Umen 2:1-37

¹Navong avong ten anien koa avise en ‘Pentekos’ emai, meatin vasi keil koa aling demkatien one en Iesu umai alah ruai en eim tai.

²Hatte tas, keil along verien tai koa ka en out nesa ka mai suval eang koa muhuh keih. Verien koanik sien vasi eim koa amul arondan ien.

³Evus, tounah tai kistal en eim enek koa vilhili suval ahang koa rasil va mulomal retai en vatin meatin keil.

⁴Ka en avong enek, keil vasi avilelau en Ninin Votut. Ka Ninin san keihoen min keil koa sakin keil aselus en selusien sav keil koa rovitei one kati.

⁵En avong enek, Siu keil koa aka en kantri savsav keil houlu aro en out Serusalem. Umai veni demkatien one keih en Ahi ka e vati avaha netan min Ahi en avong ten Pentekos.

⁶Ka navong meatin keil enek along verien koanik, keil houlu umai out tas keke availea asa mul kur out. Ka navong keil umai vesesal, amutimanin veni along meatin keil onen Iesu amul aselus en selusien savsav keil one.

⁷Keil amusil ka avis keil eris avit, “!Ei, meatin keil ekek koa amul aselus ekok, keil vasi avi me-Kaleli keil enges!

⁸?Sakini, mukave suk ir rolong keil amul aselus en selusien kati keil orer?

⁹Ir roka en out Partia, Midia, ka Ilam; en out Mesopotemia, Sudea, ka Kapadosia; en out Pontas ka Esia.

¹⁰Roka mun en out Frikea ka Pampilia, en out Isip ka en out keil en kantri ten out Libia koa mul vesesal en out Saerin. Tei en ir aka Rom ka avi Siu keil kati, ka teisav en ir umai akur demkatien onen Siu keil enges.

¹¹Ka tei en ir emun avi ten out Krit ka Arebia. !Ka avaseini keke roka en out savsav keil houlu, ir vasi romul rolong meatin keil enek amul aselus en selusien kati keil orer usil marmari tounah keil koa Ahi mul mumoni!”

¹²Keil vasi amutimanin ka amundem usili houlu. Sakini, keil avis sase en keil avit, “?Asa varei aneite ten tounah keil ekek?”

¹³Ka teisav en keil aselus karen keil avit, “!Meatin keil ekek amun uaen houlu koa keih ka avi vau eni!”

¹⁴Evus, Pita mulomal ral min eiloheh teindan tai (11) sav keil, ka viso va min vangi meatin keil vit, “Kami Siu keil, ka kami vasi koa miro en out Serusalem en avong ekek, mihesan ralingomi minau ka nihiten aneite ten tounah enek min kami.

¹⁵Meatin keil ekek armunmuntei vasuval koa kami mimundemi. Avong koanek vi naen klok en visokon enges.

¹⁶Vuo. Tounah koa mimul milesi suval etin asa koa Ahi viteni ka en provet Soel telamu vit,

¹⁷‘En avong ekor keil, inau nisan Ninin Votut onak min meatin vasi keil. Ehon ka atouli keil onami ihit luvat selusien keil onak. Meatin hau keil iles leisanien keil ka ulmatu keil ilei kilea en tounah heka en matil vovoien keil.

¹⁸En avong keil enek, inau nitah Ninin Votut onak heha hesien meatin vasi keil onak heha hetokol meahos ka atou keil emun koa avi slev enges. Anatin, keil emun, ihit luvat selusien keil onak.

¹⁹Inau numon marmari tounah keil ikistal en teilang, ka nitie lat keihoen onak en out netan. En out netan, numon tounah sal keil hekur out koa hesuval avong ten vaeen: ara houe, ka ahang ka eas teni hel en out vasi.

²⁰En teilang, meteiai hemalikelik, ka avati hemai hehilhili hesuval ara. Navong meatin keil iles tounah keil ekek kur out, ilea keke mari avong ten hetetamenien onen Ahi Asuv vesesal vamai vakistal koa houmon kot en meatin vasi keil.

²¹Ka en avong enek, koakeil vasi avise inau ven kataunien, inau, Ahi Asuv, nutut moulien one.’”

²²Pita selus eris min keil vit, “!Tuak eli keil ten out Isrel, mihetaengon selusien keil ekek! Navong Iesu ten out Nasaret ro veah ral min kami, Ahi rie lati keke vi Mesaea onen ka en keihoen koa sani mini keke voumon merikel keil ka marmari tounah sav keil en metomi koa sakin kami mimutimanin eni. Kami vasi mikilea revi en koanek.

²³Ka musil lingkatien onen, Ahi koa kilea en tounah vasi koa kur out ling Iesu va en hemi. Ka kami, misan matien mini en sakien koa mikeih kat koakeil armusiltei mengkatien keil onen Ahi keke uva amuti kati en aiveave.

²⁴Ka Ahi sakini moul eris ran matien keke herkurtei mun mahien teni. Veni keihoen ten matien sakras vahuli kati.

²⁵Koanik suval koa asuv houlu Deved telamu viteni usil Iesu vit, ‘Lisenges, nales Ahi Asuv en usite matu onak. Ka nirmetautei veni kei ro vesesal ven inau.

²⁶Anatin, nasi nau, nasan masmasien va mini. Ka naling desien onak eni keke heting koe teiai onak.

²⁷Anatin, nakilea keke hermaentei ninin onak heto en out ten matien. Ka hermaentei teiai onak, meatin votut onen, hemande en avul tatetahinien.

²⁸Kei rie sise keke mamoul eni. Nisi nau lisenges veni kei ro vesesal ven inau.’”

²⁹Pita selus eris min vangi meatin keil vit, “Tuak eli keil ten out Isrel, inau nihiteni hemal enges min kami usil Deved, avu orer. Kei mat, ka arahini. Ka out tatetahinien onen mul veah ekok rokol kosa.

³⁰Rokilea keke kei vi provet tai. Kei kilea keke Ahi mumon hatkatien takeih tai mini keke hesakin tai en vatiamal onen hekur vulin ka hemai hehi asuv houlu.

³¹Asuv houlu Deved lei kilea asa koa Ahi houmoni en avong keil koa hemai. Sakini, selus usil hemukave Mesaea hemoul eris ran matien navong viteni vit, ‘Ahi hermaentei ninin onen heto en out ten matien. Ka hermaentei teiai onen hemande en avul tatetahinien.’

³²Koanik mul selus usil Iesu koa Ahi sakini moul eris ran matien, ka komai vasi ekek melesi keke vi anatin.

³³Ahi vati lati vina nesa keke vato en out ten hetetamenien en usite matu onen, ka Tata onen san Ninin Votut mini suval koa kei vat kati min komai. Ka kosa, asa koa milesi ka miraengoni vi Ninin Votut enek koa Iesu sani min komai.

³⁴Ir vasi rokilea keke rovitei asuv houlu Deved koa vina en out nesa. Ka Deved varei selus usil Iesu Kristo navong viten selusien koanik vit, ‘Ahi Asuv selus min Asuv onak vit, “Kitondan en usite matu onak,

³⁵hetokol avong koa niling koakeil avi vativieh ral minuk en hem.”’

³⁶Sakini, me-Isrel vasi keil, kami miheilea revi mok keke Iesu enek, Ahi lingi vi Mesaea ka Asuv orer. !Ka vi kei varei koa kami mimuti kati en aiveave!”

³⁷Navong meatin keil along selusien onen, e von ka tine mis. Sakini, avis Pita ral min eiloheh sav keil avit, “?Tuak keil, asa li mehoumoni suk?”