Text copied!
CopyCompare
Tutu chaa cha iyo cuenda ra hahnu Jesucristo (El Nuevo Testamento de nuestro señor Jesucristo) - TUTU JUAAN - TUTU JUAAN 9

TUTU JUAAN 9:1-30

Help us?
Click on verse(s) to share them!
1Cuahan ra Jesuu, ta ndehe ra ti iyo iin ra cuaa. Cuii nuun ra, vati tacan ni caa nuun ra nda ni cacu ra.
2Tacan cuu, ta quechaha nducu tuhun ra sacuaha chi ra Jesuu ti: ―Maestru, ¿yoo savaha cuati, ta cacu ra cha cuii nuun ra? ¿Atu savaha maan ra cuati a savaha sutu ra chi sihi ra cuati? ―cati ra chi ra Jesuu.
3Ta cati ndico ra Jesuu chi ra ti: ―Ñahni cuati savaha rahya, ta ni ñahni cuati savaha sutu ra chi sihi ra. Tacan tahan ni cacu maan ra, vati cua ndehe ñivi yoso cuhva cua savaha ra Ndioo chi ra.
4Iyo cha cua savahi cuhva cuni ra ni tava tiñu chihin yu, vati ni vii cuu vitin. Cua queta quivi, ta ña cua cuu ca.
5Ni iye nu ñuhun ñuñivi, ta cui sava ni ta cua iin ñuhun ndichin. Chacan cuu cha cua tindei chi ñivi ñuñivi ―cati ra.
6Tacan ni cati ra, ta sa tivi sivi ra nu ñuhun, ta savaha ra ndahyu nu tivi sivi ra, ta taa ra chi chi nuun ra cuaa can.
7Tacan cuu, ta quechaha cati ra Jesuu chi ra ti: ―Cuahan iti soco Siloé, ta cua nacata cun nuun cun ―cati ra. Tuhun Siloé can cuni cati ti cha tachi yu chihun. Tacan cuu, ta cuahan ra cuaa can, ta nacata ra nuun ra. Quichi ndico ra, ta ndichin vaha ndehe ra.
8Ndehe ñivi ñuun ra chi ra, ta ndehe tahan ñivi nacoto chi ra, ta chito ñi ti cha chica ra caya ra, ta quechaha nducu tuhun ñi ta ñi ti: ―¿Atu ñavi ra chica caya cuu ra? ―cati ñi.
9Iyo ñi cati ñi ti: ―Suvi ra cuu ra ―cati ñi. Ta inga ñi cati ti: ―Ñavi, soco cuhva caa racan caa ra ―cati ñi, soco maan ra cati ti: ―Yuhu cui.
10Chacan cuu cha nducu tuhun ñi chi ra ti: ―¿Yoso ni nduvaha nuun cun? ―cati ñi.
11Cati ndico ra chi ñi ti: ―Nacoto ndo chi ra nani Jesuu. Savaha maan ra ndahyu, ta taa ra chi chi nuin, ta cati ra ti na cua cuhin iti Siloé, ta cua nacate nuin. Chacan cuu cha chahin, ta nacate nuin, ta ndundichin vaha ndehi ―cati ra.
12Ta nducu tuhun ñi chi ra ti: ―¿Ndaa iyo racan? ―cati ñi. Ta cati ndico ra chi ñi ti: ―Ña chite ―cati ra.
13Tacan cuu, ta ni chandaca ñivi can chi ra nuun ra fariseo, vati xihna ca cuii nuun ra, ta vitin ndichin vaha ndehe ndico ra.
14Quivi sábadu quivi ii ni savaha ra Jesuu ndahyu can, ta sanduvaha ra nuun ra cuaa can.
15Chacan cuu cha quechaha nducu tuhun tahan ra fariseo chi ra nduvaha nuun can ti: ―¿Yoso cuu cha ni ndundichin ndehun? ―cati ra. Ta cati ndico ra chi ra ti: ―Ni taa iin ra ndahyu nuin, soco nacate chi chi, ta ni ndundichin vaha ndehi ―cati ra.
