Tu Gimet 15:28-41

²⁸Da sikame, éy naisipan me dén ta pamag-itan na tulung na Banal a Espiritu, a éwan me kam pilitén a sumunud ta rilihiyon na Judeo. Basta i hatul mia dikam,

²⁹éy diyan moy kanén tu buhay no niatang, sakay diyan kam méngibébi éy ta méngilélake; sakay diyan kam méngan ta dige éy ta pilas a medige. Eng sundin moy san diden ya a utus, éy tama dén. Ewan dén.”

³⁰Nadid, pinéglakad de de Pablo ta Antiokia, a kébilén de tu sulat. Ey kédemét de sa, éy pinatipun de du étanan a méniwala, sakay niatéd de dide tu sulat.

³¹Ey to pékabasa de éy mésahat side to kagi no sulat.

³²Ey ti Hudas sakay ti Silas éy nale side a naghatul dide, a pinatibay de side tu isip.

³³Ey kélipas na sénganya wade a aldew, éy nagsoli ti Hudas ta Jerusalem.

³⁴Pero gustu ni Silas a mawahak ta Antiokia.

³⁵Pati ti Pablo sakay ti Bernabe, éy édsa pabi side ta éya, a mégtoldu side ta kagi na Diyos, a kaguman de du iba sa a mégtoldu. Ta Adeyo a Lugar

³⁶Nadid, kélipas na sénganya a aldew, éy ti Pablo éy kinagi na ni Bernabe, a “Kita dén bumisita a huway du bigu a méniwala ta inangayan ta a banubanuwan to éya, éng mahusay pabi tu péniwala du tolay a tinolduan ta sa.”

³⁷Ey ti Bernabe éy gustu na a kuyugén de man dén ti Juan Markos.

³⁸Pero sala ni Pablo a kuyugén, da gininanan side ni Markos to éya ta Pampilia.

³⁹Néglébug side ta mahigpit ta éya, a tulos naghiwalay side. Ti Bernabe éy kinuyog na ti Markos, a inumange side ta Sipre.

⁴⁰Sakay ti Pablo, éy pinili na ti Silas a kaguman na. Ey du tolay sa, éy nipanalangin de de Pablo, sakay pinéglakad de side.

⁴¹Ey nagtulos pa side ta Siria sakay ta Silisia, a patibayén de du tolay a bigu a méniwala ta éya.