Umen 22:5-14

⁵Munak mivis asuv houlu onen pris keil ka hetetamen keil ten kaonsel orer, keil akilea avahiteni keke selusien keil onak avi anatin. Keil varei amutis leta keil keke makuri ka masani min tuer keil koa aro en out Damaskas. Sakini, nuva en out Damaskas keke mahuli kat Kristin keil en out enek ka maleh keil avamai ris en out Serusalem keke avakur mahien ekonek.”

⁶Pol mules selus min keil vit, “Navong namul namual nuva vesesal en out Damaskas, mal en taviai, muohien tai koa ritin keih vis keih ka ran out nesa ka karahit inau.

⁷Sakini, numot navita en atan ka nalong rea tai koa viteni minau vit, ‘!Sol, Sol! ?Vensa komul kopurun inau ral min meatin keil onak mukok?’

⁸“Ka inau navit kesi navit, ‘?Asuv, keik sei?’ “Ka kei viteni minau vit, ‘Inau Iesu ten out Nasaret koa komul kopuruni.’

⁹Meatin keil koa uva ral minau ales muohien enek, ka keil arlongtei rea koa selus minau.

¹⁰“Sakini, navisi navit, ‘?Asuv, inau numon sa?’ “Ka Asuv viteni minau vit, ‘!Kimea ka kiha en out Damaskas! Ekonek, meatin tai hehit meseini minuk tounah vasi keil koa Ahi ling kati keke kovoumoni.’

¹¹Navong rea enek selus evus, namutimanin keke metok keilu luvar ven muohien enek koa ritin kat inau. Sakini, koakeil koa umai ral minau avuli kat hek ka amulamun inau meva en out Damaskas.

¹²“En taon enek, meatin tai mai sao enau, isen Ananaeas. Kei vi Siu tai koa envatien onen en Ahi keih. Kei musil revi mengkatien keil orer, ka Siu vasi keil en taon enek avouhou mini.

¹³Mai mulomal vesesal venau ka viteni minau vit, ‘!Tuak Sol, lele eris!’ En hati avong enesek, nalele ris ka nalesi.

¹⁴Evus, kei viteni minau vit, ‘Ahi onen avu orer keil rie latuk keke kovailea rendemien onen, kovales Meatin ten Maluen onen, ka kovataengon ren kati.