Tukpɔɠaaleʋe Nuiti 7:8-19

⁸Naa ʋolu, Zeedeyɔn Izelayɛle zunuiti kpein gaaɠaleni ma, ɛsɛ ge li ná-seɠe ɠotai wu, é zunu unsaʋagɔ (300) nɔ makɛ, naati ma ti ta-laamianigiti seɠeni, ta ta-ʋuʋugiti. Tama Madiyan nuiti ti ɠɛni ʋuuni ti yeeɠɔɠɔwuʋɛ nɔ nɛmɛi zu.

⁹Naama ɓidi ná, Ɠɔoɠɔ GALAGI ɠɛni Zeedeyɔn ma: «Li, è laalɛ Madiyan nuiti bu ta-ɠɔɔlaɠai zu, mazɔlɔɔ gè ti lɔa è yeezu.

¹⁰Ni ɗa luazu ga è yei ná, à yei ta-ɠɔɔlaɠai zu, wa ɗa-wotiɠɛ nui Pula.

¹¹Woilo, è naa mɛni nii ti bosu, naa ɠa è zɛbɛlɔ, ɗa yei naa ʋolu è laalɛ ta-ɠɔɔlaɠai wu.» Zeedeyɔnni ti yeini ta ná-botiɠɛ nui Pula, naati ta-ɠɔɔlaɠai ma mɔungi ʋɔ bɛ.

¹²Madiyan nuiti, ta Amalɛke nuiti, ta folo ɠulazu ʋele nuiti, ti vazaga ɠɛni de nɛmɛi zu, ti mɔin gola, eɠɛ kotogiti, nu la ɓena zoo é ʋa ta-ɲɔmɛiti gaalu, ti mɔinni eɠɛ kpoloɗɛi ɠobaʋɛ ɲaɠaegi.

¹³Zeedeyɔn zeeliai ma ná, wɛlɛ zunui ta ɠɛni segi zuɠulazu bɔɔlai ta ma. É ɠɛni ma: «Sèsuʋɛ, wɛlɛ wɔɔlezegi ma ɓului gila ge ɠilikilini, é li é loo Madiyan nuiti ta-ɠɔɔlaɠai zu, seeliai ma seɠe ɠotai ʋɔ bɛ, é loɠani maazuʋɛ ta buuʋɛ ʋa, é toka zooi ma.»

¹⁴Bɔɔlai gooɠaaʋoteni, é ɠɛ ma: «Ani ɠili nɔpɛ ta ga ná, kɛni Zoase ná-doun zunui Zeedeyɔn ná-boɠa zɔkpɔi, Izelayɛle zunui, nii GALA ge zobogi veai bɛ, ga é pilɛ sɔlɔɔ Madiyan ma, ta ná-kɔɔɠɔ nuiti.»

¹⁵Siɛgi zu Zeedeyɔn segi zu wooi mɛnini da, ta poluwo gooi, é nɔkɔni, é ɠale ma Izelayɛle nuiti ta-ɠɔɔlaɠai zu, é ɠɛ ti ma: «À wuzeɠe, mazɔlɔɔ Ɠɔoɠɔ GALAGI zobogi vea wo ʋɛ, wo pilɛ sɔlɔɔ Madiyan nuiti ta-ɠɔɔɠɔ nuiti ma.»

¹⁶Zeedeyɔn zunu unsaʋagɔiti (300) gaaɠwɛɛni su saʋa, é puʋugi veeni kɔɔɠɔ nui ɠilagilagi pɛ zea, ta pɔlɔ liɠi zuɲakai, nii ti ɠɛni sɔmɔgi ɠaazosu, ti dɔ su.

¹⁷É ɠɛni ti ma: «Wa ɠɛ nɔ̀un pɛtɛsu, wo ɗa naa nɔ ɠɛ, nii gè kɛɛzu. Nà zeelina nɔ feya ta-ɠɔɔlaɠai ɠobaʋɛ, nii gè kɛɛzu, wo naa ɠɛ.

¹⁸Siɛgi zu gè puʋugi vɛɛzu la, niiti kpein ti bà, wa puʋugi vɛ wa ɓalaagi ta-ɠɔɔlaɠai maaɠoolii zu, wo ɠɛ ma: ‹Ɠɔoɠɔ GALAGI ʋɛ, Zeedeyɔn ʋɛ!› »

¹⁹Zeedeyɔn ta zunu ungilagiti (100) ti zeelini Madiyan nuiti ta-ɠɔɔlaɠai zu, aisa kua zaamai. Naati ti kɔɔlaɠa maaɓɛɛ nuiti maavaliboni nɔ feya. Gaamago nɔ, Zeedeyɔn ta ná-nuiti ti puʋugi vɛɛni, ti pɔlɔ liɠiiti golo, niiti ti ɠɛni zoni ti ya.