Uanën Dada uaid 19:22-40

²²—Padi. Mambi ëmbi tantiaboedquio dada uaboc. Utsi uain dada uaoatiapimbo iquebi —quepac caondash Pidato.

²³Adnubien Esus dectanquido sondado daëd-daëdquiec icpondash. Esusën dashcute 5ted icsho sondadon bedbanquin abentse-abentsen bedbededpondash abentsëc abi icnuc. Aid abucshun bedanquin abichobi daëdcaid tuscabi icquid niondash.

²⁴Adquid icsho isun: —Canchenquio icquin ¿tsundanquio bedeque? Isnuna —queshun abi cuëmëdquidtedi dada uabanshun tëchun sandoshon cadotanequin dada uaidëmpi abia puduemiaid isun aid dashcute bedondash. Aidon nate Nuquin Papan tantiamiac con tsusedpan naden dada uapampic. “ ‘Abentse-abentsen con dashcute bedosh. Con dashcute utsi bednu, quequin dada uaidëmpi abia puduemiaid isnuen naosh,’ quependac,” quequin dada uapampic.

²⁵Adnubien Esus dectanaid cueste tayun nëidtedi icpondash. Nëidic Esusën tita. Nëidic Esusën tita utsi. Nëidic Madia Codopasën chido. Nëidic Madia utsi Mactada yacnuësh choquid. Aidtedi chido icpondash.

²⁶Në chido tabadnuc ambobi uquëctsëc tabadondabi. Adec ambi tantiaidquio ëbi icsho isun Esusën aniba chuipondash. —Nëid con mado cata, tita. Ma mibi bëdamboen dayun uanu —capondash Esusën.

²⁷Adshumbic ëbitsen chuiquin: —Con ta tita cata. Adshun bëdamboen ëbi dayun uashunta —cac con shubunobi buanondambi bëdamboen Esus dayun uashunuen.

²⁸Adboshien unësquionoshi Esus: —Con Pan chiacpadomboen nainembi. Matses tantiec ëbided cuidadec unësebi —quequin tantiec con tsusedpan dada uaquin chuipampicpadec: —Acte bundobi —quepondash Esus.

²⁹Adsho tantiashun matsun acte mucambo icquid anidquid shapu-shapupactsëcquidën punshun cueste dëdectanshun abuc sananquin ëccuëscadonetsëcquin chishmepondash.

³⁰Adoac acte mucambo icquid chishtanequien: —Con Pan chiacpadomboen nainquiombi —quepondash. Adtanequi tëdquëdbudpondash Esus unësequi.

³¹Adnubien Esus chieshënquido: —Badiadash Nuquin Papan matamiampid inchësh tantiate ushë iquec. Chonoadenquio icte ushë nec. Aidën cuesten dectanquin unës uaid chococac icsambo ictsiashe. Nëbimbobi chococamenu —queshun Pidato chuitampac caondash. —Baded nidte podquënquin unës uame. Inchësheque —cac

³²Pidaton aden chiac sondadon nidte podquëntanondash. Esusbëdta dectanaid ëquë diadquidba nidte podquënshumbic utsiuc diadquidtsen.

³³Adotanquin isquien Esus ënden unësac. Adshobien nidte podquënenquio icpondash.

³⁴Adotanquimbic: —Unësabi icnushe —queshun: —Unës uaquiobono —quetanquin sondadon cudan podo ansequin Esus uinte masepondash. Adoac nua intac chididiquiondash actebëdi.

³⁵—Adosho ëmbimbo isondambi —caimbi. —Ëmbi dada uaid isun ma Esus tantianu —queshun abimbo chuiquin dada uaombi nëid dada uaquin.

³⁶Nuquin Papan tantiamiac con tsusedpan: “Canite podquënenquio iquendac,” quequin dada uapampicpadomboen canite podquënenquio icpondash Esus.

³⁷Adembidi podo ansete dada uapampic. “Ambi podo anseboed isec tabadendac,” quequin dada uapampic.

³⁸Adnubien shubu dadpen icquid Adimateya yacnocquid Ose chopondash. Esus tantiaquid aid niondash. Esus chieshënquido dacuëdënquin: —Esus tantiaquid nebi —quequin utsibo chienquio icboedëmbi Pidato chuitampac caondash. —Esus chococanun buanendambi —cac: —Ai —cac Esus buampondash.

³⁹Aidbëdi Nicodemo inchëshën Esusbëd onquiondaid nidpac caondash. Bëdambo nuadquid mida adoebëdta cabiunaid unësaid dabiunte bëac caondash. Nuamboshë. Yuëmbo icnuc 35 quidostembi icnuc bëac caondash.

⁴⁰Adshumbien Osebëdtambi Esus nua dabiunquin uesquin dataniac caondash dashcuten. Adshumbic padpiden dabiunoaquin. Adshumbic padpiden dataneoaquin. Adshumbic padpiden dabiunoaquin. Adshumbic dataneoaquin. Chococanun con matsesën adoquid.