Turlku 46:1-11

¹Mama Kuurrtu-lanya yangatjura kanyilpayi. Nyangka-lan kurrurnpa rapa nyinarra. Tjiinya-lanya tirtu yirringkara kanyilpayi kutjupa-kutjupa ngaralanyangka.

²Palunyangka-lan ngurlumaalpa nyinama. Nyangka mantatarrartu yurrirranyangka purli wararra kartakatirra yuru purlkanyangka punka-punkara tjarrparranyangka-lan ngurlumaalpa nyinama.

³Tjinguru kapi warnanpa purlkanya wirtatjarra rurrku kukurrmanku. Wiya, ngurlumaalpa-lan nyinama. Tjiinya yapu wararratarrartu tiltirr-tiltirrmaranyangka, ngurlumaalpa-lan nyinama.

⁴Yuwa, kapi warla walykumunulu yarnangu Tjurutjamanyamartatji pirninya pukurlmara kanyilpayi. Yiwarla nyarra Mama Kuurrnga-ya lurrtjurringkula marninypungkupayi, palunyangka.

⁵Mama Kuurrnga yiwarla palunyangka tirtu nyinama. Nyangka-ya pungkula wiyalkitjalu purtulinku wantiku. Tjiinyamarntu Mama Kuurrtu waarrpungkulalpi yangatjunku kanyinma.

⁶Yuwa, ngurra kutjupa-kutjupangkatjalu-yanku pika pungkulanyangka Mama Kuurrnga tuturapirinypa wangkama. Nyangka-ya manta lipingkatjalu kuliralpi ngurluny-ngurlunyarriku.

⁷Yuwa, Mama Kuurrtu Yayirninytjulu Palyalpayilu-lanya miranykanyira kanyira. Mama Kuurrnga, tjiinya Tjayikapalu pupakatirra marninypungkupayi, palunyalu-lanya yangatjura kanyilpayi.

⁸Pitjalalpi-yan nyaku kata paarnarralku Mama Kuurrtu manta lipiwanalu kutjupa-kutjupa palyarnu wantinyangka.

⁹Tjiinya Mama Kuurrtu marrkulpayi yarnangu pirnilu-yanku warrmarlara manta lipiwanalu pika pungkulanyangka. Palunyalu kurlarta, kupulu pirninya kartarntankupayi, puru tjara pirninya tilira tjarrpatjunkupayi.

¹⁰Mama Kuurrtu watjarnu, “Wiya, tjurlpilyarrinytjamaalpa-ya kurrurnpa yipilyarri. Palunyalu-rniya ngayunya ruukulila tjiinya-tjanamparnanku puurrpa purlkanya nyinarranyangka. Nyangka yarnangu ngurra kutjupa-kutjupangkatjalu-rniya manta lipingkatjalurtu marninypungama.”

¹¹Yuwa, Mama Kuurrtu Yayirninytjulu Palyalpayilu-lanya miranykanyira kanyira. Mama Kuurrnga, tjiinya Tjayikapalu pupakatirra marninypungkupayi, palunyalu-lanya yangatjura kanyilpayi.