Tuwalali 15:16-29

¹⁶Yehoba i ba, ‘Inoke abwe na sikalim, ge Deibid wana limi toto i mamaguli na pamilil al. I samwalekaleka, yaa abwe na abubun ge na tal pasikal al.

¹⁷Inoke gamagalau gegewel al nihi nem elau, heliya nige Yudiya i oola yaa ya hilel no gamagalau.’

¹⁸Yehoba wana baaba te, iya beyaunana bugul ya i pamasal.

¹⁹“He no nuwatu i ola hiwe. Bolo nige Yudiya i oola ge hi mipil awoliya hi pek Yehoba elana, bahi ali pulowan ta giginol tage Mosese wana Logugui gegewena nihi henapuan.

²⁰Wali leta ya ta leli ge ta baek elal bahi aanan toto gamagalau hi pakakanunek yabowaine kakakawena elana nihi aan. I ola al bahi ganawal paganina nihi giginol, ge bahi bwasumu toto yawalina hi am kaus ge i aliga bunumwina nihi aan, kaiwena saliyana nige i lalau.

²¹He houhouwena ana siga sauga ya, Mosese wana Logugui ana topapaatena hi gan panuwa maisena ge maisena elana, ge Sabwata gegewena hi vavasili-an Yudiya wali limi tapwalolowa, inoke Mosese wana Logugui ana toatena nige nihi soso.”

²²Inoke apostolowau ge tohouwa, avaliyau ge toekelesiya gegewel, hi nuwatu bolau enuna nihi hilel ali boda gamwanaa, yaka aloliyau Pol ge Banabas nihi patunal nihi na panuwa Antiyok. Yaka bolau labui hi hilel, Yudasa, alana etega al hi ba Basabas, ge Sailasa, heliya alaliya i bwata toabulilek gamwaliyaa.

²³Inoke leta etega hi pek elal ge hi noahe, leta ana baaba i ba ola hiwe: Atemeyau komiu talimeyau ge numeyau, Ama apostolowau ge ekelesiya ana tohouwa leta ya ha leli ge ha patuna toabulilek eliyamiu, bolo nige Yudiya i oola ge ku minaa panuwa Antiyok, labi Siliya ge labi Silisiya.

²⁴Wasa iyaka ha hago tage gamagalau enuna hi egona ama boda elana ge hi nowa, inoke wali baaba elana yayaluwamiu hi apanak ge hi panuwanuwatu-agimiu. Yaa ama nige ha babaa ge hi nonowa, totoliya wali nuwatu ya.

²⁵Inoke ha logugui toyawa bolau enuna naha hilel ge naha patunal eliyamiu avaliyau wala heliyamwau waiwaisal Pol ge Banabas,

²⁶heliya yawaliliya hi talamwan wala Babala Yeisu Keliso wana tuwalali kaiwena.

²⁷Inoke Yudasa ge Sailasa ha papatunal te, yaka awaliyaa nihi wasa eliyamiu ni ola toto ha lelelian leta ya elana.

²⁸Yayaluwa Bwabwalena i logugui ge ama ha logugui bahi pulowan naha pepewa eliyamiu tage Mosese wana Logugui gegewena nuku henapuan, iyai ya te logugui bwabwatal bolo hiwe.

²⁹Bahi aanan toto hi pakakanunek yabowaine kakakawena elana nuku aan. Bahi bwasumu toto yawalina hi am kaus ge i aliga bunumwina nuku aan, kaiwena saliyana nige i lalau. I ola al bahi ganawal paganina nuku giginol. Ebo bugul bolo ya nige nuku giginol, he i waisi. Kaiyoni.