Turin Kiden 13:28-44

²⁸Te maski awan haman ta napasikkal da ta liwat na a nepapilit da hala ya pasi na te Gubernador Pilato.

²⁹A ta nepangpapasi dan tentu a nabalin na hapa ya ngamin nalavun tentu ta surat kiden, a itta ya umange nangidagut ta bari na en ta kayu en nga nagappan na, kapye da netanam.

³⁰Ammi tinolay hala na Namaratu ewan,

³¹a kanayun nakipaita ta kahulun na kiden taga Galileya addet ta addu na araw, te dana nehulun kid tentu ta ili na Herusalem, a ikid na ya mangipasikkal ta katolay na.

³²“A yen ta itta kamin hapa sin, kahkahulun ku, petta madangag muy hapa ya ipadamag mi tekamuy nga mappya. Te ya Mangikerutan nga nekari na Namaratu ewan ta gingginafu tam kiden a intu hala i Hesus nga dinob nan tekitam. A gafu ta kumanen a pake nagdulot na te Hesus ya inuhohug na Namaratu te mina Dabiden nga nesurat na ta mekaduwa en Kansyon na, te ya uhohug na Namaratu tentu a ‘Iko hala ya anak ku, te nagbalinak na ta kuman na damam,’ kunna.

³⁴“A ya takday para uhohug na Namaratu ta gingginafu tam kiden nga mangibar ta katolay ni Hesus, petta awenan ha sangaw masi, a intu yan: ‘Bendisyonan ta kam hala sangaw ta magnayun na pagariyan, te awek ibabawi ya nekarik te Dabid,’ kunna.

³⁵“A ya uhohug hapa ni Dabid ta takday para kansyon na ta Namaratu a ‘Mappya hapa yen, Afu, te awem sangaw ituluk ta malabag ya ikatalak min,’ kunna.

³⁶“Ammi bakkan haman ta bari ni Dabid ya nebar na en nga awan malabag, te kabalinan na nepagserbi ni Dabid ta patarabaku na Namaratu tentu a nasi hapa, kapye da netanam ta hebing na dadagkal na kiden, a malabag haman.

³⁷Ammi i Hesusen ya tinolay na Namaratu ewan, a intu mantu ya nebar na en nga awan malabag.

³⁸A yen mina ya pagnonotan muy, kahkahulun ku, te ye-yan na tolay nga awan malabag a intu hala ya gafu na pangpakoma na Namaratu ta liwat tam kiden. A intu ya mangikerutan nga ipadangag mi tekamuy.

³⁹Ammi am ikatalak muy ta mekerutan kam gafu ta pangidulot muy ta lintig kiden ni mina Mosesen a melogot kam, te awemuy kid haman sa idulot. Ammi am intu ikatalak muy ya nepangikaru ni Hesus ta liwat muy kiden a mekerutan kam.

⁴⁰A mappya mantu ta pake nonotan muy yan, kahkahulun, talo am mekabat kam hapa sangaw ta pangpa-gang na Namaratu nga nepadangag na aglavun na en, te ya uhohug na Namaratu ta mangidadula kiden ta idi a

⁴¹‘Ikamuy nga mangidadula a pagka-ma muy sangaw ya dumatang tekamuy, a yen hapa sangaw ya pasin muy. Te itta sangaw ya padatangan ku ta lugar muy nga awemuy kurugan maski am dana nepadangag mina tekamuy,’ kunna.” A yen ya addet na bida ni Pablu tekid.

⁴²A ya nebar da teg Pablu ta neuhet da ta kapilya en a “E kam hala sangaw sin mangipadangag ta takday Sabadu, te pake dangagan mi ha ta mappya,” kunna na tolay kiden tekid, kapye da hapa nagugungay.

⁴³Ammi ya Hudyo kiden ikid na Hentil kiden nga dana simarok ta relisyon na Hudyo a addu kid hapa nga himulun bit teg Pablu ikid ni Barnabas, a pake nebar da ta aweda mina pagtalekudan ya allak Namaratu tekid.

⁴⁴A ta takday ha na Sabadu a makipagammung hapa ya magge ngamin kiden tolay ta ili, te ikayat da dangagan ya uhohug na Namaratu nga ipadangag nig Pablu.