa - Uraat To Yes Mbaŋooŋa 11

Uraat To Yes Mbaŋooŋa 11:2-21

Help us?
Click on verse(s) to share them!
2Tovenen sawa to Petrus imuul izala Yerusalem, yes to tiyoon ariaŋa pa tutuuŋ to Mose ve ŋgar to zirooŋ tamtoghon, tiyou avodi pani tighaze:
3“Petrus, nilooŋ tighaze yom ula uneep toman yes to Yuda maau ne, ve yamŋa alup gham pa ghanghaniiŋ. Ugham venen pasa?”
4Tovenen Petrus ipaes padi pooi pa mbeb naol to tivot pani ne ighaze:
5“Alooŋ. You naneep izi ndug Yoppa ve nasuŋsuŋ, ve tandagiiŋ eez ivot payou. Matag izala le naghita mbeb inimale uli tiina eez. Uli tonowen, timbit mata paaŋ, ve titugi to sambam we ve izi inim. Izi izi le deŋia ila naghog.
6Naŋgig ilooŋ ila uli tonenen lolo, ve naghita mbeb naol naol. Ŋgai mata mata, ve mbeb pida to tindandarab ila taan, ve man to tirovroov ila tata paroŋania ne paam.
7Ghoro nalooŋ saveeŋ inim payou ighaze: ‘Petrus, umundig, urab di, ve ughan.’
8“You napamuul aliŋa naghaze: ‘Wai Tiina, irau naghan di maau. Pasa, mbeb pida tonowen tiŋgalaaŋ ila matam maau, ve tutuuŋ iŋgalsek pa ghaniiŋ di. To muuŋ ve inim, avog itut mbeb eta tovene maau.’
9“Ghoro saveeŋ ineep sambam ve izi inim payou muul ighaze: ‘Mbeb to Maaron ighami iŋgalaaŋ wa, yom ughaze samia malep.’
10Mbeb tonenen ivot payou irau pae tol le isob, ghoro tiyou mbeb tisob tonenen timuul tizala pa sambam.
11“Sawa tonenen kat, tamtoghon tol to ndug Sisarea to timbaaŋ di payou, yes tinim tiyoon izi ruum to nanepneep pani ne nagho.
12Avuvu Patabuaŋ isaav payou ighaze nagham ŋgar naol malep, ve nala toman di ve yeiŋa nila. Tovenen yeiŋa toŋvetaz liim ve eez tonene, nimundig ve nila. Nilaagh nila nivot ndug Sisarea, ve malmalimai nilooŋ nila Konili ruum toni.
13Ghoro ye ipaes payei ighaze ye ighita aŋela eez ivot ve iyoon ila ruum toni lolo, ve isaav pani ighaze: ‘Umbaaŋ tamtoghon pida tila pa ndug Yoppa, ve tigham Simon to iza ite Petrus inim.
14Ye pale isavia lem savsaveeŋ pida to pale inim ataam payom pa Maaron igham mulin ghom ve uneep pooi. Ve yom moghon maau. Tamtoghon tisob to tineep toman ghom ila ruum tiom ne paam, Maaron pale igham mulin di.’
15“Ye ipaesia mbeb tonenen payou le isob, ghoro anag napamundigin saveeŋ tiou. Mala maau ve Avuvu Patabuaŋ izi inim, ve izeev di raraate inimale papazogi igham pait ila sawa to Pentekos.
16Ghoro matag iŋgal imuul ila pa Tiina toit aliŋa to ighaze: ‘Yoan irughuuz tamtoghon pa ya moghon. Eemoghon yam tonene, Maaron pale igham Avuvu Patabuaŋ payam.’
17Aghita. Sawa to iit taghur ila to Tiina toit Yesu Krisi, Maaron irei Avuvu Patabuaŋ pait. Ve aazne, ye itaghon ŋgar raraate pa ndiran tonowen. Mbeb tonene inim pa Maaron tau. Tovenen you sei, to irau napoon Maaron uraat toni?”
18Tilooŋ saveeŋ tonene, ghoro atedi izi, ve ledi saveeŋ muul maau. Ve tipait Maaron iza tighaze: “Onoon kat, aazne, Maaron ighaze igham poian yes to Yuda maau ne paam. Tauto ipamundigin di ve titoor ŋgar todi ila pani. Leso tigham nepooŋ poia ila toni.”
19Sawa to tirab Stepanus imaat, tighur tighur pataŋani pa tamtoghon naol to titaghon ataam to Krisi. Tauto tiwaghaughau irau ndug ndug. Pida tila pa taan suruvu to Ponisia, pida tivot tila mutu Saiprus, ve pida tila ndug Antiok. Sawa to tilaghlaagh, yes tivovotia Maaron aliŋa. Eemoghon tivotia pa tamtoghon tisob maau. Tiŋarua yes Yuda moghon.
20Eemoghon tamtoghon todi pida to mutu Saiprus ve taan suruvu to Sairini, yes tila tivot ndug tiina Antiok, ve tivotia Tiina toit Yesu Krisi varu pa yes Grika to tineep tonowe.
21Ve Maaron tapiri inepneep toman di. Tovenen ival tiina to ndug Antiok titoor ŋgar todi ila pa Tiina toit, ve tighur ila toni.

Read Uraat To Yes Mbaŋooŋa 11Uraat To Yes Mbaŋooŋa 11
Compare Uraat To Yes Mbaŋooŋa 11:2-21Uraat To Yes Mbaŋooŋa 11:2-21