Ulom 4:8-18

⁸Feinka! Kamok Fian e yom ibolow sili sili nam kukuw be teing bokolinba keyemkabe kunum waneng yu kalfong fian so keko, kakatemoliwka!”, angeko, fut tem bose kale.

⁹Kame yu nono ibolow fukunbiliw e? Debit e ikalem kal okilewkabiliw Suda kawtiw num dulum elote kuw bokolomele: “Yu kalfongeko, kakatemoliwka!”, yangeko, bokoyemse sako? Bani, e kal okilewinba kekabiliw kawtiw yom dulum elote akati weng be bokoyemse sako? Feinka! E kal okilinba kekabiliw kawtiw iso, kal okilew kekabuluw kawtiw nuso, alik alik num dulum elote “Yu kalfongeko, kakatemoliwka!”, yangse kale. Nimtew angom? Nu fut ayem tem ka kel teing bokoko, atemuwete: “Abalakam e Sunbin-Got elo ‘Fein!’, dangse kasike, beem mongom ete e elo bokolomele: ‘E kiol kuw kunum te!’, angse te.”, angei, nu atemsuluw te.

¹⁰Kame yu kilele kililina! Nalem tit ete Sunbin-Got e Abalakam elo “Ku kiol kuw kunum kute te!”, dangse ye? Abalakam em kal okileweko, kealenale ding dim kabalak ete? Bani, em kal okilewinba kealenale ding dim kabalak ete sako? Fein, em kal okilinba kealenale ding dim bakate, Sunbin-Got e “Ku kiol kuw kunum kute te!”, dangesomi,

¹¹elo ibik elote kal okilew kemin kukuw be bat kang dukulin tew dulewse te. Kasike kame, alik alik nu kilele kal keluwete: Sunbin-Got e Abalakam elo kilele atemeko, em kal okilinba kese ding dim kabalak e, elo weng banim kese te. Kaneko beli, Abalakam e kawtiw Sunbin-Got elo “Fein!”, dangakabiliw kate, kal okilinba kebiliw kawtiw im abiok akati ke alenale te. Nimtew angom? Isik Abalakam emdiw kal okilinba kekabiliw kate, Sunbin-Got e im fein ibolow be atemeko, ilo akati “Yu kiol kuw kunum waneng yute te!”, yangakabe kasike.

¹²Kaneko beli, Abalakam e kawtiw ikalem kal okileweko, akalem kal okilinba kealenale ding dim em kiol kuw kukuw beemdiw kakabiliw kunum waneng biim abiok akati kealenale te. Nimtew angom? I Abalakam em kanemale kukuw be geleweko, Sunbin-Got elo “Fein te!”, dangakabiliw kasike.

¹³Sua kel akate, Sunbin-Got e Abalakam elo fawtuk ayem weng mak bokolewomele: “Ne kawin dim angom kale kukalem so, kom muluwel dow iso, alik alik yulo duyemoki te!”, dangese kale. Feinka! E Abalakam em kukuyemin sawa weng afak kebomi, gelewkabe kukuw be ateminba kese kate, em fein ibolow bete kuw atebamele kasike, e em kiin dim e kiol kuw sen so banim kunum kealenale te.

¹⁴Fein te! Sunbin-Got e mali Moses em kukuyemse sawa weng beem afak keko, gelewkabiliw kawtiw ilo kuw fawtuk ayem weng be bokoyeme tewe, mali kunum waneng im elo “Fein!”, dangakabiliw ibolow be soson mongom banim so emdiw kebe tew te. Kebomelei, Sunbin-Got em fawtuk ayem weng bakati sak fong atew keko, dem banim atew kebe tew te.

¹⁵Nimtew angom? Kawtiw im sawa weng sakalaw keko, weng bo bo kelewkabiliw beem mongom ete sakalaw keko, weng bo bo kemin beem kaisuw yan fian im dim kel dakin aileko, fitewkabe kasike. Kate, sawa weng mak banim kele tew tewe, kawtiw i ki keko, sawa beelo akati nam sakalaw keko, weng bo bo kemiw te.

¹⁶Kasike, Sunbin-Got em ibolow folok e kunum waneng elo “Fein!”, dangbiliw kunum waneng im dulum elote fein fitewkabe te. Fitewei, em weng Abalakam so, em muluwel dow iso, alik alik ilo bokoyemse fawtuk ayem weng be fein dem gilalei, alik alik i elo kulokoliw te. Kate, Abalakam e Suda kawtiw so, mali Abalakam emdiw Sunbin-Got elo “Fein!”, dangakabiliw kawtiw iso, alik alik makuw bongguko, num abiok makmak keyemse kasike, Sunbin-Got em fawtuk ayem weng be alik alik num dulum akati makuw talse te.

¹⁷Nimtew angom? Sunbin-Got e Abalakam em dulum elote bokolei, i akalem fut ayem tem ka kel boliwi, nu kilele teing bokoko, atemuwete: “Kawtiw mongom banso banso im abiok awalik kekemoki te!”, dangei, nu atemuw kasike. Feinka! Abalakam e auk so kitil so Sunbin-Got elo “Fein!”, dangeko, kal kelete: Ete ki keko, kuansiliw kawtiw ilo iti yemkalfoleko, kanelinba mesesem mesesem eisneng beem dulum elote “Kanela!”, angei, mesesem be fein talfut keloke kasike, e Sunbin-Got em kiin dim e num fein abiok kealakabe kasike.

¹⁸Yu Abalakam em kanelewse sang be kililina! Abalakam em itol e 100 kel kelei, e fasel kesomi, em aul kailomin deiw akal banimse kale. Banimei, em kalel Sala ukal kumun du keko, aul dukukemin am tum kutse kate, Abalakam e yemkal ikalem dim em kaneyemkabe be ibolow fukuninba kebomi, Sunbin-Got em kitil fian beem dim ete kuw ibolow fukuneko, kitil kuw mosomi, Sunbin-Got em dokolewoke ding fense kale. Ding feneko, Sunbin-Got elo kuw dawsiko, em yangse weng “Kawtiw mongom banso banso im abiok awalik kekemoki te!”, angse weng beso, em angse weng “Kom muluwel dow i banban demdem kekemoki te.”, dangse weng beso, weng alew beem ki keloke ding fense kale.