TUTU JUAAN 4:9-26

⁹ta quechaha cati ña Samaria can chi ra ti: ―Rai judío cuun, ta ¿ñacu chica cun nduta chi yuhu, ta yuhu ñahan Samaria cui? Tacan cati ña, vati ña tuhva ñivi judío cahan ñi chi ñivi iyo ñuhun Samaria.

¹⁰Ta cati ndico ra Jesuu chi ña ti: ―Ña chito cun ti iyo cha samani ra Ndioo chi ñivi ñuñivi, ta ni ña nacoto cun chi ra cati chihun ti cua cuhva cun nduta coho ra. Tu cua ndaca cun tu manini chi ra, cua cuhva ra nduta chihun, ta cua coo ndito cun ―cati ra.

¹¹Ta cati ña chi ra: ―Ñahni ñaan cha naun, ta cunu xaan soco ya. ¿Ndaa cua nihun nduta cahun tuhun can?

¹²Chaha ra Jacob ra cuu ñivi ndi soco ya chi ndi. Chihi maan ra nduta ya, ta chihi tahan ñivi ra chi sana ra chi chi, ta cahnu xaan rai cuu ra. ¿Atu cahnu ca rai cuu maun? ―cati ña.

¹³Ta cati ndico ra Jesuu chi ña ti: ―Tu cua coho ñivi nduta ya, cua neti ndico tucu ñi,

¹⁴soco tu cua coho ñivi nduta cua cuhve, ña cua neti ca ñi ndihi ni quivi. Cua cuhve chi chi chi ñi, ta cua cuu chi sava ni ta cua iin soco chi ñi nu cahndi nduta, ta cua coo ndito ñi chi ra Ndioo ndihi ni quivi ndihi ni tiempu ―cati ra.

¹⁵Ta cati ña ñahan can chi ra ti: ―Cuhva nduta can chihin yu, ra chahnu. Chacan cuu cha ña cua neti que nduta, ta ni ña cua quichi que ihya, ta ni ña cua canihin que nduta ya ―cati ña.

¹⁶Ta cati ra chi ña: ―Cuahan, ta cua cana cun chi ra cuu ii cun, ta cua quichi ndico ndo ihya ―cati ra.

¹⁷Ta cati ndico ña chi ra ti: ―Ñahni ii yu iyo ―cati ña. Ta cati ra Jesuu chi ña ti: ―Vaha xaan cati cun ti ñahni ii cun,

¹⁸vati uhun tahan rai cha cucumi chihun, ta ñavi ra ii cun cuu ra iyo chihun vitin. Ndicha cun cuhva cati cun ―cati ra.

¹⁹Ta cati ndico ña chi ra: ―Yuhu cati ti rai cahan cuenda ra Ndioo cuun.

²⁰Tiempu chahnu cha sacahnu ñivi ndi chi ra Ndioo ihya yucu ya, ta maan ndo cati ndo ti iyo cha cua sacahnu yo chi ra Ndioo ñuun Jerusalén ―cati ña.

²¹Ta cati ndico ra Jesuu chi ña ti: ―Na cua cuinu ini cun cha cua cati yu, vati cua queta quivi, ta ña cua sacahnu ca ñivi chi ra Ndioo sutu yo ihya yucu ya, ta ni ña cua sacahnu ca ñi chi ra iti ñuun Jerusalén.

²²Ña chito ndo ñaan cha sacahnu ndo, soco chito maan ndi yoo ra sacahnu ndi, vati iin ra judío cuu ra cua sacacu chi ndo nu iyo ndo chi tu ndoho.

²³Yu cati ti cua queta quivi, ta cua sacahnu ñivi chi ra Ndioo sutu yo chi ndihi cuii anima ñi, ta cua sacahnu ndicha ñi chi ra, tu cha ndicha ñi. Nanducu ra chi ñivi cua sacahnu chi ra, ta vitin cha ni queta hora cha cua sacahnu ndicha ñivi chi ra.

²⁴Tati cuu ra Ndioo. Chacan cuu cha iyo cha cua sacahnu ndicha yo chi ra chi anima yo ―cati ra Jesuu.

²⁵Ta cati ndico tucu ña ñahan can chi ra ti: ―Chite ti cua quichi ra cua sacacu chi yo, ta Cristo cua cunani ra. Cua quichi ra, ta cua cuhva vaha ra cuenda chi yo ―cati ña.

²⁶Ta cati ndico ra Jesuu chi ña ti: ―Yuhu cui ―cati ra.