Tuukwewabe Manepu 16:11-17

¹¹Numme yise Troas-wi'yoona mea. Numme natzemangekase Samothrace-wi petuga. Ookow mooa numme tuwazoo natzemangeka, Neapolis-witoo sawe petuga.

¹²Numme yise Philippi-wi oona sogo mease oo petuga, soo Philippi ka teepu Macedonia-koobatu mooe nadatsunga. Mu numu otuoo Roman numu. Huu tabeno tooe numme o.

¹³Ka nanesootuhi tabebano numme ka Philippi hooonakwatoo mea ka paa hooodu-kumabaa petuga, mu Jew numu o sumuna nanesootuhiyakwe. Numme aatase, mu momoko'ne nananesootuhidu-no apegea.

¹⁴Sumu'yoo umu-matu ne nakapunnedu Lydia mee naneadu mogo'ne, Thyatira mee naneadu-witoo nadooa'adoopu. Oosoo Lydia Te Naa-matoo nanesootuhidu. Oo naka'oedyukute ka Te Pabe'e oowetuoo ka Paul pumme tuukwe.

¹⁵Ka saa'a Lydia ka umu puno baa-wi namatzakapu nenuummakuna mee unakwe, “Mu sakwa nu-baasoo ka e sopedakwatoose, nu punno'o ka Te Pabe'e-wi tubetse tunaka'oedyukudu.” Ne tubetse nenuummakute.

¹⁶Sumu numme oona pukwi'yoona mu Jew numu nanesootuhidyi-kwitoo meana, oosoo tsuaduma togogwa pooha-ga'yoo ne weke'ahoo. Ka tu togogwa pooha hemma manekwuna pumme oo tuukweyakwe soo tsuadumu mu numu tuukweyakwe. Mu numu ka tsuadumu meeoo neyugwedu ewa natumanakakute ka tsuadumu numu tuukwe-kwi.

¹⁷Oosoo tsuadumu huu tabeno ne nagedyinnumme paba yadooanummena mee unnena, “Umuoo naana ka Te Matabuepu nayadooawabe. Umuoo mu tuukwekwu how soo Te Manumudoopu mu magwetzoi tabuakwu.” Soo Paul oo-matoo suda soonamme ka tsuadumu ooosapa oo manakwe. Soo Paul yise nakwumunase eka togogwa pooha meeoo netamma, “Ka Te Pabe'e pooha tooha-kwi nu u nematzakukwuni!” Yabesoo yise oosoo suta'yoo poohabe ka tsuadumu naga'yoona tsebooeka.