TUTU LUCA 1:38-80

³⁸Ta cati ndico ña María ti: ―Musu ra chahnu cui. Na cua coo chi chihin yu cuhva cati cun ―cati ña. Tacan cuu, ta quee ra tatun Ndioo can cuahan ra.

³⁹Suvi ni quivi can cuahan ña María iti ñuhun Judea, ta numi xaan cuahan ña. Yucu xaan nu cuahan ña,

⁴⁰ta queta ña ñuun nu iyo vehe ra Zacaría, ta quihvi ña tichi vehe, ta sacahnu ña chi ña Elisabet.

⁴¹Nu ni chini ña Elisabet cha cahan ña María, ta ni tuñu ve tichi ña, ta cha iyo ra Tati Ndioo chi ña.

⁴²Tacan cuu, ta nihin xaan quechaha cana chaa ña, ta cati ña chi ña María ti: ―Iyo xaan tu manini chihun, ta cua coo xaan tu manini chi sehun.

⁴³Ñahni yavi ndai, ta chi main quichi cun, ta sihi ra chahnu cua cuu cun.

⁴⁴Nu chini yu cha cahun chihin yu, ta tuñu ve tichi yu, vati sii xaan cuni ve.

⁴⁵Na cua cusii ini cun, vati chinu ini cun ti cua tahun cuhva ni cati ra chahnu chihun ―cati ña.

⁴⁶Tacan cuu, ta quechaha cati ña María ti: Sacahnu yu chi ra chahnu.

⁴⁷Cusii ini yu chi ra Ndioo, ta maan ra cuu ra sanduvaha anime.

⁴⁸Cusii ini yu chi ra, vati cha chito ra ti ñivi ndahvi cuu yu, ta musu ra chihin yu. Vitin ta nda cua nda iti nuun cua cati ndihi ñivi ti iyo tu manini chihin yu.

⁴⁹Tacan cua cati ñi, vati ra iyo tu ndee ini―racan cuu ra savaha cha cahnu xaan chihin yu, ta ii xaan iyo ra.

⁵⁰Ndihi ni quivi ndihi ni tiempu cundahvi ini ra chi ñivi sacahnu chi ra.

⁵¹Iyo xaan tu ndee ini chi ra, ta cha sandoyo ñuhun ra chi ñivi ndurai, vati rai xaan cuni ñi chi anima ñi.

⁵²Cha tava ndaa ra chi ñivi ndaca ñahan, ta sacahnu ra chi ñivi ndahvi.

⁵³Cha savaha ra cha vaha chi ñivi cumani, ta tava ndaa ra chi ñivi iyo vaha.

⁵⁴Cha tindee ra chi ñivi Israel musu ra. Cha ñuhun ini ra chi ñi, ta cundahvi ini ra chi ñi.

⁵⁵Tacan ni savaha ra cuhva cha ni cati ra chi ñivi yo iti chata. Tacan ni cati ra ti ndihi ni quivi ndihi ni tiempu cua cundahvi ini ra chi ra Abraham chi ndihi ñivi cuu ñivi ra iti nuun ―cati ña María.

⁵⁶Tacan cuu, ta ndoo nuun ña María chi ña Elisabet. Uni yoo ndoo nuun ña chi ña, ta sa cuanuhun ndico ña vehe ña.

⁵⁷Nu ni queta quivi cha cua cacu sehe ña Elisabet, ta ni cacu iin ra luhu sehe ña.

⁵⁸Tacan cuu, ta chito ñivi ña ti cuaha xaan cundahvi ini ra chahnu chi ña. Chito tahan ñivi iyo ñuun ña, ta ndihi ñi ta ñi cusii ini ñi chi ña.

⁵⁹Tacan cuu, ta yaha una quivi, ta quichi ñi vehe ña, vati cua tahnda ñiin xini xuu ve luhu can cuhva iyo costumbre ñi, ta cati ñi ti cua cunani tahan ve Zacaría cuhva nani sutu ve.

