TUTU JUAAN 20:1-18

¹Xini vita cuu chi, ta cuahan ña María Magdalena nu ni cuchi ra Jesuu. Nahan xaan, ta ni vii naan, ta cuahan ña. Queta ña, ta ndehe ña ti ña ndasi ca yuu yuhu chi.

²Chacan cuu cha chinu ndico ña, ta cuahan ña nu iyo ra Simón Pedro chi ra iyo mani xaan chi ra Jesuu, ta quechaha cati ña chi ra ti: ―Cha ni tava ndico ñivi chi ra chahnu tichi yuu can, ta ña chito ndi ndaa iti chanaan ñi chi ra ―cati ña.

³Chacan cuu cha quee ra Pedro chi tahan ra, ta cuahan ra. Cuahan ra iti nu ni cuchi ra Jesuu,

⁴ta chinu ra ta ra cuahan ra. Nduvi ra chinu, soco nihin ca chinu inga ra, ta queta xihna ra nu ni cuchi ra Jesuu.

⁵Quechaha ndehe ihni ra, ta ndehe ra ti caa sahma, soco ña quihvi ra.

⁶Tacan cuu, ta queta tahan ra Simón Pedro. Iti chata ra quichi ra, vati ña nihin vaha chinu ra, ta quihvi ra iti tichi, ta ndehe tahan ra ti caa sahma can.

⁷Caa tahan pañitu cha cunuhni xini ra, soco ña caa chi nu caa inga sahma. Caa siin chi iin chiyo, ta ituvi vaha chi.

⁸Tacan cuu, ta quihvi tahan inga ra. Ra quichi xihna cuii cuu ra, ta ni ndehe tahan ra, ta ni chinu ini ra ti cha natacu ndico ra Jesuu.

⁹Ña ta cutuni ini ra ta ra yoso cuhva cati tutu Ndioo ti cua cuvi ra, ta cua natacu ndico ra.

¹⁰Tacan cuu, ta cuahan ndico ra ta ra iti vehe ra.

¹¹Tacan cuu, ta inda ña María Magdalena can iti chata nu ni cuchi ra Jesuu. Ndahyu ña. Ndahyu ña, ta ndehe ihni ña, vati cuni ndehe ña iti tichi,

¹²ta ndehe ña ti iyo uvi tatun Ndioo. Ndichin ra sahma cuichin, ta ndaa ra nu ni chacava ra Jesuu. Iin ra ndaa nu chacoo xini ra, ta inga ra ndaa nu chacoo chaha ra.

¹³Tacan cuu, ta quechaha cati ra chi ña ti: ―Yoho sihi, ¿ñacu ndahyu xaun? Ta cati ña chi ra ti: ―Quichi quihin ñivi chi ra chahnu, ta ña chite ndaa iti cha cuchi ndico ñi chi ra.

¹⁴Tacan cati ña, ta ndico coo ña, ta ndehe ña ti cha inda ra Jesuu, soco ña chito ña cha ra Jesuu cuu ra,

¹⁵ta quechaha cati ra chi ña ti: ―¿Ñacu ndahyu cun, ta sihi? ¿Yochi nanducu cun? ―cati ra. Saxini ña ti ra cumi ita cuu ra, ta cati ña chi ra ti: ―Vasi maun cuu ra quichi quihin iquin cuñu ra, taa. Cua cati cun chihin yu ndaa iti cha cuchi ndico cun chi ra ndii can, ta cua cuiso ndico main chi ra inga chiyo ―cati ña.

¹⁶Ta cati ndico ra Jesuu chi ña ti: ―¡María! ―cati ra. Ta ndico coo ña, ta cahan ña chi ra. Tuhun hebreo cahan ña, ta cati ña ti: ―¡Raboni! ―cati ña. Maestru cuni cati tuhun can.

¹⁷Tacan cuu, ta cati ra Jesuu ti: ―Ña tiun chihin yu, vati ña ta cuhin nuun iyo suti. Cuahan nuun iyo ra amigu yu, ta cua cati cun chi ra ti cua cuhin nuun iyo suti nu iyo sutu ndo ―cati ra.

¹⁸Tacan cuu, ta cuahan ña María Magdalena can, ta chaha ña cuenda ti cha ni ndehe ña chi ra chahnu, ta chaha ña cuenda ñaan tuhun cha ni cati ra chi ña.