TUTU JUAAN 4:43-53

⁴³Yaha uvi quivi, ta quee ra Jesuu tican ñuhun Samaria can, ta cuahan ra iti ñuhun Galilea.

⁴⁴Tican cuu nu ni cati ra nu quichi quivi ti ña tuhva ñivi sacahnu ñi chi iin rai cahan cuenda ra Ndioo suvi ni ñuun nu chahnu ra.

⁴⁵Tacan cuu, ta queta ra iti ñuhun Galilea, ta cusii ini ñivi Galilea ndehe ñi chi ra, vati cha ni ndehe tahan ñi cha ni savaha ra ñuun Jerusalén quivi ni chacoo vico, vati ni chahan tahan ñi.

⁴⁶Tacan cuu, ta cuahan ndico tucu ra Jesuu iti ñuun Caná cha iyo cuenda ñuhun Galilea can, ta suvi ni tican sanandacu ra nduta chiti uva. Iti ñuun Capernaum iyo iin ra cuu tiñu, ta cuhvi sehe ra,

⁴⁷ta queta tuhun nuun ra ti cha ni quee ra Jesuu ñuhun Judea, ta ni quichi ndico ra iti ñuhun Galilea. Chacan cuu cha cuahan ra cuu tiñu can nu iyo ra Jesuu, ta quechaha cahan ndahvi ra chi ra Jesuu ti na coho iti vehe ra, ta na cua sanduvaha ra chi sehe ra. Tacan cahan ra cuu tiñu can, vati cha cuni cuvi sehe ra.

⁴⁸Tacan cuu, ta quechaha cati ra Jesuu chi ra ti: ―Tu ña cua ndehe ndo iin cha cahnu, tu ña cua nduiyo ndo suhva, ña cua cuni ndo cuinu ini ndo chi ra Ndioo ―cati ra.

⁴⁹Ta cati ndico ra cuu tiñu can ti: ―Ra chahnu, na coho vitin, coto cua cuvi cuii sehi ―cati ra.

⁵⁰Ta cati ndico ra Jesuu chi ra: ―Cuahan iti vehun. Ña cua cuvi sehun ―cati ra. Tacan cuu, ta chinu ini racan tuhun cha ni cati ra Jesuu, ta cuahan ra.

⁵¹Cha cua queta ra vehe ra, ta quee musu ra cuu tiñu can vehe ra, vati cua satahan ra chi ra. Tacan cuu, ta quechaha cati ra chi ra ti: ―Cha ni nduvaha sehun ―cati ra.

⁵²Ta nducu tuhun ra chi musu ra: ―¿Ñaan hora nduvaha sehi? ―cati ra. Ta cati ndico musu ra ti: ―Icu ta hora cuu chi, ta ndico cahni chi ra ―cati ra.

⁵³Tacan cuu, ta chito ra ti suvi ni hora can cati ra Jesuu chi ra ti ña cua cuvi sehe ra, cati ra, ta chinu ini ra chi ra Jesuu, ta chinu tahan ini ndihi ñivi ra chi ra Jesuu.