⁶⁰Tacan cati ñi, soco cati sihi ve ti: ―Ñavi. Juaan cua cunani ve ―cati ña.

⁶¹Ta cati ndico ñi chi ña ti: ―Yoni ñivi ndo nani tacan ―cati ñi.

⁶²Tacan cuu, ta quechaha savaha ñi seña chi sutu ve, ta nducu tuhun ñi chi ra yoso cuni maan ra cha cua cunani ve.

⁶³Tacan cuu, ta chica ra iin vitu nu cua taa ra, ta quechaha taa ra ti Juaan nani ve. Tacan ni taa ra nu vitu can, ta iyo xaan cuni ndihi ñi.

⁶⁴Tacan cuu, ta suvi ni hora can nducahan ndico ra Zacaría, ta sacahnu ra chi ra Ndioo.

⁶⁵Yuhvi cuni ndihi ñivi iyo tican, ta cahan ndihi ñivi chi tahan ñi iyo yucu can ñuhun Judea can, ta saxini ñi ñaan cha cuu chacan.

⁶⁶Chini ndihi ñivi tuhun can, ta saxini ñi chi anima ñi, ta nducu tuhun ñi iin ñi inga ñi ti: ―¿Ñaan rai cua cuu racan? Tacan ni nducu tuhun ñi, vati cua tindee ra chahnu chi ra.

⁶⁷Tacan cuu, ta iyo tahan ra Tati Ndioo chi ra Zacaría sutu ve, ta quechaha cahan ra yoso cuhva cua cuahnu ve iti nuun, ta cati ra ti:

⁶⁸Cahnu xaan rai cuu ra chahnu Ndioo, vati cha tindee ra chi ñivi Israel ñivi maan ra, ta cua sacacu ra chi yo.

⁶⁹Cua sacacu ra chi yo, vati iyo tu ndee ini chi ra, ta ñivi ra David musu ra cua sacacu chi yo.

⁷⁰Tacan ni cati ra, vati nu quichi quivi cati ra ni cahan cuenda ra Ndioo ti

⁷¹cua cacu yo nu cuxaan ini ñivi chi yo. Cua cacu yo ndihi nu cani tahan ñivi chi yo.

⁷²Cati ra ti cua cundahvi ini ra Ndioo chi ñivi yo tiempu chahnu, ta ña cua naan ini ra tuhun tiso ra nu quichi quivi.

⁷³Cua cucuhun ini ra tuhun can, vati cahan ra iin cha rai chi ra Abraham ra cuu ñivi yo tiempu chahnu.

⁷⁴Cati ra ti cua sacacu ra chi yo nu iyo yo chi ñivi cuxaan ini chi yo, vati cua satiñu yo cuenda maan ra, ta ña cua cuyuhvi yo.

⁷⁵Chi maan ra cua coo vaha yo. Cua coo ii yo ndihi ni quivi cha iyo yo nu ñuhun ñuñivi.

⁷⁶Ta yoho sehu, cua cati ñivi ti maun cuu ra cahan cuenda ra Ndioo cahnu, vati cua yaha xihna maun. Cua tiso vahun tiñu nu cua yaha ra chahnu, ta sa cua quichi ra.

⁷⁷Chacan cuu cha cua sacoto cun chi ñivi ti cua sacacu ra chi ñi nu ndacu ñi ndavaha ni, ta cua naan cuati ndacu ñi.

⁷⁸Tacan ni cua savaha ra Ndioo chi yo, vati cuni mani ra chihin yo, ta cundahvi ini ra chihin yo. Cua queta quivi cua quichi sacacu ra chihin yo.

⁷⁹Cua ndehe ñivi iyo chi tu ndoho chi ra, ta sa cua saquehni ra cha vii chi anima ñi ―cati ra.

⁸⁰Tacan cuu, ta ni chahnu ra Juaan can, ta chaha ra Ndioo tu ndee ini chi ra. Mani tichi cuhu ni chacoo ra nda cua nda quivi quechaha cati tuhun ra chi ñivi judío can.