16Chacan cuu cha iyo ra fariseo cati ra chi ra ti: ―Ña ni tava tiñu ra Ndioo chi racan, vati ña cumi ra quivi ii quivi cahnu ―cati ra. Ta cati ndico inga ra ti: ―Cahnu xaan cuhva ni savaha ra, ta ña cuu savaha rai ndacu cuati chacan ―cati ra. Tacan cuu, ta quechaha ndusaca cuni ra ta ra,
17ta nducu tuhun ndico tucu ra fariseo chi ra ti: ―¿Ñaan cha cuu cha cua cati maun? Nuun maun cha ni sanduvaha ra ―cati ra. Ta cati ndico ra ti: ―Yuhu cati ti iyo ra cuenda ra Ndioo ―cati ra.
18Tacan cuu, ta ña cuni cuinu ini ra judío can ti ni nducuii ndicha nuun ra, ta ndundichin ndico ndehe ra. Cana xihna ra chi sutu ra chi sihi ra,
19ta quechaha nducu tuhun ra chi ñi ti: ―¿Atu sehe ndo chi rahya? ¿Atu cuaa ra, ta cacu ra? ¿Ñacu ndichin vaha ndehe ra vitin? ―cati ra.
20Ta cati ndico sutu ra chi sihi ra ti: ―Chito ndi ti rahya cuu sehe ndi, ta chito ndi ti cuaa ra, ta cacu ra,
21soco ña chito ndi yoso cuhva ni ndundichin vaha ndehe ra vitin, ta ni ña chito ndi yoo rai ni sanduvaha nuun ra. Cua nducu tuhun ndo chi maan ra, vati cha cahnu ra. Cua cati ndico maan ra ñaan cha ni tahan ra ―cati ñi.
22Tacan cati sutu ra chi sihi ra, vati yuhvi ñi chi ra judío can, vati cha iyo vaha tuhun chi ra judío ti tu cua cati ñivi ti cha ni tava tiñu ra Ndioo chi ra Jesuu, cua tava ndaa ra chi ñi ve ñuhun.
23Chacan cuu cha cati ñivi ra ti cha cahnu ra, ta na cua nducu tuhun maan ra ta ra chi ra.
24Chacan cuu cha cana ndico tucu ra judío can chi ra nduvaha nuun can inga chaha, ta cati ra chi ra ti: ―Cua cati cun iin cha ndicha, vati iyo cun iti nuun ra Ndioo, ta chito ndi ti ra ndacu cuati cuu racan ―cati ra.
25Ta cati ndico ra chi ra judío can ti: ―Ña chite tu ndacu ra cuati, soco chehe cuu cha ni chite. Chite ti ra cuaa cui nu quichi quivi, soco vitin ndichin vaha ndehi ―cati ra.
26Ta nducu tuhun ndico ra ta ra chi ra ti: ―¿Ñaan cha ni savaha ra chihun? ¿Yoso ni sanduvaha ra nuun cun? ―cati ra.
27Ta cati ndico ra chi ra ti: ―Cha cati yu chihin ndo, soco ña tasoho ndo. ¿Ñacu cuni ndico tucu ndo cuni soho ndo? ¿Atu cuni tahan ndo coo ndo chi ra? ―cati ra.
28Tacan cuu, ta quechaha nduxaan ra ta ra chi ra, ta cati ra chi ra ti: ―Iyo maun cuenda ra, soco iyo maan ndi cuenda ra Moisee.
29Chito ndi ti cahan ra Ndioo chi ra Moisee, soco ña chito ndi yoo rai cuu racan ―cati ra ta ra.
30Ta cati ndico ra ndahvi can chi ra ta ra ti: ―Iyo xaan cuni yu, vati ña chito ndo yoo rai cuu ra, ta ni sanduvaha ra nuin.

Read TUTU JUAAN 9TUTU JUAAN 9
Compare TUTU JUAAN 9:1-30TUTU JUAAN 9:1-30