TUTU JUAAN 1:20-44

²⁰Ña sandahyu ñahan ra chi ra ta ra, soco cati tuhun cachin ra chi ra, vati cati ra ti: ―Ñavi ra cua sacacu chi ndo cuu yuhu ―cati ra.

²¹Ta nducu tuhun ndico tucu ra chi ra ti: ―¿Yoo rai cuun? ¿Atu ra Elía ra ni cahan tuhun cuenda ra Ndioo cuun? ―cati ra ta ra. Ta cati ndico ra Juaan ti: ―Ñavi racan cuu yuhu ―cati ra. Nducu tuhun ndico tucu ra ta ra ti: ―Cha cua quichi iin rai cua cahan cuenda ra Ndioo. ¿Atu yoho cuu ra? Ta cati ndico ra Juaan ti: ―Ñavi.

²²Nducu tuhun ndico tucu ra ta ra chi ra ti: ―¿Yoo rai cuun? Cua cati ndicon, vati iyo cha cua cati ndico ndi chi ra ni tava tiñu chihin ndi. Vitin cua cati cun yoo rai cuun ―cati ra ta ra.

²³Ta cati ndico tucu ra Juaan chi ra ti: ―Yuhu cana chaa tichi cuhu, ta cati yu ti cua tiso vaha ñivi iti nu cua yaha ra chahnu cuhva ni cati ra Isaía ra ni cahan cuenda ra Ndioo iti chata tiempu chahnu ―cati ra.

²⁴Ta ra quee iti nuun ra fariseo can

²⁵nducu tuhun ra chi ra Juaan ti: ―¿Ñacu sacuanduta cun chi ñivi, vati ñavi ra Cristo cuun, ta ni ñavi ra Elía cuun, ta ni ñavi ra cahan cuenda ra Ndioo cuun? ―cati ra.

²⁶Ta cati ndico ra Juaan chi ra ta ra ti: ―Sacuandute chi nduta, soco cha iyo iin rai iti nuun ndo―ña nacoto ndo chi ra.

²⁷Vachi ra iti nuin, soco cahnu ca rai cuu ra. Ñahni yavi ndai iti nuun ra. Chacan cuu cha ña cuu cunda tohi, ta ndachi yu tiendu ndichan ra ―cati ra Juaan.

²⁸Chacan cuu tuhun ni cati ra Juaan iti ñuun Betábara inga chiyo yuta Jordán nu sacuanduta ra chi ñivi.

²⁹Tuvi inga quivi, ta ndehe ra Juaan ti cha vachi ra Jesuu nu iyo ra, ta quechaha cati ra Juaan ti: ―¡Jihna! Cha vachi ra cuu sava ta cua mbee Ndioo. Cua sanaan ra cuati ndacu ñivi ñuñivi.

³⁰Cha cati yu cuenda racan ti iti nuin vachi iin rai, ta cahnu xaan ca rai cuu ra, vati nda ni xihna ca cha iyo ra.

³¹Ña nacote chi ra, soco yuhu quichi, ta sacuandute chi ndo chi nduta. Chacan cuu cha cua coto ñivi Israel yoo rai cuu racan ―cati ra Juaan.

³²Cati tuhun tahan ra Juaan ti: ―Cha ni ndehi ti cha quichi nuun ra Tati Ndioo iti siqui andivi cuhva quichi nuun iin ri paloma, ta ndoo ra chi ra Jesuu.

³³Ña nacote chi racan, soco iyo iin ra ni tava tiñu chi yu, ta cati ra ti cua sacuanduta yu chi nduta. Racan cuu ra cati chihin yu ti cua ndehi ti cua quichi nuun ra Tati Ndioo, ta cua ndoo ra chi iin rai. Racan cuu ra cua tachi chi ra Tati Ndioo chi ndo.

³⁴Yuhu cha ni ndehi ti racan cuu ra cuu sehe Ndioo. Chacan ni chahi cuenda chi ndo ―cati ra Juaan.

³⁵Tuvi inga quivi, ta iyo ndico ra Juaan. Iyo ra chi uvi ra chica chi ra,

³⁶ta ndehe ra Juaan nu yaha ra Jesuu, ta quechaha cati ra ti: ―Racan cuu ra cuu sava ta cua mbee Ndioo ―cati ra.

³⁷Chini soho ra chica chi ra cha ni cati ra, ta quechaha ndicu ra chi ra Jesuu.

³⁸Ndico coo ra Jesuu, ta ndehe ra cha ndicu ra ta ra chi ra, ta quechaha nducu tuhun ra chi ra ti: ―¿Ñaan cha cuu cha nanducu ndo? Ta cati ndico ra chi ra Jesuu ti: ―Maestru, ¿ndaa iti iyo vehe nu iyo cun? ―cati ra.

³⁹Ta cati ra Jesuu ti: ―Nahan ndo, ta cua ndehe ndo ―cati ra. Chacan cuu cha cuahan ra ta ra chi ra, ta ndehe ra nu iyo ra, ta ndoo nuun ra chi ra quivi can, vati cha cua ini xaan.

⁴⁰Iin ra cuu ra Ndree yani ra Simón Pedro, ta cha chini ra tuhun ni cahan ra Juaan, ta ndicu ra chi ra Jesuu.

⁴¹Nanducu xihna ra Ndree can chi ra Simón yani ra, ta quechaha cati ra chi ra ti: ―Cha ni ndehe ndi chi ra cuu Cristo ―cati ra. Tacan cati ñi, vati cua sacacu ra cuu Cristo can chi ñi nu iyo ñi chi tu ndoho.

⁴²Tacan cuu, ta ni chandaca ra chi ra nu iyo ra Jesuu, ta ndehe ra Jesuu chi ra Pedro, ta quechaha cati ra chi ra ti: ―Simón, sehe Jonaa cuun, soco Cefa cua cunani cun ―cati ra. Tuhun Cefa can cuu Pedro chi tuhun cahan maan ñi.

⁴³Tuvi inga quivi, ta cuni cuhun ra Jesuu iti ñuhun Galilea, ta ndehe ra chi ra Felipe, ta quechaha cati ra Jesuu chi ra ti: ―Na coho ―cati ra.

⁴⁴Ra ñuun Betsaida cuu ra Felipe can, ta ini ñuun can cuu ñuun ra Ndree chi ra Pedro.